ލަންކާގެ މިހާރުގެ ހާލަތާއި ގުޅިގެން ރާއްޖޭގެ ރައްޔިތުންގެ މަޖިލީހުގެ މެމްބަރުން ލަންކާއަށް ވަޑައިގަތުމަކީ ވަރަށް ބޭނުންތެރި ކަމެއްކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ ލަންކާގައި ހިނގަމުންދާ ހަމަނުޖެހުންތަކާއި ގުޅޭ ޚަބަރެއް ހިއްސާ ކުރައްވައި، ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ރައްޔިތުންގެ މަޖިލީހުގެ ރަސްމީ ވަޓްސްއަޕް ގުރޫޕްގައި ދެއްކެވި ވާހަތަކަށް އިޝާރާތް ކުރައްވައެވެ. ބޮންޑޭ ވިދާޅުވީ މިހާލަތު ލަންކާއަށް ކުރިމަތިވީ ދަރަނިނެގުމާއި، ދަރަނި އަދާކުރެވޭނެ ގޮތެއް ނެތުމުން ގޮސް ހުސްވުމުންކަމަށެވެ. މިހާލަތަށް ވަރަށް ބޮޑަށް ރާއްޖެއިން ސަމާލުވާންޖެހޭކަމަށް އޭނާ ވިދާޅުވިއެވެ.
ބޮންޑޭގެ ވާހަތަކަށް އިޝާރާތް ކުރައްވައި ސްރީލަންކާގެ އިޤުތިޞާދީ ހާލަތުދަށްވެ އަސާސީ ބައެއް ތަކެތި ލިބުން ދަތިވުމުން ބޭރު ގައުމުތަކުން އެހީ ހޯދަން ސްރީލަންކާ ސަރުކާރުން ކަނޑައަޅާފައިވާ މަންދޫބު ރައީސް ނަޝީދު ވިދާޅުވީ މިހާލަތުގައި ރާއްޖޭގެ ރައްޔިތުންގެ މަޖިލީހުގެ މެމްބަރުން ލަންކާއަށް ދަތުރެއް ކުރުމަކީ ވަރަށް މުހިންމު ކަމެއްކަމަށެވެ.
ލަންކާއަށް ބޭރުގެ އެހީ ހޯދުމުގެ މަސަކަތް ކޮށްދެއްވަން ހުށަހެޅުއްވީ ރައީސް ނަޝީދު އަމިއްލަފުޅަށެވެ. ލަންކާއަށް އެހީ ހޯދައިދޭން އެމަނިކުފާނު ހުށަހެޅުއްވުމުން ބޮޑުވަޒީރު ރަނިލް ވިކްރަމަހަ ސިންހަ ވަނީ ޝުކުރު އަދާކުރައްވައި އެ މަސައްކަތް ކުރުމަށް ރައީސް ނަޝީދާ ހަވާލުވެސް ކުރައްވާފައެވެ. ނަމަވެސް މިހާތަނަށް މިމަސައްކަތުގެ މާބޮޑު އަޕްޑޭޓެއް ނުލިބެއެވެ.
ލަންކާގެ އިޤްތިޞާދީ ހާލަތު ގޯސްވެ އިއްޔެ މުޅި ލަންކާގައި ކުރި މުޒާޖަރާތައް ކޮންޓްރޯލްނުވެ، ބޮޑުވަޒީރާއި، ރައީސް އިސްތިއުފާ ދެއްވުމަށް ވަނީ ނިންމަވާފައެވެ.
ސްރީލަންކާއަށް ކުރިމަތިވެފައިވާ ނާޒުކު އިޤްތިޞާދީ ޙާލަތުގެ ސަބަބުން ބޭރު ފައިސާގެ ޢަދަދު މަދުވެ ގޭހާއި ތެޔޮ ގަންނާނެ ފައިސާ ނެތުމުގެ ސަބަބުން ޢާއްމުންނަށްވަނީ ބޮޑު ތަކްލީފަކާ ކުރިމަތިލާން ޖެހިފައެވެ. އެ ގޮތުން ކައްކާ ގޭސް ލިބުމުގައި އުނދަގޫތަކަކާ ކުރިމަތިވެ ދުވާލުގެ ގިނަ ވަޤުތުތަކުގައި ކަރަންޓު ލިބުމުގައިވެސްވަނީ ދަތިތަކަކާ ކުރިމަތިވެފައެވެ. ކޯވިޑް-19ގެ ސަބަބުން ސުރީލަންކާގެ ސަރަޙައްދީ ރޮނގު ގިނަ ދުވަސްތަކަކަށް ބަންދުކުރުމުންނާއި ޓެކްސް ނެގުން މަދުކުރުމުގެ ސަބަބުން އެ ޤައުމުގައި ބޭނުންކުރެވޭ ބޭރު ފައިސާގެ ޢަދަދު 50 މިލިޔަން އެމެރިކާ ޑޮލަރަށް މަދުވެފައިވާކަމަށް ސަރުކާރުން ބުނެފައިވެއެވެ. އެއާއެކު އެ ޤައުމަށް ބޭނުންވާއި ގޭހާއި ތެލާއި ކާބޯތަކެއްޗާއި ބޭސް ގަތުމަށް ބޭރުގެ އިދާރާތަކާއި ޤައުމުތަކުގެ މާލީ އެހީތެރިކަމަށް އެދުމަށްވަނީ މަޖުބޫރުވެފައެވެ.
2 Responses
އަޅެ ތި އެންމެހައި ބޭފުޅުންގެ އެއްމަހު މުސާރަ ނަމަވެސް ދީބަލަ. ދެން މިޤަވްމުގެ މަޖިލިސް މެމްބަރުންތަ ވަގުތީ ގޮތުން ލަންކާ ސަރުކާހިންގުމާ ޙަވާލުވަނީ . އޭރުންވާ ބާރަށް ކުރިޔަށް ދާނެދޯ؟ ދޮރުން ދޮރަށް ވަދެލާ…
ތިޔަ ބޭފުޅުންނަށް އެންމެ އެކަށީގެންވަނީ ލަންކާގެ މަޖިލިސް. އެތާގައި ތިބޭފުޅުންގެ ވިސްނުމާއި ފިކުރު ދިމާވާނެ. ރާއްޖޭގެ މީސްތަކުންގެ މައްޗަށް ޤާނޫނު ހަދަން ތިބޭފުޅުން އެންމެ އެކަށީގެންނުވާކަމުގައި ޤަބޫލުކުރެވޭ.