އެމްޑީޕީގެ އެންމެ ރަގަޅު ގޮތަކީ 2023ގެ ރިޔާސީ އިންތިޚާބުގައި ރައީސް ސާލިހު ވާދަ ނުކުރުންކަމަށް ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ އާސްކް ސްޕީކާގެ 5 ވަނަ ޕްރޮގުރާމުގައި ވާހަކަ ދައްކަވަމުންނެވެ. ރައީސް ނަޝީދު ވިދާޅުވީ އެމްޑީޕީގެ އެތެރޭގެ ކަންކަން ހިނގަމުންދާ ގޮތަށް ބަލައި، އަދި ރާއްޖޭގެ ކަންކަން ކުރިއަށްދާ މިސްރާބަށް ބަލާއިރު ރައީސް ޞާލިހު ވާދަ ނުކުރެއްވުމަކީ ޕާޓީއަށް އެންމެ ފައިދާވާނެ ގޮތްކަމަށެވެ.
ނަޝީދު ވިދާޅުވީ ރައީސް ސޯލިހް ދެވަނަ ދައުރަކަށް ކުރިމަތިލެއްވުމަކީ ސަރުކާރު ހިންގާ އެމްޑީޕީއަށް ރަނގަޅު ގޮތެއް ނޫން ކަމަށެވެ. ނިމިގެންދިޔަ 2018 ގެ ރިޔާސީ އިންތިހާބުގައި ވާދަކުރެއްވުމުގެ ޝައުގުވެރިކަން މިނިސްޓަރު ޝާހިދު ފާޅު ކުރެއްވި ކަމަށާ ނަމަވެސް އެ ފަހަރުގެ އިންތިހާބުގައި ނިކުންނަވަން އެންމެ ރަނގަޅު ބޭފުޅަކީ ރައީސް އިބްރާހިމް މުހައްމަދު ސޯލިހް ކަމަށް ޝާހިދު އަރިހުގައި ވިދާޅުވެފައި ވާނެ ކަމަށް ނަޝީދު މިރޭ ވިދާޅުވިއެވެ.
އަދި ރައީސުލްޖުމްހޫރިއްޔާގެ މަގާމަށް ކުރިމަތިލެއްވުން މަޑުޖައްސަވާ ލެއްވުމަށް ޝާހިދުގެ އަރިހުގައި އެދިވަޑައިގެންނެވި ނަމަވެސް ޝާހިދަކީ ވެރިކަމަށް ވަޑައިގަތުމަށް "ރުކުން" ހަމަ ބޭފުޅެއް ކަމަށް ގަބޫލުފުޅު ކުރައްވާ ކަމަށެވެ. ނަޝީދު ވިދާޅުވި ގޮތުގައި އެމްޑީޕީން ތިންވަނަ ބޭފުޅަކަށްވެސް ފުރުސަތު ދިނުމާމެދުވެސް ވިސްނެވުން ރަނގަޅު ކަމަށެވެ.
އެމްޑީޕީގެ ޕްރައިމަރީގައި ވާދަކޮށް ކާމިޔާބު ވާނެކަމަށްވެސް ރައީސް ނަޝީދު ވަނީ މިހާރު ކުރިޔަށްދާ އާސްކު ސްޕީކަރ ޕްރޮގްރާމްގައި ވިދާޅުވެފައެވެ. އެމަނިކުފާނު ވިދާޅުވީ އެއްވެސް އިންތިޚާބެއްގައި ވާދަކުރަނީ ބަލިވާނެކަމަށް ގަބޫލުކޮށްގެން ނޫންކަމަށެވެ. މިރޭވެސް ނަޝީދުވަނީ ބަރުލަމާނީ ނިޒާމަކުން ނޫނީ ވެރިކަންކު ކުރެވޭނެ ފަހިމަގެއް ނުލިބޭނެކަމަށް ވިދާޅުވެފައެވެ. އަދި އެމަނިކުފާނު އަބަދުވެސް ތާއީދު ކުރައްވާނީ އެނިޒާމުގެ ތެރެއިން ވެރިކަން ކުރެއްވުމަށްކަމަށް ރައީސް ނަޝީދު ވިދާޅުވިއެވެ.
2023ގެ ރިޔާސީ އިންތިހާބުގައި ވާދަކުރައްވާނެތޯ އެންމެ ފަހުން ރައީސުލްޖުމްހޫރިއްޔާ ބައިވެރިވި ނޫސްވެރިންގެ ބައްދަލުވުމުގައި ކުރެވުނު ސުވާލަކަށް ޖަވާބު ދެއްވަމުން ރައީސް ވިދާޅުވީ އެންމެ މުހިއްމީ އެމްޑީޕީއަށް ވެރިކަން ލިބުންކަމަށާއި އަދި އެއީ މުޅި ރާއްޖެއަށްވެސް އޮތް އެންމެ ފައިދާ ހުރި ގޮތްކަމަށެވެ. މިހާރު ކުރިޔަށްދާ މަޝްރޫއުތައް ކުރިޔަށްގެންދަން ދެވަނަ ދައުރެއް ލިބެންޖެހޭކަންވެސް ރައީސް ފާހަގަކުރެވިއެވެ. އެހެންނަމަވެސް އެކަނި އެއްވެސް ޕާޓީއަކަށް އިންތިޙާބު ކާމިޔާބު ނުކުރެވޭނެކަމަށާއި އެކަން ކުރަންޖެހޭނީ ގިނަ ޕާޓީތަކެއް އެެކުވެގެންކަމަށް ރައީސް ވިދާޅުވީއެވެ.
އެމްޑީޕީގެ ޕްރައިމެރީގެ ވާހަކަދައްކަވަމުން ރައީސް ވިދާޅުވީ ޑިމޮކްރެޓިކް އެންމެ ރަނގަޅު ގޮތަކީ ޕްރައިމެރީ ބޭއްވުންކަމަށެވެ. އެގޮތުން ޕާޓީން ނިންމާގޮތަކަށް އެމަނިކުފާނު ހުންނަވާނެކަމަށްވެސް ވިދާޅުވިއެވެ. 2023ގެ ރިޔާސީ އިންތިޚާބުގައި ކުރިމަތި ލެއްވުމުގައި ރައީސް ދެކެވަޑައިގަންނަވާ ގޮތް ހާމަކުރެއްވިއިރު، އެމްޑީޕީގެ ކޮންގްރެސް، އޮގަސްޓް މަހުގެ 19ވަނަ ދުވަހު ބޭއްވުމަށް ވަނީ ނިންމާފައެވެ.
ކޮމެންޓު ފޮނުވާ