ސޯޝަލް މީޑިއާގައި ދައުރުވަމުންދާ އެއްޖިއްސުން ގުޅުންހިއްގާ ވީޑިއޯތަކާއި ފޮޓޯތަކުގެ ސައްޚަކަން ކަށަވަރު ނުވާކަމަށާއި، އެކަން ކަށަވަރު ނުކޮށް، މަޖިލީހުގައި އެކަމަށް ބަހުސް ކުރަން ޖާގަ ނުދެވޭނެކަމަށް މަޖިލިސް ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ އެ މައްސަލަތަކަކީ ފުލުހުން ތަހުގީގު ކުރަމުން އަންނަ މައްސަލަތަކަކަށް ވާތީ އެޖެންޑާ ނުކުރަން ނިންމާފައިވާ ކަމަށެވެ. ނަޝީދު ވިދާޅުވި ގޮތުގައި މި ފޮޓޯ އުފެދުނު ގޮތް ދެނެ ނުގަނެ، އެހެން މީހެއްގެ އަބުރަށް އުނިކަން އަންނާނެ ގޮތަށް ކަންކަން ކުރުމަކީ ރާއްޖޭގެ އުސޫލުތަކާއި ހަމަތަކާ ހިލާފު ކަމެކެވެ.

ކުއްލި މައްސަލަ ގުޅިފައިވަނީ މިހާރު ސޯޝަލް މީޑިއާގައި ދައުރުވަމުންދާ ފޮޓޯތަކާއި ގުޅިގެން. މިފޮޓޯތަކަކީ އެކިއެކި މީހުންގެ މައްޗަށް ކުރެވޭ ތުހުމަތު ފުލުސް އޮފީހަށް ހުށަހަޅަފައިވާ ފޮޓޯ. އެފޮޓޯތަކުގެ ސައްހަކަން ފުލުސް އޮފީހަށް ކަށަވަރު ނުވެ އެއީ އަސްލުކަމަށް ބަލައި އެކަމާއި ގުޅޭގޮތުން މިމަޖިލީހުގައި ބަހުސް ކުރަން ޖާގަ އޮތްކަމަަށް އަޅުގަނޑު ނުދެކެން.

– ނަޝީދު ވިދާޅުވިއެވެ.

މިއަދުގެ ޖަލްސާއަށް ކުއްލި މައްސަލަ ހުށަހަޅުއްވާފައިވަނީ ނޮޅިވަރަމް ދާއިރާގެ މެންބަރު މުހައްމަދު ނަޝީދާއި ނައިފަރު ދާއިރާގެ މެންބަރު އަހުމަދު ޝިޔާމެވެ.

މަޖިލިސް ކޮންޓްރޯލް ނުވެ، ނަޝީދު ރިޔާސަތު ދޫކުރައްވާ އެ މެންބަރުންނާ މަޝްވަރާ ކުރައްވަން ވަޑައިގެން ނަމަވެސް، މެންބަރުން ވަނީ ގޮނޑިކޮޅަށް ދިއުމަށް ދެކޮޅު ހައްދަވާފަ އެވެ. ޖަލްސާ ކޮންޓްރޯލް ނުކުރެއްވުމުން ނަޝީދު ވަނީ ހުސް ވަގުތުކޮޅަކަށް ޖަލްސާ މެދުކަނޑާލައްވާފައެވެ.

އެއް ޖިންސުން ގުޅުން ހިންގާ މަންޒަރު ފެންނަ ވީޑިއޯތަކުގެ ތެރެއިން ފުރަތަމަ ވީޑިއޯގައި ފެންނަނީ ރައީސް ނަޝީދުގެ ކޮއްކޮ ނާޒިމް އަބްދުއްސައްތާރު ކަމަށް ވަރަށް ބޮޑަށް ބެލެވެއެވެ. އެ މައްސަލަ ފުލުހުން ތަހުގީގު ކުރަމުންދާއިރު މިހާރު ވަނީ އޭނާ ފުރުން މަނާކޮށް ޕާސްޕޯޓްވެސް ހިފަހައްޓާފައެވެ. ފާޑުކިޔުން އަމާޒުވުމުން ނާޒިމް ވަނީ އޭނާގެ އެކައުންޓްވެސް ޑީއެކްޓިވޭޓް ކޮށްފައެވެ.

ރައީސް ނަޝީދުގެ އިއްޔެ އެމްޑީޕީގެ އަހަރީ ދުވަސް ފާހަގަ ކުރުމަށް ބޭއްވި ދިދަ ނެގުމުގެ ރަސްމިއްޔާތުގައި ވާހަކަ ދައްކަވަމުން ވިދާޅުވީ ބަރަހަނާ މަންޒަރު ފެންނަ ވީޑިއޯތަކެއް އާންމުކުރީ ސަރުކާރުގެ ނުފޫޒު ގަދަ ބައެއް ވަޒީރުންގެ ބައިވެރިވުން އޮވެގެންނެވެ. އަދި އެއީ "ކަތިލު"މެއްގެ ގޮތުގައި ސިފަ ކުރެެއްވިއެވެ. ނަމަވެސް ދެން ވިދާޅުވީ އެފަދަ ކަންކަމުން އެމަނިކުފާނު ގުޑުވާނުލެވޭނެ ކަމަށެވެ.