ހައިކޯޓުގެ ފަނޑިޔާރު އަލްއުސްތާޛު ޢަބްދުއް ރައޫފު އިބްރާހީމް މަގާމުން އިސްތިއުފާދެއްވައިފިއެވެ.

ހައިކޯޓުން ކުރައްވާފައިވާ ޓުވީޓެއްގައި ވިދާޅުވީ، ފަނޑިޔާރު އަލްއުސްތާޛު ޢަބްދުލް ރައޫފު އިބްރާހީމް އިސްތިއުފާ ދެއްވާފައިވަނީ މިއަދުގެ ވަގުތެއްގައި ކަމަށެވެ. ވޭތުވެދިޔަ 11 އަހަރު ފަނޑިޔާރުކަމުގެ މަގާމުގައި އަލްއުސްތާޛު ޢަބްދުލް ރައޫފު އިބްރާހީމް ކޮށްދެއްވާފައިވާ އަގުހުރި ޚިދުމަތަށް ހައިކޯޓުގެ ފަރާތުން ވަނީ ޝުކުރު ދަންނަވާފައެވެ. އޭނާ އިސްތިއުފާ ދެއްވި ސަބަބެއް ހައިކޯޓުން ހާމަކުރައްވާފައި ނުވެއެވެ.

ރައޫފު މަޤާމުން އިސްތިއުފާ ދެއްވާފައިވަނީ ސަރުކާރުން ފަނޑިޔާރުންނަށް ދޫކުރި ފްލެޓުތަކެއް މި ދެ ފަނޑިޔާރުން ނެންގެވީ ޤާނޫނުއަސާސީގެ 152 ވަނަ މާއްދާއާ ޚިލާފަށްކަމަށް ތުހުމަތުކޮށް ހުށަހެޅި މައްސަލަގައި ޖޭއެސްސީން ބެއްލެވުމަށްފަހު މަޤާމުން ވަކި ކުރެއްވުމަށް ރައްޔިތުންގެ މަޖިލީހަށް ހުށަހަޅައި އެމައްސަލަ ބަލަމުންދަނިކޮށެވެ. މިމައްސަލާގަިއ މަޤާމުން ވަކިކުރަން ޖޭއެސްސީން ނިންމާފައިވަނީ ހައިކޯޓުގެ ފަނޑިޔާރު އަލްއުސްތާޛު ޢަބްދުއްރައޫފް އިބްރާހީމާއި ފަނޑިޔާރު އަލްއުސްތާޛު ޙަމީދެވެ.

ޖޭއެސްސީން މަޖިލީހަށް ހުށަހެޅި މައްސަލާގައި ޖުޑީޝަރީ ކޮމެޓީން ނިންމާފައިވަނީ، މި ދެ ފަނޑިޔާރުން މަޤާމުން ވަކިކުރުމަށް އެކޮމިޝަނުން ނިންމީ އިޖުރާއީގޮތުން ފުރިހަމަކުރަންޖެހޭ ކަންކަން ފުރިހަމަނުކޮށްކަމަށެވެ. އަދި ޖޭއެސްސީން މިމައްސަލާގައި މަޤާމުން ވަކި ކުރަން ފޮނުވި ދެ ފަނޑިޔާރުންގެ މައްސަލަ ނިމުނުގޮތުގެ ރިޕޯޓަށް ނުވަތަ ފައިނަލް ރިޕޯޓަށް ޖަވާބުދާރީވުމުގެ ފުރުސަތު ދީފައި ނުވާކަމަށެވެ.

ނަމަވެސް ޖޭއެސްސީން ވިދާޅުވީ ފަނޑިޔާރުން މަޤާމުން ވަކިކުރުމަށް ނިންމައި، ރައްޔިތުންގެ މަޖިލީހަށް ފޮނުވާފައިވަނީ ގާނޫނުގައި ބަޔާންކޮށްފައިވާ އެންމެހައި އިޖުރާއަތުތައް ފުރިހަމަވާ ގޮތަށްކަމަށެވެ. މައްސަލައިގެ މައިގަނޑު ނިންމުމަކީ ވިހިހާސް ރުފިޔާގެ ޑައުންޕޭމަންޓަކަށް ކުރީގެ ހައުސިންގ މިނިސްޓްރީ މެދުވެރިވެ މާލެއިން ފްލެޓް މި ދެ ފަނޑިޔާރުން ޤާނޫނުއަސާސީއާ ޚިލާފަށް ހޯދާފައިވާތީ، އެކަން އެ ގޮތުގެ މަތިން ހިނގާފައިވާކަން ސާބިތުވާ ކަންކަމަށް އެކޮމިޝަނުން ވިދާޅުވެއެވެ. ޖޭއެސްސީން ވިދާޅުވީ މައްސަލައިގެ ސީޣާއިން ނުވަތަ މައުލޫއިން ބޭރުން އެއްވެސް ކަމެއް ތަހުގީގުކުރެވި ގޮތް ނިންމާފައި ނުވާކަމަށެވެ.