ހުނަރުވެރި ޑައިރެކްޓަރު އިލްޔާސް ވަހީދުގެ 'އައިފިލްމްސް' އިން ގެނެސްދޭން ނިންމާފައިވާ "ބިރުވެރި ވާހަކަ" ޑްރާމާ ސިލްސިލާގެ ފުރަތަމަ ޓީޒާ އާންމުކޮށްފިއެވެ.
މި ފިލްމުގެ ޕްރޮމޯޝަން ލަވަ ޝައިތޯނާ ވެސް ވަނީ މީގެ ކުރިން ބެލުންތެރިންނަށް ދައްކައިލާފައެވެ. އެއާއެކު މިއީ ތަފާތު އަދި ވަރަށް ބިރުވެރި ސިލްސިލާއަކަށް ވާނެ ކަމަށް ބެލުންތެރިން ވަނީ ބުނެފައެވެ.
ދިރާގު ޓީވީން މި ސިލްސިލާ ގެނެސްދޭން ހަމަޖެހިފައިވަނީ އެޕިސޯޑްތަކަކަށް ބަހާލައިގެން ވަކި ވަކިންނެވެ. އެހެން ނަމަވެސް ސީރީޒް ދައްކަން ފަށާނެ ތާރީހެއް އަދި އިއުލާން ކޮށްފައެއް ނުވެއެވެ.
ކޮންމެ އެޕިސޯޑަކުން ވެސް ތަފާތު ބިރުވެރި ވާހަކައެއް ކިޔައިދޭނެ "ބިރުވެރި ވާހަކަ" އިން ބޮޑު ކާސްޓެއް ވެސް ފެންނާނެއެވެ.
އޭގެ ތެރޭގައި މަޝްހޫރު ބައެއް ތަރިންނާއި އަރަމުން އަންނަ ބައެއް ތަރިންނާއި އާ މޫނުތައް ވެސް ހިމެނެ އެވެ. އެގޮތުން އައިޝަތު ރިޝްމީ، ނުޒުހަތު ޝުވައިބް (ނުޒޫ)، މަރިޔަމް އައްޒަ، ޝަރާ، މުހައްމަދު ވިޝާލް (ރޯމަން)، ނަތާޝާ ޖަލީލް، އިފްނާޒު ފިރާގާއި އޭނާގެ އަންހެނުން ތާތި ފަދަ ފަންނާނުން "ބިރުވެރި ވާހަކަ" އިން ފެންނާނެއެވެ.
