އެމްޑީޕީގެ މަޖިލިސް މެންބަރުންނަށް ވަގަށް ގޮވާތީ ފޭދޫ ދާއިރާގެ އެމްޑީޕީ މެންބަރު މުޙައްމަދު ނިހާދު ހިތްހަމަނުޖެހުން ފާޅުކޮށްފިއެވެ.

ނިހާދު ހިތްހަމަނުޖެހުން ފާޅުކުރެއްވީ ޓެންޑަރ ބޯޑުގެ ކުރީގެ ޗެއަރޕާސަން އިސްމާއީލް ޒަރިއަންދު ވިދާޅުވި އެއްޗަކާއި ގުޅިގެންނެވެ. ޒަރިޔަންދު ވިދާޅުވީ، މިއަދު "ތަށިމުއްޓާއި ބެޑްރޫމް ސެޓާއި، އެސްއެމްއީ ލޯނާއި މަދު ފައިސާކޮޅަކަށް" ވޯޓް ވިއްކާލަން ތައްޔާރުވާނަމަ ވިސްނަވަންވީކަމަށެވެ. އަދި މާދަމާ އެ ވޯޓް ގަންނަފަރާތުން ތިބާއަށް ކުރި ޙަރަދު އަނބުރާ ހޯދާނީ، އޭގެ އެތައް ސަތޭކަގުނައަކަށް ރައްޔިތުންގެ މުދަލާއި ފައިސާއިން ކޮރަޕްޝަން ހިންގައިގެންކަމަށް ޒަރިޔަންދު ވިދާޅުވިއެވެ.

އެ ވާހަކަތަކަށް ރައްދު ދެއްވާ ނިހާދު ވިދާޅުވީ، ޕާޓީގެ ހުރިހައި މެމްބަރުންނަށް ވަގަށް ގޮވުމަކީ ވަރަށް ދަށު ދަރަޖައިގެ ކަމެއްކަމަށެވެ. ތިމާ ނުވަތަ ފެކްޝަންގެ މަދު މީހުން ނޫން އެހެން ހުރިހައި މެމްބަރުންނަށް ވަގަށް ގޮވުމަކީ އެއްވެސް ހާލެއްގައި މެމްބަރުން ބަލައިގަންނާނެ ކަމެއް ނޫންކަމަށާއި، މެމްބަރުން ކުރެން މާފަށް ވެސް އެދެންޖެހޭނެކަމަށް ނިހާދު ވިދާޅުވިއެވެ.

ޕާޓީގެ ހުރިހައި މެމްބަރުންނަށް ވަގަށް ގޮވުމަކީ ވަރަށް ދަށު ދަރަޖައިގެ ކަމެއް! ތިމާ ނުވަތަ ފެކްޝަންގެ މަދު މީހުން ނޫން އެހެން ހުރިހައި މެމްބަރުންނަށް ވަގަށް ގޮވުމަކީ އެއްވެސް ހާލެއްގައި މެމްބަރުން ބަލައިގަންނާނެ ކަމެއް ނޫން! މެމްބަރުން ކުރެން މާފަށް ވެސް އެދެންޖެހޭ! https://t.co/93gv1BglZX

— Feydhoo Meehaa (Mohamed Nihad) (@nihad_m) May 5, 2022

އެމްޑީޕީ ޗެއަރޕާސަން އިންތިޚާބުގައި ޒަރިޔަންދު ތާޢީދުކުރައްވަނީ އިންތިއަށެވެ. ނަމަވެސް ނިހާދު ތާޢީދު ކުރައްވާނީ މިނިސްޓަރ ފައްޔާޒަށެވެ.

އެމްޑީޕީގެ ޗެއާޕާސަން އިންތިޚާބު މިމަހުގެ 14 ވަނަ ދުވަހު ބޭއްވުމަށް ހަމަޖެހިފައިވާއިރު، މިއިންތިޚާބުގައި އިކޮނޮމިކް މިނިސްޓަރ ފައްޔާޟު ސަރުކާރުގެ ނުފޫޒާއި ބާރުގެ ބޭނުން ކުރާކަމަށް އިންތިގެ ޓީމުން ދަނީ ތުހުމަތު ކުރަމުންނެވެ. އަދި ކަން ބެލުމަށް އެމްޑީޕީގެ ކަމާއިބެހޭ ކޮމެޓީއަށް ހުށަހެޅުުން ނިންމާފައިވަނީ، އިންތިޚާބަށް ނުފޫޒު ފޯރުވާކަމަށެވެ.

ނަމަވެސް ފައްޔާޟުގެ ޓީމުން ވަނީ މިއީ ކަނޑައެޅިގެން ދޮގުވާހަކަތަކެއްކަމަށް ބުނެފައެވެ. މިއިންތިޚާބުގެ ވާދަވެރިކަން ބޮޑުވެފައިވަނީ މިއީ ކުރިއަށް އޮތް ރިޔާސީ އިންތިޚާބުގައި އެމްޑީޕީން ނެރޭނެ ކެނޑިޑޭޓެއްވެސް ސާފުވާނެ އިންތިޚާބަކަށް ވުމުންނެވެ.