އަމިއްލަ އެޖެންޑާތައް ފެތުރުމަށް، ރައީސް އޮފީހުން ދަނީ މީޑިއާތަކަށް މިލިއަނުން ޚަރަދު ކުރަމުން ކަމުގައި ރައްޔިތުންގެ މަޖިލީހުގެ ނައިބް ރައީސް އީވާ ވިދާޅުވެއްޖެއެވެ.
އީވާ މިހެން ވިދާޅުވީ ދުނިޔޭގެ އެކި ކަންކޮޅުތަކުގައި ނޫސްވެރިކަމުގެ މިނިވަންކަން އޮންނަ ވަރު މިންވަރު ބަލައި "ރިޕޯޓާސް ވިތައުޓް ބޯޑާސް" ކޮންމެ އަހަރަކު އާންމު ކުރަމުން ދާ "ވާރލްޑް ޕްރެސް ފްރީޑަމް އިންޑެކްސް" ގައި ރާއްޖެ ކުރީ އަހަރަށް ވުރެ 15 ދަރަޖަ ވެއްޓުމާއި ގުޅިގެން ގިނަ ބައެއްގެ ފާޑުކިޔުން ސަރުކާރަށް އަމާޒުވެފައިވާ ދަނޑިވަޅެއްގައެވެ.
އީވާ ވިދާޅުވީ ސަރުކާރުން ސްޕޮންސާ ދީގެން މީޑިއާތައް ކޮންޓްރޯލް ކުރަން އުޅުމަކީ ހިތާމަކުރަންޖެހޭ ކަމެއްކަމަށެވެ. ފެނިގެންދަނީ ސަރުކާރުން ބޭނުންވާ ވަކި އެޖެންޑާތަކެއް ފެތުރުމަށްޓަކައި ވަކިވަކި މިނިސްޓްރީތަކާއި، ކުންފުނިތަކުން މިލިޔަނުން ޚަރަދު ކުރަމުންދާކަމީ މީޑިއާތަކަށް ނުފޫޒު ފޯރުވާކަމުގެ އަލިގަދަ ހެއްކެއްކަމަށެވެ. ސަރުކާރުން މަސައްކަތް ކުރަންޖެހޭނީ މިނިވަން މީޑިއާއަކަށް ފުރުސަތު ދޭންކަމަށާއި، މީޑިއާތައް ގަނެލައިގެން ސަރުކާރުން ބޭނުންވާހާ ގޮތަކަށް ޕްރޮޕެގެންޑާ ފަތުރާކަށް ނޫންކަމަށް އީވާ ވިދާޅުވިއެވެ.
ސްޕޮންސަރތައް ދީގެން ދައުލަތުން މީޑިއާތައް ކޮންޓްރޯލްކުރުމަކީ ހިތާމަ ކުރަންޖެހޭ އާދައެއް. ސަރުކާރުގެ އެޖެންޑާ ފެތުރުމަށް, ރައީސް އޮފީހުންނާއި މިނިސްޓްރީ ތަކުންނާއި ދައުލަތުގެ ކުންފުނިތަކުން މިލިއަނުން, ދައުލަތުގެ މާލިއްޔަތުން ޚަރަދު ކުރުމަކީ ސަރުކާރުން މީޑިއާތަކަށް ނުފޫޒު ފޯރުވުން. ސަރުކާރުގެ ދައުރަކަށް ވާންވާނީ މިނިވަން މީޑިއާއަށް ހިތްވަރު ދިނުން, މީޑިއާތައް ގަނެލުމެއް ނޫން.
– އީވާ ވިދާޅުވިއެވެ.
ޖުމްލަ 180 ގައުމު ހިމެނޭ އެ އިންޑެކްސްގައި މި އަހަރު ރާއްޖެ އޮތީ 87 ވަނައިގައެވެ. މިދިޔަ އަހަރުގެ އިންޑެކްސްގައި ރާއްޖެ އޮތީ 72 ވަނައިގަ އެވެ. އެހެންކަމުން މިދިޔަ އަހަރު އޮތް ހިސާބާ އަޅާބަލާއިރު މިއީ 15 ދަރަޖައިގެ ވެއްޓުމެކެވެ.
މިއީ ފާއިތުވެ ދިޔަ ހަތަރު އަހަރުގައި މި އިންޑެކްސްގައި ރާއްޖެ ފަހަތަށް ދިޔަ ފުރަތަމަ ފަހަރެވެ. މީގެ ކުރިން 2018 ވަނަ އަހަރު ރާއްޖެ 120 ވަނައިގައި އޮތް އިރު، 2019 ވަނަ އަހަރު ރާއްޖެ އޮތީ 98 ވަނައެވެ. އަދި 2020 ވަނަ އަހަރު 79 ވަނައިގައި އޮތް އިރު، މިދިޔަ އަހަރު 72 ވަނައަށް ރާއްޖެ ޖެހިލިއެވެ.
ނޫސްވެރިކަމުގެ މިނިވަންކަން ދަރަޖަކުރާ ބައިނަލްއަގްވާމީ މިންގަނޑުގައި ރާއްޖެ މިހާ ބޮޑަށް މި ވެރިކަމުގައި ފަހަތަށް ޖެހުނުއިރު، މިއީ މީޑިއާގެ މިނިވަންކަމަށް ވަކާލާތުކުރާ ސަރުކާރެކެވެ. ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގަތީ ވެސް ނޫސްވެރިކަމުގެ މިނިވަންކަމަށް މަސައްކަތްޕުޅު ކުރައްވާނެ ކަމަށް ވިދާޅުވަމުންނެވެ. އަދި މިއަދުގެ މުނާސަބަތުގައި ދެއްވި ހިތާބުގައި އެ މަނިކުފާނު ފާހަގަކުރެއްވީ ނޫސްވެރިކަމުގެ މިނިވަންކަމުގައި ރާއްޖެ ހޯދަމުން އަންނަ ކުރިއެރުމުގެ ވާހަކައެވެ.
ރައީސް އިބްރާހިމް މުހައްމަދު ސޯލިހު މިއަދު ވިދާޅުވީ ރާއްޖޭގައި ނޫސްވެރިންނަށް މިހާރު ފުރިހަމަ މިނިވަން ލިބިފައިވާ ކަމަށެވެ. އަދި އެ މަނިކުފާނު ރާއްޖޭގެ ވެރިކަމާ ހަވާލުވެވަޑައިގަތުމުގެ ކުރިން ހަރުކަށި ހިފެހެއްޓުމެއްގެ ތެރޭގައި އޮތް ނޫސްވެރިކަމަށް މިހާރު ފުރިހަމަ މިނިވަންކަމެއް ލިބިފައި ވާތީ އުފާފުޅު ކުރައްވާ ކަމަށް ވެސް ވިދާޅުވިއެވެ.
