ޕާކިސްތާނުގެ ކަރާޗީގައި ބާރުގަދަ ބޮމެއް ގޮއްވާލާ، ޗައިނާގެ 3 މީހަކާއި ޕާކިސްތާނު މީހަކު މަރުވެއްޖެއެވެ. ޕާކިސްތާންގެ ލޯކަލް މީޑިއާތަކުން ރިޕޯޓު ކޮށްފައިވާ ގޮތުގައި، މި ހާދިސާގައި މަރުވެފައިވާ ޕާކިސްތާން މީހަކީ ބޮން ގޮއްވާލި ވޭނު ދުއްވަން އިން ޕާކިސްތާން ޑްރައިވަރެވެ.
ގޮވި ބޮމުގެ ބާރުގަދަ ކަމުން، މަރުވި މީހުން ދުއްވަމުން ދިޔަ ވޭންވަނީ ކުދިކުދި ވެފައެވެ. އަދި ބޮން ގޮވި ސަރަހައްދު ކަމުގައިވާ ޔުނިވަރސިޓީގެ ކޮންފޫޗިއަސް އިންސްޓިޓިއުޓު ކައިރީގައިތިބި 4 މީހަކަށްވެސް ވަނީ އަނިޔާވެފައެވެ.
ކަރާޗީގެ ފުލުހުން ބުނެފައިވަނީ މި ހާދިސާ ތަހުގީގު ކުރަމުން ދާކަމުގައެވެ. އެހެންނަމަވެސް، ވަކިވެގަތުމަށް ހަނގުރާމަ ކުރަމުންދާ ބަލޮޗް ލިބަރޭޝަން އާރމީއިން ބުނެފައިވަނީ، މިއީ އެޖަމާއަތުން ދީފައިވާ ޖާނުންފިދާ ވުމުގެ ހަމަލާއެއް ކަމުގައެވެ. އަދި ބުނެފައިވަނީ މިހަމަލާ ދީފައިވަނީ ޖާނުންފިދާވި އަންހެނެއް ކަމުގައެވެ.
މި ޖަމާއަތަކީ، ޕާކިސްތާނުގައި ޗައިނާއިން އިންވެސްޓު ކުރުމާއި ދެކޮޅު ޖަމާއަތެކެވެ. އަދި މި ޖަމާއަތުންވަނީ އާންމުން ޗައިނާގެ އިންވެސްޓުމަންޓުތަކުން ފައިދާވެސް ލިބި ނުގަތުމަށް އިންޒާރު ދީފައެވެ.
މި ހަމަލާއަކީ ބަލޮޗް ލިބަރޭޝަން އާރމީއިން ދީފައިވާ ހަމަލާއެއްކަން ޔަގީން ކުރެވިއްޖެނަމަ، ހަަމަލާ ވެގެންދާނީ މިޖަމާއަތުގެ އަންހެން މެމްބަރަކު ދިން ޖާނުންފިދާވުމުގެ ފުރަތަމަ ހަމަލާ ކަމުގައެވެ. މި ގުރޫޕުން ވަނީ މީގެކުރިންވެސް ޕާކިސްތާނުގައި ތިބޭ ޗައިނާގެ ރައްޔިތުންނަށް އަމާޒުކޮށް މީގެކުރިންވެސް ހަމަލާތައް ދީފައެވެ.
ޗައިނާއިންދަނީ ޕާކިސްތާނުގައި ތަރައްގީގެ ބޮޑެތި މަޝްރޫޢުތައް ކުރިޔަށް ގެންދަމުންނެވެ. މީގެ ތެރޭގައި ގުދުރަތީ މުއްސަދިކަން ބޮޑު، ބަލިޗިސްތާން ޕްރޮވިންސްވެސް ހިމެނެއެވެ.
