ދުނިޔޭގެ މަޝްހޫރު ފުޓްބޯޅަ ކުޅުންތެރިޔާ، މެންޗެސްޓަރ ޔުނައިޓެޑްގެ ފޯވާޑް ކްރިސްޓިއާނޯ ރޮނާލްޑޯއަށް ލިބުނު އެއްމާބަނޑު ދެކުދިންގެ ތެރެއިން އެއް ކުއްޖަކު މަރުވެއްޖެއެވެ.
ދަރިފުޅު މަރުވެފައިވާކަން ރޮނާލްޑޯ ވަނީ އޭނާގެ ޓްވީޓެއްގައި ކަށަވަރު ކޮށްދީފައެވެ. ނަމަވެސް ދަރިފުޅު މަރުވީ ސީދާ ވިހެއުމުގެ ތެރޭގައި ކަމެއް ނޫނީ ވިހެއުމަށްފަހު ކަމެއް އޭނާގެ ޓްވީޓްގައި ހާމަ ކޮށްފައެއް ނުވެއެވެ. ނަމަވެސް ރޮނާލްޑޯގެ ފިރިހެން ދަރިފުޅު މަރުވެފައިވަނީ ވިހެއުމުގެ ތެރޭގައި ކަމަށް ބޭރުގެ ރިޕޯޓްތަކުން ބުނެއެވެ.
މިއާއެކު، އެ ދެމީހުންނަށް ލިބިފައިވާ ފުން ހިތާމައިން އަރައިގަންނަން މި ދަނޑިވަޅުގައި ލިބުނު އެންމެ ބޮޑު ހިތްވަރަކީ ސަލާމަތްވި އަންހެން ކުއްޖާ ކަމަށްވެސް ވަނީ ފާހަގަކޮށްފައެވެ. އަދި މި ދަނޑިވަޅުގައި ދެމީހުންނަށް ވީހާވެސް ބޮޑަށް ޕްރައިވެސީ ދިނުމަށްވެސް ރޮނާލްޑޯ އާއި ޖޯޖީނޯ ވަނީ އެދިފައެވެ.
އަދި ވިހެއުމުގެ އެންމެހާ ކަންކަމުގައި ޑޮކްޓަރުންނާއި ނަރުހުން ބެހެއްޓި ގާތްކަމާ ދިން އެހީތެރިކަމަށް އޭނާވަނީ ޝުކުރު އަދާކޮށްފައެވެ. ރޮނާލްޑޯއަކީ މިހާރުވެސް 4 ކުދިންގެ ބައްޕައެކެވެ. އެގޮތުން އެންމެ ފަހުންވެސް އޭނާއާއި ލޯބިވެރިޔާ ޖޯޖިއާނާއަށް ލިބިފައިވަނީ ޓުވިންސްއެވެ.
— Cristiano Ronaldo (@Cristiano) April 18, 2022
އަހަރެމެންގެ ތުއްތު ދަރިފުޅު މަރުވިކަން އިއުލާނު ކުރަނީ ވަރަށް ފުން ހިތާމަ އާ އެކު. އެއީ އެއްވެސް ބެލެނިވެރިއަކަށް އިހުސާސް ކުރެވޭނެ ވަރަށް ވުރެ ބޮޑު ވޭނެއް. ތުއްތު އަންހެން ދަރިފުޅު ދިރިހުރުމުން އަހަރެމެންނަށް ކޮންމެވެސް ވަރެއްގެ އުންމީދަކާއި އުފާވެރިކަމެއް މި ވަގުތު ލިބެނީ.
– ރޮނާލްޑޯ އާއި ޖޯޖީނާއާގެ ނަމުގައި އާއްމުކުރި ޕޯސްޓުގައިވެ އެވެ.
ރޮނާލްޑޯ އަދި ޖޯޖީނޯއަށް އެއްމާބަނޑު ދެކުދިން ލިބޭކަން އިއުލާންކުރީ މިދިޔަ އަހަރުގެ އޮކްޓޫބަރު މަހުއެވެ. މިއަދު މަރުވި ކުއްޖާ އާއި ސަލާމަތްވި ކުއްޖާގެ އިތުރުން ރޮނާލްޑޯގެ އިތުރު 4 ކުދިން ތިބެއެވެ. އޭގެ ތެރޭގައި 4 އަހަރު ފުރިފައިވާ އެއްމާބަނޑު ދެކުދިންގެ އިތުރުން 3 އަހަރު ފުރިފައިވާ އަންހެން ކުއްޖަކު ހުންނައިރު، 11 އަހަރުގެ ފިރިހެން ކުއްޖަކުވެސް އޭނާގެ ހުރެއެވެ.
