2015 ވަނަ އަހަރުގެ ކާމިޔާބު ފިލްމު "ދަމް ލަގާކޭ ހައިޝާ" ކުޅުނުއިރު ބަތަލާ ބޫމީ ޕަޑްނޭކަރަކީ ވަރަށް ފަލަކޮށް ހުރި މީހެކެވެ. އޭގައި އޭނާ ކުޅުނީ ވެސް، ފަލަ އަންހެންކުއްޖެއްގެ ކެރެކްޓާއެކެވެ. އެހެންކަމުން އޭނާ އެ ރޯލަށް ވަރަށް ފިޓުކަން ބެލުންތެރިން ޤަބޫލުކުރެއެވެ.
އެއީ ބޫމީގެ ތައާރަފްވުންވެސް މެއެވެ. އެހެންނަމަވެސް، ފިލްމީ ދާއިރާގައި ކުރިއަށް ދިޔުމަށްޓަކައި ލޫޅާފަތި ހަށިގަނޑެއް ބޭނުންވާނެކަން ޤަބޫލުކޮށް، އެ ފިލްމު އެޅުވިތާ އެންމެ 4 މަސް ތެރޭގައި ބޫމީ ވަނީ 23 ކިލޯ ލުއިކޮށްލާފައެވެ. އަދި އެ ފިލްމަށްފަހު އާންމުންގެ ތެރެއަށް ނުކުތްއިރު ބޫމީ ހުރި ގޮތް ފެނިފައި، ގިނަ ބަޔަކު ތިބީ އާޝޯހުވެފައެވެ. ބޫމީ އެހާ އަވަހަށް ބަރުދަން ލުއިކޮށްލީ ކިހިނެއްތޯ އެނގެން ކެތްމަދުވެފައި ތިބި މީހުންނަށް، އޭނާ ވަނީ އިންސްޓަގްރާމް މެދުވެރިކޮށް އޭނާގެ ދަތުރާ ބެހޭގޮތުން "ލޫޒް އިޓް ލައިކް ބޫމީ" ގެ ނަމުގައި ހިތްވަރުދޭ ސީރީޒެއް ގެނެސްދީފައެވެ. އޭގެން ބޫމީ ވަނީ، ބަރުދަން ލުއިކުރުމަށް އޭނާ ކަންތައްކުރި ގޮތް ކިޔައިދީފައެވެ.
ބަތަލާ ކިޔައިދިން ގޮތުގައި، ބަރުދަން ލުއިކުރާށޭ ކިޔާފައި އޭނާ އެއް އިރެއްގައި ވެސް ކާއެއްޗެއް ނުކައި ބަނޑަށް ހުރެފައެއް ނުވާނެއެވެ. ސަބަބަކީ، ބަރުދަން ލުއިކުރުމުގެ ދަތުރަކީ މީހާ ވަރަށް ހިތްހަމަޖެހިގެން ހުރެ ކުރަންޖެހޭ ކަމަކަށްވެފައި، ކާނާއަކީ ހަށިގަނޑަށް ދިރުން ގެނުވާ މައިގަނޑު އެއްޗަށް ވާތީއެވެ. ބޫމީ ބުނީ އޭނާ ހަރުކަށި ޑައިޓެއްވެސް ފޮލޯކޮށްފައި ނުވާނެ ކަމަށާއި، ކާން ބޭނުންވާ ގިނަ އެއްޗެހި ކަމުންދާ ކަމަށެވެ. އެހެންނަމަވެސް އޭނާ ގެންގުޅުނު އެންމެ މުހިންމު އުކުޅަކީ ބެލެންސްޑް ޑައިޓެއް ފޮލޯކުރުން ކަމަށް ބުންޏެވެ.
My first post,about the fun little things I did to lose weight.. hope you like it and it helps 🙂 #LoseItLikeBhumi https://t.co/9ZSoPDCyQX
— bhumi pednekar (@bhumipednekar) September 23, 2015
މީގެ އިތުރުން ބޫމީ ބުނީ، އޭނާ އެއްކޮށް ދުރުވި ހަމައެކަނި ކާނާގެ ބާވަތަކީ ހަކުރު ކަމަށެވެ. އެގޮތުން ހަކުރު އަޅާފައި ހުރި އެއްޗެހި ކެއުން އެއްކޮށް ހުއްޓައިލި ކަމަށް ބުންޏެވެ. އަދި، ކާބޯހައިޑްރޭޓްސް ނަގާ މިންވަރުވެސް ވަކި ވަރެއްގައި ބެހެއްޓި ކަމަށް ބުންޏެވެ. ކޮންމެ ކެއުމަކަށްފަހު ކަސްރަތު ކުރާ ކަމަށް އޭނާ ބުންޏެވެ. އަދި ކޮންމެ 5 ދުވަހަކުން ޗީޓް މީލެއް ނަގާ ކަމަށް ބުނަމުން ބުނީ، އާންމުކޮށް އުޅޭއިރު އެއްފަހަރާ ގިނައިން ކެއުން އެއްކޮށް ހުއްޓާލި ކަމަށެވެ.
ބޫމީގެ ޑައިޓުގައި ހިމެނޭ އެއްޗެހިވެސް އޭރު އޭނާ ވަނީ އިންސްޓަގްރާމްގައި ހިއްސާކޮށްފައެވެ. އެހެންނަމަވެސް، ޑައިޓީޝަނެއް ނުވަތަ ނިއުޓްރިޝަނިސްޓެއްގެ އެހީ ހޯދާފައި ނުވާނެ ކަމަށާއި، އޭނާއާއެކު ބަރުދަން ލުއިކުރުމުގެ ދަތުރުގައި އެހީވި ހަމަ އެއެކަނި މީހަކީ މަންމަ ކަމުގައި ބުންޏެވެ. ދެން އެހީތެރިވެދިނީ ގޫގްލް ކަމަށް ބުންޏެވެ.
ބޫމީ ބުނީ ހަރަކާތްތެރިވެ އުޅުމުގެ އިތުރަށް، ގޭގައި ކައްކައިގެން ކެއުމަކީ ބަރުދަން ލުއިކުރުމަށް އެހީވެދޭ ކަންކަން ކަމަށެވެ.
