އެމްޑީޕީގެ އާންމު މެމްބަރުންނާއި ޕާޓީއާއި ގުޅުވައި ދިނުމަށްޓަކައި ފާއިތުވެދިޔަ 16 އަހަރު ލިބުނު ފުރުސަތުގެ ބޭނުން ނުކުރެވުނު ބަޔަކަށް ދެން އެކަން ވެދާނެކަމާއިމެދު ސުވާލު އުފެދޭ ކަމުގައި އެމްޑީޕީގެ ޗެއާޕާސަންގެ މަޤާމަށް ވާދަކުރައްވާ އިކޮނޮމިކް މިނިސްޓަރ ފައްޔާޟު އިސްމާއިލް ވިދާޅުވެއްޖެއެވެ.
ޗެއާޕާސަންގެ ކެމްޕެއިންފައި ނ.ކެނދިކުޅުދޫގައި ގިނަ އަދަދެއްގެ އެމްޑީޕީގެ އާންމު މެމްބަރުންނާއިއެކު ބޭއްވި ޖަލްސާގައި ވާހަކަ ދައްކަވަމުން ފައްޔާޟު ވިދާޅުވީ އެމްޑީޕީއަކީ ރާއްޖޭގެ އެތައް ރައްޔިތުންގެ އާންމު މަސްލަހަތާއި ގުޅިފައިވާ ޕާޓީއެއްކަމަށެވެ. އެމްޑީޕީ ހިންގުމުގައި އޮތް މައްސަލަތަކާއި، ޝަކުވާތަކަކީ ހައްލުތަކެއް ލިބެންޖެހޭ މައްސަލަތަކެއް ކަމަށާއި، އެކަން ކުރެވޭނީ އެމްޑީޕީގެ ލީޑަރޝިޕް ހަރުދަނާ ވެގެންކަމަށް ފައްޔާޟު ވިދާޅުވިއެވެ.
ފައްޔާޟު ވިދާޅުވީ މިކެމްޕެންގައި މިހާތަނަށް 60 އަށްވުރެ ގިނަ ރަށްތަކަށް ކެމްޕެއިންގައި ދެވިފައިވާއިރު އެންމެބޮޑު ޝަކުވާއެއް އޮތީ ރަށްރަށުގެ އެމްޑީޕީގެ ޖަގަހަތައް ނުހިނގާކަމުގެ ޝަކުވާ ކަމުގައެވެ. ރަށްތަކުގައި ތިބި އެމްޑީޕީގެ އާންމެ މެމްބަރުންނާއި އެމްޑީޕީގެ ލީޑަރޝިޕާއި ގުޅުން ނެތްކަމުގެ ޝަކުވާ ކަމަށެވެ. މިއަދު ޗެއާޕާސަންގެ މަޤާމަށް އޭނާއާއި ވާދަކުރައްވާ ބޭފުޅާއާއި، އޭނާގެ ޓީމަކީ މިދިޔަ 16 އަހަރު އެމްޑީޕީގެ އާންމު މެމްބަރުންނަށް ޚިދުމަތް ކުރަން ލިބި އެކަން ނުކޮށްދެވުނު ބައެއްކަމަށް ފައްޔާޟު ވިދާޅުވިއެވެ.
އެމްޑީޕީގެ ލީޑަރޝިޕަށް އަނެއްކާވެސް ހަމަ މިބޭފުޅުން އިސްކޮށްގެން އެމްޑީޕީއަށް އަންނާނެ އިތުރު ބަދަލެއް ނުފެންނަ ކަމަށް ފައްޔާޟު ވިދާޅުވިއެވެ. މިކަން ކުރެވޭނީ އޭނާއަށް ކަމަށް ވިދާޅުވެ ފައްޔާޟު ވަނީ އެމްޑީޕީ ހިންގާލުމަށް ފުރުސަތު ދިނުމަށް އެމްޑީޕީގެ އާންމު މެމްބަރުންގެ ކިބައިން އެދިފައެވެ.
ޕާޓީ ނުހިނގާކަން އަޅުގަނޑަށް ވުރެއް ބޮޑަށް ތިޔަބޭފުޅުންނަށް އެނގޭނެ، އަޅުގަނޑު މިދަތުގައި މިހާރުވެސް 60 އަށްވުރެ ގިނަ ރަށްރަށަށް އެރި އިރުގައި އެންމެ ރަށެއްގައިވެސް ޕާޓީ ޖަގަހައެއް ނުހިނގާ. ޕާޓީގެ އާންމު މެމްބަރުންނާއި، ޕާޓީއައި ގުޅުމެއް އޮތްކަމަކަށް ނުވޭ. އަޅުގަނޑު ތިޔަބޭފުޅުންނަށް މިހުށަހަޅަނީ އަޅުގަނޑު އެކަން ބަދަލު ކުރާނަމޭ. އަޅުގަނޑަށް ފުރުސަތު ދެއްވާށޭ އަޅުގަނޑާއި ވާދަކުރައްވާ ބޭފުޅާއާއި އެބޭފުޅާގެ ޓީމަކީ މިދިޔަ 16 އަހަރު ވަންދެން އެކަން ހަވާލުކުރެވިފަ ތިބި ބޭފުޅުން. އެބޭފުޅުންނަސް އޭރު ނުވިކަމެއް މިހާރު ވާނެކަމަށް ގަބޫލުކުފުޅު ކުރުމަކީ އެއީ ތިބޭފުޅުންނަށް އޮތް ހަގެއް.
– ފައްޔާޟު ވިދާޅުވިއެވެ.
އެމްޑީޕީގެ ޗެއާޕާސަންގެ އިންތިޚާބުގެ ކެމްޕެއިންގައި، ފައްޠާޔާޟާއި، އިންތިގެ ޓީމުންގެވެސް އަތޮޅު ތެރޭގައި، ދަނީ ފޯރީގައި ކެމްޕެއިން ކުރަމުންނެވެ. ވާދަވެރިކަން ބޮޑުވެފައިވާ މިކެމެޕެއިންގައި ދެޓީމުންވެސް ދަނީ ބަހުގެ ހަމަލާތައް ބަދަލުކުރަމުންނެވެ.
ޗެއާޕާސަން އިންތިޚާބުގައި މިނިސްޓަރ ފައްޔާޟާއި، އިންތި ވާދަކުރި ނަމަވެސް މިއީ ރައީސް ނަޝީދާއި، ރައީސް ޞާލިހުގެ މެދުގައި ކުރިއަށްދާ އިންތިޚާބެއްގެ ގޮތުގައި ގިނަ ބަޔަކު ދެކެއެވެ. އަދި މިއީ އެމްޑީޕީން އަންނަ އަހަރު ނެރޭނެ ރިޔާސީ ކެނޑިޑޭޓަކު ކަނޑައެޅުމުގައިވެސް ވަރަށް މުހިންމު އިންތިޚާބަކަށް ވެގެންދާނެކަމަށް ގިނަ ބަޔަކު ދެކެއެވެ.
