މޯލްޑިވްސް ސޮސައިޓީ ފޮރ ޕަރފޯމިންގް އާރޓްސް (އެމްއެސްޕީއޭ) އިން ފިލްމު ސްކްރިޕްޓް ލިޔަން ދަސްކޮށްދޭ ވޯރކްޝޮޕެއް އިޢުލާނުކޮށްފިއެވެ.
މިފަދަ ސްކްރިޕްޓް ރައިޓިންގް ވޯކްޝޮޕެއް ބޭއްވުމުގެ މައިގަނޑު ބޭނުމަކީ ރާއްޖޭގެ ފިލްމީ ދާއިރާގައި ހުނަރުވެރި ސްކްރިޕްޓް ރައިޓަރުން މަދުކަމާއެކު ބޮޑަށްް ޒުވާނުން މި ހުނަރުގެ ތެރެއަށް ވެއްދުމަށް ބާރު އެޅުން ކަމަށް އެމްއެސްޕީއޭ އިން ބުނެއެވެ.
މިވޯކްޝޮޕްގައި ކިޔައިވައި ދެއްވާނީ އިންޑިއާގެ ތަޖުރިބާކާރު ފަރާތެއް ކަމަށްވާ ހަރްޝް އާނަންދެވެ. އޭނާ އަކީ އިންޑިއާގެ ނިއު ދިއްލީއަށް ނިސްބަވާ، ކާމިޔާބު އެތައް ފިލްމުތަކެއް ޑައިރެކްޓްކޮށްފައިވާ ހުނަރުވެރި ޑައިރެކްޓަރެކެވެ.
އެމްއެސްޕީއޭ އާއި މިނިސްޓްރީ އޮފް ޔޫތު ސްޕޯރޓްސް އެންޑް ކޮމިއުނިޓީ އެމްޕަވަރމަންޓް ގުޅިގެން މާޗް 10 އިން 23 ގެ ނިޔަލަށް ކުރިއަށް ގެންދާ މި ވޯކްޝޮޕްއަށް އެއްވެސް ފީއެއް ނެގުމަށް ހަމަޖެހިފައިއެއް ނުވެއެވެ.
މި ވޯކްޝޮޕްގައި ބައިވެރިވުމަށް އެދޭ ފޯމާއި ވޯކްޝޮޕްގެ ޤަވާޢިދު، އެމްއެސްޕީއޭގެ ވެބްސައިޓް (އެމްއެސްޕީއޭ ޑޮޓް އެމްވީ) mspa.mv އިން ލިބެން ހުންނާނެކަމަށް އެފަރާތުން މައުލޫމާތު ދެއެވެ.
