ޔޫކުރައިންގައި ތިބި ދަރިވަރުންގެ ރައްކާތެރިކަމަށް ގޮވައިލާ ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓަރ) ހުށަހެޅި މައްސަލަ ބަލަިއ ނުގަނެ މަޖިލީޙުން ބޭރުކޮށްލައިފިއެވެ.

މޮސްޓާ ހުށަހެޅި ކުއްލި މައްސަލަ ބަލައިގަންނަން ވޯޓް ދެއްވީ ހަތް މެންބަރުންނެވެ. މައްސަލަ ބޭރުކޮށްލުމަށް 17 މެންބަރުން ވޯޓް ދެއްވިއެވެ. އެހެންކަމުން ކުއްލި މައްސަލަ އާއިމެދު ބަހުސް ކުރަން ފާސްނުވެ، މައްސަލަ ވަނީ މަޖިލީހުން ބޭރުކޮށްލާފައެވެ.

މޮސްޓާ ހުށަހެޅުއްވި ކުއްލި މައްސަލާގައި ވަނީ ޔޫކުރައިނާއި ރަޝިޔާ އިންވާ ބޯޑަރު ސަރަހައްދަށް ރަޝިޔާގެ ސިފައިން ޖަމާކުރުމުގެ ސަބަބުން ނުތަނަވަސްކަން ބޮޑުވެފައިވާއިރު، ޔޫކުރައިނަށް ރަޝިޔާއިން ވަރަށް އަވަހަށް އަސްކަރީ ހަމަލާއެއް ދީފާނެކަމަށް އެ ޤައުމުގެ ރައީސް ވިދާޅުވެފައިވާ ކަމަށެވެ. އަދި ޔޫކުރައިނަށް ރަޝިޔާއިން ހަމަލާއެއް ދިނުމާއެކު ހަނގުރާމަ ފެށިއްޖެ ހާލަތެއްގައި އެ ޤައުމުން ބޭރުވެ ރައްކާތެރި މަންޒިލަކަށް ދިއުން ދަތިވާނެ ކަމަށްވެސް އޭނާ ވިދާޅުވިއެވެ.

ޔޫކުރެއިނުގެ އެކި ޔުނިވާސިޓީތަކުގައި މިހާރުވެސް ފަންސާހަށްވުރެ ގިނަ ދިވެހި ދަރިވަރުން ތައުލީމު ހާސިލުކުރަމުންދާއިރު، ޔޫކުރައިނުގައި ކިޔަވަމުން އަންނަ ދަރިވަރުން ހަނގުރާމައިގެ ހާލަތުގައި އެ ޤައުމުން ނެރެ ސަލާމަތް މަންޒިލަކަށް ގެންދިއުމަކީ ބޮޑެތި ގޮންޖެހުންތައް ކުރިމަތިވާނެ ކަމެއްކަމަށްވާތީ، އެ ޤައުމުގައި ތިބި ދަރިވަރުން ރައްކާތެރި މަންޒިލަކަށް ގެންދިއުމުގެ މަސައްކަތްކުރުމަށް ޚާރިޖީވަޒީރަށް މިމައްސަލާގައި ގޮވާލާފައިވެއެވެ.

މޮސްޓާ ވިދާޅުވީ މިހާރު އިންޑިއާގައި ވެރިކަންކުރާ ހަރުކަށި ހިންދޫ ވިސްނުމުގެ ފަރާތްތަކާއި ހަރުކަށި ހިންދޫ ޖަމާޢަތްތަކުން، އެ ޤައުމުގެ މުސްލިމުންނަށް ކުރިމަތިކުރަމުންދާ ތުރާތަކުގެ ތެރެއިން އެ ޤައުމުގެ ސުކޫލުތަކާއި ކޮލެޖުތަކާއި ޔުނިވާސިޓީތަކުގައި ކިޔަވާ މުސްލިމު އަންހެންކުދިންނަށް ބުރުގާ ނަގަން މަޖުބޫރުކުރުވައި، އެ ކުދިންނާ ދިމާކޮށް ފުރައްސާރަކޮށް މައްލަވަކޮށް ދަތިކުރަމުން އަންނަ ކަމަށެވެ.

އިންޑިއާގައި ދިވެހިން ގިނަ އަދަދަކަށް ދިވެހިން ކިޔަވަމުން އަންނައިރު، އޭގެ ތެރޭގައި ބުރުގާއަޅާ އަންހެން ކުދިން ހިމެނޭތީ އެ ކުދިންނަށް ހިންދޫ ވިސްނުމުގެ ހަރުކަށި މީހުންނާއި އިންޑިއާގެ ވެރިކަން ކުރާ ބީޖޭޕީން ގެންގުޅޭ ވިސްނުމުގެ ތުރާއާއި ދަތިތައް އެކުދިންނަށް ކުރިމަތިވުމުގެ ފުރުސަތު އޮތުމާއެކު އެކުދިންގެ ހައްގުތައް ރައްކާތެރިކުރުމަށް ކުރެވެން ހުރި ހުރިހާ މަސައްކަތްތަކެއް ކުރަންޖެހޭ ކަމަށެވެ.