ބޮލީވުޑްގެ ތަރިންނަކީ އެމީހުންގެ އަމިއްލަ ދިރިއުޅުމާ ގުޅޭގޮތުން އެއްވެސް ވަރަކަށް އާންމުންނަށް އެގެން ބޭނުންވާ ބައެއްނޫނެވެ. ނަމަވެސް ކޮންމެވެސް ގޮތަކުން އެމީހުންގެ ދިރިއުޅުމުގެ ވާހަކަތަށް އޮންނަނީ ލީކު ވެފައެވެ.
އެގޮތުން ބޮލީވުޑްގެ ތަރި ލާރާ ދައްތާ މިވަނީ އޭނާ އެކުގައި މަސައްކަތް ކުރި ބައެއް ތަރިންނާ ބެހޭގޮތުން ވާހަކަ ދައްކާފައެވެ. ލާރާ އަކީ ގިނަ ތަރިން ތަކަކާއެކު މަސައްކަތް ކޮށްފައިވާ ތަރިއެކެވެ.
ލާރާގެ ކުރިއަށް އޮތް ވެބް ޝޯވ "ކޯން ބަނޭގީ ޝިކާރަވަތީ"ގެ ޕްރޮމޯޝަންގައި ވާހަކަ ދައްކަމުން ލާރާ ބުނެފައިވަނީ މިއަދާ ހަމައަށް ވެސް ސަލްމާން އޭނާއަށް ގުޅަންޖެހިއްޖެ ނަމަ ގުޅަނީ ދަންވަރަށް ކަމަށެވެ. އަދި އެންމެ ކުރީން ސުރެވެސް އެއީ ސަލްމާންގެ ބަދަލު ނުވާ އާދައެއް ކަމަށްވެސް ލާރާ ބުނެފައިވެއެވެ. އެއީ ސަލްމާން ހޭލާނީ ދަންވަރު ކަމަށާއި އޭނާގެ ފޯންކޯލްތައްވެސް އަންނާނީ އެގަޑީގައި ކަމަށް ލާރާ ވަނީ ބުނެފައެވެ.
ސަލްމާނާއެކު ލާރާ ވަނީ 2005 ވަނަ އަހަރު "ނޯ އެންޓްރީ" އިން ފެނިގެން ގޮސްފައެވެ.
އަކްޝޭ އާއި ބެހޭގޮތުން ވާހަކަ ދައްކަމުން އޭނާ ބުނެފައިވަނީ އަކްޝޭ އަކީ އެންމެންނަށް ވުރެ ކުރިން ހޭލާ މީހެއް ކަމަށެވެ. މިއީ ބޮލީވުޑްގެ ގިނަ ބަޔަކު އިއްތިފާގުވާ ވާހަކައެކެވެ.
އަކްޝޭ ކުމާރާއެކު އޭނާ ވަނީ 2003 ވަނަ އަހަރު "އަންދާޒް" އިން ފެނިގެން ގޮސްފައެވެ. އެއީ އޭނާ ބޮލީވުޑަށް ތައާރަފްވި ފިލްމު ވެސްމެއެވެ.
އެންމެ ފަހުންވެސް އޭނާ ބޮޑުސްކްރީނުން ފެނިގެން ދިއައީ އަކްޝޭއާ އެކުގައެވެ. އެއީ މިދިއަ އަހަރުގެ ފިލްމު "ބެލްބޮޓަމް" އިންނެވެ.
