ރާއްޖޭގައިތިބި އިންޑިއާގެ ސިފައިން ޖެހޭނީ ރާއްޖެއިން ފައިބަން ކަމަށާއި، އަދި ޔޫޓީއެފް އެއްބަސްވުންވެސް ޖެހޭނީ ކެންސަލް ކުރަން ކަމުގައި އިދިކޮޅު ޕީއެންސީގެ ނައިބް ރައީސް މުހައްމަދު ސައީދު ވިދާޅުވެއްޖެއެވެ.
އިދިކޮޅު ޕީޕީއެމް ޕީއެންސީން ހިންގާ "އިންޑިއާ އައުޓް" ހަރަކާތް މިހާރު އަމާޒުކޮށްލާފައި އޮތީ ރާއްޖޭގައި ދިރިއުޅެމުންދާ އަދި މަސައްކަތް ކުރަމުންދާ އިންޑިއާގެ ޚިދުމަތްތެރިންނާއި ދިމާއަށް ކަމަށް އެމްޑީޕީގެ ޗެއާޕާސަން ހަސަން ލަތީފް ވިދާޅުވެ ދެއްކެވި ވާހަކަތާއި ގުޅިގެން ސައީދު ވިދާޅުވީ އަދިވެސް އެމްޑީޕީން ހީކުރަނީ ރައްޔިތުން ގުނބޯ ހައްދައިގެން ކަންކަން ހާސިލް ކުރެވިދާނެކަމުގައެވެ.
ނަމަވެސް މިއަދު ދިވެހި ރައްޔިތުން ތިބީ ވަރަށް ބޮޑަށް ހޭލާ ކަމަށާއި، ރާއްޖޭގައި ތިބި އިންޑިއާ ސިފައިންޖެހޭ ފައިބަން ކަމަށެވެ. އަދި އަޑި ނޭގޭގޮތަށް ހަދާފައިވާ އުތުރު ތިލަފަޅުގެ އެއްބަސްވުންވެސް ޖެހޭނި ބާތިލް ކުތަންކަމަށް ސައީދު ވިދާޅުވިއެވެ.
އެމްޑީޕީގެ އިސްވެރިންނަށް އަދިވެސް މިހީވަނީ ބޭނުން ގޮތަކަށް ގުނބޯ ހެއްދިދާނެކަމަށް! އިންޑިއާ ސިފައިން ޖެހޭނީ ފައިބަން. ޔޫޓީއެފް ޖެހޭނީ ކެންސަލް ކުރަން. 64 ގޮޑި މަދީތޯ މާބޮޑަށް ހާސްވަނީ.
– ހަސަން ޓެގް ކުރައްވައި ސައީދު ކުރެއްވި ޓުވީޓުގައި ވިދާޅުވިއެވެ.
އިންޑިއާ ސިފައިން ރާއްޖޭގައި ތިބީ އެމްއެންޑީއެފްއަށް އެ ގައުމުން ހަދިޔާކޮށްފައިވާ ތިން އުޅަނދެއް ބަލަހައްޓާށެވެ. އެއީ ލ. ކައްދޫގައި އޮތް ހެލިކޮޕްޓަރަކާއި، އައްޑޫ ސިޓީ ގަމުގައި އޮތް ހެލިކޮޕްޓަރަކާއި، ހދ. ހަނިމާދޫގައި އޮތް ޑޯނިއާ މަތިންދާބޯޓެކެވެ. މިއިން ކޮންމެ އުޅަނދަކަށް 25 ސިފައިންގެ މަގުން ޖުމުލަ 75 ސިފައިން ރާއްޖޭގައި އެބަ ތިއްބެވެ.
ރާއްޖޭގައިތިބި އިންޑިއާ ސިފައިން ރާއްޖެއިން ބޭލުމަށް އިދިކޮޅު ކޯލިޝަނުން ހިންގަމުންދާ ކެމްޕެއިންގައި ގޭގޭގެ ފާރުތަކުގައިވެސް އިންޑިއާ އައުޓް ޖެހުމަށް ރައީސް ޔާމީން ވަނީ ގޮވާލާފައެވެ.
