ރާއްޖޭގައި އޮތް އިސްލާމީ ވަހުދަތާއި، އިސްލާމީ ނޫރު ދިވެހިންގެ ހިތްތަކުން ފަނޑުކޮށް ނުލެވޭނެކަމަށް ނައިބް ރައީސް ފައިސަލް ނަސީމް ވިދާޅުވެއްޖެއެވެ.

34 ވަނަ ޤައުމީ ޤައުރުއާން މުބާރާތް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނައިބް ރައީސް ފައިސަލް ނަސީމް ވިދާޅުވީ ކީރިތި ޤުރުއާނަށް ލޯބިޖެއްސުމާއި، ޤުރުއާނުގެ އިލްމު އުގަންނައި ދިނުމަކީ މިސަރުކާރުން ޚާއްސަ އިސްކަމެއް ދީގެން ކުރާ މަސައްކަތެއްކަމަށެވެ. ކީރިތި ޤުރުއާނާއި ބެހޭ މަރުކަޒާއި، އިސްލާމިކް މިނިސްޓްރީއާއި ގުޅިގެން ގުރުއާނަށް ލޯބި ޖެއްސުމަށް ގިނަ މަސައްކަތްތަކެއް ކުރެވެމުންދާކަމަށް ނައިބް ރައީސް ވިދާޅުވިއެވެ.

އެމަނިކުފާނު ވިދާޅުވީ ރާއްޖޭގައި ޒަމާނުއްސުރެއް އޮތް އިސްލާމްދީނުގެ ވަހުދަތަކީ އެކަކު ދެމީހަކު ވާހަކަދައިގެން ފޮހެލެވޭނެ ކަމެއް ނޫންކަމަށެވެ. ދިވެހިންގެ ހިތްތަކުގައި އިސްލާމީ ނޫރު އޮތީ އެޔަށްވުރެއް މާވަރުގަދަޔަށް ބިންވަޅު ނެގިފައިކަމަށާއި، މިފަސްގަނޑު އިސްލާމީ ވަހުދަތު ފޮހެލުމަކީ ކުރެވޭނެ ކަމެއްނޫންކަމަށް ނައިބް ރައީސް ވިދާޅުވިއެވެ.

ނަމަވެސް ޒަމާނައަށް އަންނަ ބަދަލުތަކާއި، މުޖުތަމައަށް އަންނަ ބަދަލުތަކާއިއެކު އިސްލާމީ ނޫރު ވަރުގަދަ ކުރުމުގެ މަސައްކަތް ތައުލީމީ މަރުހަލާއިން ޚާއްސަ އިސްކަމެއް ދީގެން ކުރަން ޖެހޭކަމަށް ނައިބް ރައީސް ވިދާޅުވިއެވެ. އަދި ޚާއްސަކޮށް ކަންކަމުގައި ކާމިޔާބާއި ހަމައަށް ވާސިލް ވެވޭނީ އެންމެން ގުޅިގެން ކަމަށާއި، ބައިބައިވެ ނުތަނަވަސްކަން އުފައްދައިގެން އެއްވެސް ކަމެއްގައި ކާމިޔާބަކާއި ހަމައަށް ވާސިލް ނުވެވޭނެކަމަށެވެ.

ތަރައްޤީއާއިއެކު ކުރަންޖެހޭ އަދި ކުރަމުންދާ އެންމެ ބޮޑު އެއް މަސައްކަތަކީ މީހުން އުފެއްދުން ކަމަށާއި، ތައުލީމީ ގާބިލް ޒުވާން ޖީލެއް ބިނާ ކުުރުމަކީ ސަރުކާރުން އެންމެ ބޮޑު އިސްކަމެއް ދެއްވާ އެއްކަންތައް ކަމުގައި ނައިބް ރައީސް ވިދާޅުވިއެވެ. މިސަރުކާރުން ޚާއްސަކޮށް ރައީސް ޞާލިހުގެ ސީދާ ބެއްލެވުމުގެ ދަށުން ތައުލީމީ އެތަކެއް ފުރުސަތުތަކެއް ތަޢާރަފްކޮށް، ދިވެހިންގެ ޤާބިލްކަން އިތުރު ކުރުމަށް އެތައް މަސައްކަތެއް ކުރަމުންދާކަމަށް ނައިބް ރައީސް ވިދާޅުވިއެވެ.

34 ވަނަ ޤައުމީ ޤުރުއާން މުބާރާތުގައި މިއަހަރު އޮންލައިންކޮށް ކުރިއަށްގެންދިޔުމަށް ނިންމާފައިވާއިރު ބަލައިގެން ކިޔަވާ ބައިގައި ބައިވެރިވާ ފަރާތްތަކަށް ވީޑިއޯ ހުށައެޅުމަށް ހުޅުވާލާނީ ނޮވެމްބަރު މަހުގެ 15 އިން 28 ވަނަ ދުވަހުގެ ނިޔަލެށެވެ. އަދި ނުބަލައި ކިޔެވުމުގެ ބައި ވަގުތުން ސުވާލުކޮށްގެން ކުރިއަށް ގެންދިޔުމަށް ނިންމާފައިވާތީ އެބައި ކުރިއަށްގެންދަނީ ޑިސެމްބަރުމަހުގެ 19 އިން 25 ވަނަ ދުވަހަށް ކަމަށް ކީރިތި ޤުރުއާނާ ބެހޭ ޤައުމީ މަރުކަޒުން ވިދާޅުވެއެވެ.

މިމުބާރާތުގައިވެސް ކޮންމެ ބަޔަކުން އެއްވަނަ، ދެވަނަ އަދި ތިންވަނަ ހޮވުމަށް ވަނީ ހަމަޖެހިފައެވެ. މީގެ އިތުރަށް މުޅި މުބާރާތުން އެއްވަނަ، ދެވަނަ ތިންވަނަ ހޮވުމުގެ އިތުރުން ރައީސުލްޖުމްހޫރިއްޔާ ދެއްވާ ޚާއްސަ އިނާމް ދިނުމަށްވެސް ވަނީ ހަމަޖެހިފައެވެ. ކީރިތި ޤުރްއާން ކިޔެވުމުގެ ޤައުމީ މުބާރާތަކީ 1981 ވަނަ އަހަރުން ފެށިގެން ސަރުކާރުން ބާއްވަމުން އަންނަ މުބާރާތެކެވެ.