ރައީސުލްޖުމްހޫރިއްޔާގެ ރަސްމީ ގެކޮޅު ކަމަށްވާ މުލިއާގެ ސަރަހައްދު ބަންދު ކޮށްގެން ފުލުހުން ހަރަކާތްތެރިވުމަށްފު އެސަރަހައްދު ހުޅުވާލައިފިއެވެ.
ފުލުހުންގެ މީޑިއާ އޮފިޝަލް ވިދާޅުވީ މުލިއާގެ ސަރަހައްދުގައި ގޮތްނޭގޭ ފޮއްޓެއް ހުރުމުން، އެސަރަހައްދުގައި ސަލާމަތީ ބާރުތަކުން ހަރަކާތްތެރިވިކަމަށެވެ. ނަމަވެސް އޭގައި އެއްވެސް ނުރައްކަލެއް ނެތުމުން ފުލުހުން ވަނީ އެސަރަހައްދު ގިނަ އިރުތަކެއްނުވެ ހުޅުވާލާފައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދިރިއުޅުއްވާ ރަސްމީ ގެކޮޅު، މުލިއާގެއަށް ޙަމަލާދޭނެކަމަށްބުނެ ދެމީހަކު މިއަހަރުގެ ޖުލައި މަހުގެ ތެރޭގައިވެސް އެސަރަހައްދުގައި ފޮއްޓެއް ބަހައްޓައިގެން ބިރުދައްކާފައިވެއެވެ. އެންމެފުރަތަމަ އެދެމީހުން ހިފެހެއްޓީ މުލިއާގެ ސަލާމަތީ ކަންކަން ބަލަހައްޓަން ތިބި ސިފައިންނެވެ. އަދި ވަގުތުން ފުލުހުންގެ ޚާއްސަ ޓީމެއް ވަނީ އެސަރަހައްދަށް އެމީހުން ގެންގުޅުނު ފޮށިގަނޑާއި އެމީހުން ބަލައި ފާސްކޮށް ދެމީހުން ހައްޔަރުކޮށްފައެވެ.
މުލިއާއެގެ ހުންނަ ސަރަހައްދަކީ ގްރީން ޒޯން ހިމެނޭ ސަރަހައްދަކަށްވުމުން އެސަރަހައްދުގެ ސަލަމާތީ ކަންކަން ބަލަހައްޓަމުންދަނީ ސިފައިންނެވެ.
