"މަޒްލޫމް"ގެ ދަށުން ސިލްސިލާކޮށް ކުރު ފިލްމް ތަކެއް ގެެނެސްދިން ސްޓޫޑިއޯ ކަޒްމިކް އިންޓަނޭޝަނަލް އިން ފީޗާ ފިލްމެއް ހެދުމުގެ މަސައްކަތް ފަށައިފިއެވެ.
"ޖޯޑެއްގެ ސާފު ލޯބި"ގެ ނަމުގައި ނެރުމަށް ހަމަޖެހިފައިވާ މި ފިލްމުގެ ޕްރޮޑިުސަރަކީ އާސިމް އަލީއެވެ. މިމަހުގެ 16 ވަނަ ދުވަހު، ކަޒްމިކް އިންޓަނޭޝަނަލްގެ އިންސްޓަގްރާމްގައި އެކަން ހާމަކޮށްފައިވާއިރު، ފިލްމުގެ ޑައިރެކްޓަރަކީ ބެލުންތެރިންގެ އިތުބާރު ހޯދި އިލްޔާސް ވަޙީދު (އިއްލެ) އެވެ. އޭނަގެ ފުރަތަމަ ފީޗާ ފިލްމު، އަދި 2019 ވަނަ އަހަރުގެ ކާމިޔާބު އެއް ފިލްމު "ބަވަތި" އަކީ ވެސް އާސިމް ޕްރޮޑިއުސަރެއްގެ ގޮތުގައި ހިއްސާވި ފިލްމެކެވެ.
"ޖޯޑެއްގެ ސާފު ލޯބި" އާއި ގުޅޭ މާގިނަ މައުލޫމާތު އަދި މިހާތަނަށް ހިއްސާ ނުކުރި ކަމުގައި ވިޔަސް މި ފިލްމުގެ ކާސްޓް ވަރަށް އަވަހަށް އިއުލާން ކުރާނެއެވެ.
View this post on Instagram
ކަޒްމިކްގެ ފުރަތަމަ ފީޗަރ ފިލްމު އިޢުލާނު ކުރިއިރު، ކަޒްމިކުން ވަނީ އިއްލެ އާއި ގުޅިގެން ”މަޒްލޫމް“ގެ ނަމުގައި ކުރު ފިލްމުތަކެއްވެސް ގެނެސްދީފައެވެ.
މިހާތަނަށް ”މަޒްލޫމް“ ގެ 3 ބައި ގެނެސްދީފައިވާއިރު، މިހާރު ބެލުންތެރިން އިންތިޒާރު ކުރަމުން ދަނީ އޭގެ 4 ވަނަ ބައި ނުވަތަ ފަހު ބައި ”ހިންތަ“ ނެރޭނެ ދުވަހަކަށެވެ.
