މާލެ ސިޓީ ކައުންސިލުން، އެކައުންސިލްގެ ލޯގޯ ރީބްރޭންޑް ކުރުމުން ރައްޔިތުންގެ މަަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަންގެ ފާޑުކިޔުން މާލެ ސިޓީ ކައުންސިލަށް އަމާޒު ވެއްޖެއެވެ.

މާލެ ސިޓީ ކައުންސިލް ރީބްރޭންޑް ކޮށްފައި ވަނީ ސިޓީ ކައުންސިލްގެ ހަތަރު ވަނަ ދައުރަށް ހަ މަސް ފުރުމާއި ގުޅިގެން ރޭ ބޭއްވި ހާއްސަ ޖަލްސާއެއްގަ އެވެ. މި ޖަލްސާގައި ކައުންސިލްގެ އާ ލޯގޯ، ދިދަ އަދި އާ ޔުނިފޯމެއް ވަނީ ތައާރަފު ކޮށްފައެވެ.

ރޭ ރީބްރޭންޑް ކުރި ލޯގޯއަށް ވެރިކަންކުރާ އެމްޑީޕީގެ މެމްބަރުންގެ ބަހުގެ ހަމަލާތައް ވަނީ އަމާޒުވެފައެވެ. ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ވިދާޅުވީ މާލެ ސިޓީ ކައުންސިލުން ލޯގޯ ބަދަލު ކުރުމަކީ ދެން އަންނަ ކޮންމެ ކައުންސިލަކުން ލޯގޯއާއި ދިދަ އަދި ކުލަވެސް ބަދަލު ކުރުމުގެ ފެށުންކަމަށެވެ. މިފަދަ ކަންކަން ކައުންސިލުން ކުރަނީ ކުރާގެ މަސައްކަތެއް ނޭގުމުން ކަމަށް އިކްރާމް ވިދާޅުވިއެވެ.

ކައުންސިލަށް ހޮވޭ ކޮންމެ ބަޔަކު އައިސް ލޯގޯ ބަދަލުކުރުމުގެ ސަޤާފަތެއްގެ ފެށުން. އުފެއްދުންތެރި މަސައްކަތެއް ނުކުރެވި، ކަމެއް ކުރަން ނޭގުނީމަ ކުރެވޭނީ މިކަހަލަ ކަންކަން.

– އިކްރާމް ވިދާޅުވިއެވެ.

މާލެ ސިޓީ ކައުންސިލްގެ ލޯގޯ ބަދަލު ކުރުމާއި ގުޅިގެން މެމްބަރު ވަހީދު ވިދާޅުވީ މާލެ ސިޓީ ކައުންސިލުން މީގެ ކުރިން ފެނިގެންދިޔަ ހުކުރު މިސްކިތުގެ މުންނާރު ގެއްލުވާލައި، ހަމައެކަނި ޕީޕީއެމްގެ ކުލަވަރު ފެންނަ ގޮތަށް ލޯގޯއެއް ފަރުމާކޮށް ނެރުމަކީ ޖޯކެއްކަމަށެވެ. މިފަދަ ބަދަލުތައް ގެންނަނީ އިހަށްވުރެ ފުރިހަމައަށް ކަންކަން ކުރުމަށް ކަމަށާއި، ނަމަވެސް އެކަން މިލޯގޯއަކުން ނުފްނެނަ ކަމަށެވެ.

ލޯގޯ، ނިޝާން އަދި ނަންނަމަކީވެސް ބަދަލުކުރެވޭ ތަކެތި. އެކަމު ގެނެވޭ ބަދަލު އިހަށްވުރެ ފުރިހަމަވުމަކީ މުހިންމު ކަމެއް. މާލެއާއި މުޅި ރާއްޖޭގެ ތަރިކައާއި ޘަޤާފަތާއި ދީން ރަމްޒުކޮށްދޭ ‘ހުކުރު މިސްކިތު މުންނާރު’ ފުހެލާފައި ހަމައެކަނި ޕީޕީއެމް/ޕީއެންސީ ކުލަވަރު ނެރެން އުޅުމަކީ ޖޯކެއް. https://t.co/wiEc9JJDRC

— Waddey (@waddey_) November 27, 2021

ސިޓީ ކައުންސިލްގެ އާ ލޯގޯ އިން ރަމްޒު ކޮށްދެނީ މާލެ ސިޓީގައި ހިމެނޭ ހަ އަވަށެވެ. ސިޓީ ކައުންސިލުން ބުނީ ލޯގޯގެ މެދުން މާލޭގެ ހަތަރު އަވަށް ކަމަށްވާ ހެންވޭރު، މާފަންނު، ގަލޮޅު އަދި މައްޗަންގޮޅި ރަމްޒުކޮށްދޭނެ ކަމަށެވެ. އަދި ދެފަރާތުން ރަމްޒުކޮށްދެނީ ވިލިމާލެ އާއި ހުޅުމާލެ ކަމަށެވެ.

އާ ލޯގޯގެ މެދުގައި ބޭނުންކޮށްފައި ވަނީ މާލޭގަ ހަތަރު އަވަށުގެ ކުލަތަކެވެ. އަދި ދެ ފަރާތުގައި ވިލިމާލެ އަދި ހުޅުމާލެ ރަމްޒު ކޮށްދޭ ކުލަތަކެވެ. މި ކުލަތައް އެކުލަވައިލަން ބޭނުންކޮށްފައި ވަނީ އިހުޒަމާނުގެ ވެރިކަމުގެ ސިއްކައިގެ ފަރުމާގައި ބޭނުންކޮށްފައިވާ ދުވާ ރޮނގެެއް ކަމަށް ކައުންސިލުން ބުންޏެވެ.

ސިޓީ ކައުންސިލުން ބުނިގޮތުގައި އާ ލޯގޯ ފަރުމާކޮށްފައި ވަނީ ދިވެހި ވެރިކަމުގެ ނިޝާން އަސްލެއް ކަމުގައި ބަލައިގެނެވެ. ކައުންސިލްގެ ތަސައްވުރަކީ ކައުންސިލްގެ ހުރިހާ ޕްލެޓްފޯމެއްގައި މާލެ ސިޓީގެ ހަ އަވަށް ރަމްޒުކޮށްދޭނެ ނިޝާނެއް ފަރުމާ ކުރުން ކަމަށެވެ.