ކޯވިޑާއި ގުޅިގެން ރާއްޖޭގެ ބޯޑަރުތައް އަނެއްކާވެސް ބަންދުކުރުމަކީ  ގެއްލުންބޮޑު ވިސްނުމެއްކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ، ކޯވިޑުގެ އައު ވޭރިއަންޓް 'އޮމަކްރޯން’އާއި ގުޅިގެން ރާއްޖެއިން އަޅާނެ ފިޔަވަލުތަކައި ގުޅޭގޮތުން ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ)ގެ ޓެކްނިކަލް އެޑްވައިޒަރީ ގްރޫޕުން މަޝްވަރާކުރުމަށް ނިންމާފައިވާކަމަށް ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވެފައިވަނިކޮށެވެ.

އައު ވޭރިއަންޓައި ގުޅިގެން ރާއްޖެއިން ފިޔަވަޅުތަކެއް އެޅުމަށް ވިސްނަމުންދާތީ އެކަމުގެ ކަންބޮޑުވުން ފާޅުކުރައްވާ އެއްމޑީޕީގެ ޤައުމީ މަޖިލީހުގެ ވަޓްސްއަޕް ގްރޫޕަށް ރައީސް ނަޝީދު ފޮނުއްވި މެސެޖުގައި ވިދާޅުވެފައިވަނީ، ކޯވިޑާއި އެކު އުޅުން ނޫންގޮތެއް މިހާރު ނެތްކަމަށެވެ. އެހެންކަމުން ބޯޑަރުތައް އަނެއްކާވެސް ބަންދުކުރުމަކީ ގެއްލުން ބޮޑު ވިސްނުމެއްކަމަށް ރައީސް ނަޝީދު ވިދާޅުވިއެވެ.

އަނެއްކާ ރާއްޖެ ބަންދުކުރުމުގެ ވިސްނުން ވާނީ ވަރަށް ގެއްލުން ބޮޑު ވިސްނުމަކަށް.. ކޯވިޑާއެކު އުޅުން ނޫންގޮތެއް ނެތް…

– ރައީސް މުޙައްމަދު ނަޝީދު

ނަޝީދު މިހެން ވިދާޅުވެފައިވާއިރު ކޯވިޑްގެ އައު ވޭރިއަންޓް 'އޮމަކްރޯން' އާއި ގުޅިގެން ޤައުމުތަކުން ދަނީ މިހާރު ފޔަވަޅުތައް އަޅަމުންނެވެ. އެގޮތުން ބައެއް ޤައުމުތަކުގެ ބޯޑަރުތައްވެސް ބަންދުކުރަމުން އެބަދެއެވެ.

ރާއްޖެއަށްވެސް މި ވޭރިއަންޓް އައިސްފާނެތީ ދުރާލާ ފިޔަވަޅުއެޅުމަށް މިއަދު ޓެކްނިކަލް އެޑްވައިޒަރީ ގްރޫޕްގެ ބައްދަލުވުމެއް ބާއްވާ އަޅާނެ ފިޔަވަޅުތައް ނިންމާނެއެވެ.

ކޯވިޑު އައު ވޭރިއަންޓު ފެނުނުކަން ދުނިޔޭގެ ސިއްޙަތު ޖަމީއްޔާއަށް އަންގާފައިވަނީ މިދިޔަ ބުރާސްފަތި ދުވަހުއެވެ. މި ވޭރިއަންޓަކީ ކަންބޮޑުވާންޖެހޭ އެއްޗެއް ގޮތުގައި ބަލައި، މި ވޭރިއަންޓަށް އޮމަކްރޯންގެ ނަމުން އެ ޖަމީއްޔާއިން ވަނީ ނަންދީފައެވެ.

އައު ވޭރިއަންޓާއި ގުޅިގެން ރާއްޖެއިން އަޅާނެ ފިޔަވަޅުތަކާއި ގުޅޭގޮތުން ރައީސް އިބްރާހީމް މުޙައްމަދު ޞާލިޙް ވިދާޅުވީ، އައު ވޭރިއަންޓައި ގުޅިގެން ރާއްޖެއިން އަޅާނެ ފިޔަވަޅުތައް ޓެކްނިކަލް އެޑްވައިޒަރީ ގްރޫޕުގެ މަޝްވަރާގެ މަތިން ނިންމަވާނެކަމަށެވެ. ރައީސް ވަނީ އައު ވޭރިއަންޓަކީ ވަރަށް ބޮޑު ކަންބޮޑުވުމެއްކަމަށެވެ.

މިވޭރިއެންޓް މިހާތަނަށް އައިއިރު ސައުތު އެފްރިކާގެ އިތުރުން ބޮޓްސުވާން، ހޮންގކޮންގ އަދި ބެލްޖިއަމްއިންވަނީ ފެނިފައެވެ.

މިހާތަނަށް ފެނިފައިވާ ކޯވިޑް19ގެ ވޭރިއެންޓުތަކާއ އަޅާބަލާއިރު އެތައް ގުނައެއް ނުރައްކާތެރިކަން ބޮޑު، ގައިންގަޔަށް ފެތުރުމުގެ ގާބިލްކަންވެސް އެތައް ގުނައެއް އިތުރަށް ލިބިގެންގޮސްފައިވާ ކޯވިޑް19ގެ މި ވޭރިއެންޓް އެންމެ ފުރަތަމަ ސައުތު އެފްރިކާއިން ފެނި، އަދި މިހާރު ދުނިޔޭގެ ގައުމުތަކަށް ފެތުރެން ފަށާފައި ވާއިރު މިވޭރިއެންޓްގެ އަސްލު ދެނެގަތުމަށް ދުނިޔޭގެ ސިއްޙަތުޖަމިއްޔާގެ ތަޖުރިބާކާރުން މިހާރުވަނީ މަސައްކަތް ފަށާފައެވެ.

އަދި މިފަހްތާގެ ހުކުރުދުވަހު ދުނިޔޭގެ ސިއްޙަތު ޖަމިއްޔާގެ ތަޖުރިބާކާރުން ބައްދަކޮށް ވަނީ، މިއީ ދުނިޔޭގެ ގައުމުތަކުން "ކަންބޮޑުވާން ޖެހޭ މިންވަރުގެ" ނުރައްކާތެރި ވޭރިއެންޓެއް ކަމުގައި ނިންމާފައެވެ. މީގެއިތުރުން ޑަބްލިއުއެޗްއޯއިންވަނީ "އޮމިކްރޯން"ގެ ނަމުން މިވޭރިއެއެންޓަށް ނަންދީފައެވެ.

ސައުތު އެފްރިކާއިން މި ފެނުނު ކޯވިޑް19ގެ އާ ވޭރިއެންޓްގެ ނުރައްކާތެރިކަން އިހުސާސްވެ، ވޭރިއެންޓް ދުނިޔޭގެ ގައުމުތަކަށް ފެތުރެން ފެށީތާ މަދު ދުވަސްކޮޅެއްގެ ތެރޭގައި ދުނިޔޭގެ ގައުމުތަކުގައި މިވަނީ އިންތިހާއަށް ބިރުބެރިކަން ފެތުރެން ފަށާފައެވެ. އަދި ގިނަ ގައުމުތަކުން މިހާރުވެސް ވަނީ ވޭރިއެންޓް ފެތުރެން ފަށާފައިވާ ގައުމުތަކުން އެގައުމަތަށް މީހުން ވަނުން މަނާކޮށް ބޯޑަރުތައް ބަންދު ކުރަންވެސް ފަށާފައެވެ.