ފައިސާ ޗާޕްކުރުމަކީ އިޤްތިޞާދަށް އޮތް އެންމެ ރަނގަޅު ގޮތެއްނޫންކަމަށް މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަައުދުﷲ އަހުމަދު ވިދާޅުވެއްޖެއެވެ.
ސަޢުދު މިހެން މިވިދާޅުވީ، ދައުލަތުގެ ޚަރަދުތައް ހަމަޖެއްސުމަށް އިތުރަށް ފައިސާ ޗާޕްކުރުމުގެ ހުއްދައަށް ސަރުކާރުން މަޖިލީހުގައި އެދިފައިވަނިކޮށެވެ. ފައިސާ ޗާޕްކުރާ މައްސަލަގައި ގިނަ ބައެއްގެ ފާޑުކިޔުން ސަރުކާރަށް އަމާޒުވެފައިވެއެވެ.
ސަޢުދު ވިދާޅުވި، ފައިސާ ޕްރިންޓް ނުކޮށް ޤައުމު ހިންގޭނީ އަމިއްލަ ފައިމައްޗަށް ތެދުވެވޭ އިޤްތިޞާދެއް ބައްޓަން ކުރެވިގެންކަމަށް. ނޫނީ އެކަން ނުކުރާނެ ސަރުކާރެއް ނުފެންނާނެކަމަށާއި، އިޤްތިޞާދީ ގޮތުން މުޅި ދުނިޔެ އޮތީ ނުރައްކަލުގައިކަމަށްވެސް ސަޢުދު ވިދާޅުވިއެވެ.
Fiasaa print kurumakee Economy ah oih enme Rangalhu gothehnoon.Faisaa print nukoh qaumu hingeynee Amihla faimahchah thedhuvey iguthisaadh eh battan kurevigen noonee mikan nukuraane sarukaareh nufehnaane.Iguthisaadhee gothun mulhi dhuniye othee nurahkaluga.@KhabaruOnline
— Saudulla Ahmed (@saudullaahmed1) November 23, 2021
ކޯވިޑާއި ގުޅިގެން ރާއްޖޭގެ އިޤްތިޞާދު ހީނަރުވެ ސަރުކާރުން މިހާތަަނަށް ވަނީ ދެފަހަރެއްގެ މަތިން ފައިސާ ޗާޕްކޮށްފައެވެ. އަދި މިހާރު ތިންވަނަ ފަހަރަށް ފައިސާ ޗާޕްކުރަން އެދުމުން މަޖިލީހުގެ މާލިއްޔަތު ކޮމިޓީން ވަނީ އެ ހުއްދަ ދޭން ފެންނަކަމަށް ފާސްކޮށްފައެވެ.
މިކަމާއި ގުޅޭގޮތުން މާލިއްޔަތު ކޮމިޓީގެ މުޤައްރިރު މުޙައްމަދު ނާޝިޒް ވިދާޅުވެފައިވަނީ، މިއީ އިގްތިސާދީ ގޮތުން ގޮންޖެހުން ގިނަ ވަގުތެއްކަމަށެވެ. އެގޮތުން އޮތް ގޮތަކީ ފައިސާ ޗާޕްކުރުން ނުވަތަ ޤައުމު ބަނގުރޫޓްވުންކަމަށް އޭނާ ވިދާޅުވިއެވެ. އޭނާ ވިދާޅުވީ ޕަބްލިކް އެކައުންޓެއް އޮންނަނީ މިކަހަލަ ބޭނުންތަކަށް ކަމަށާއި އެ އެކައުންޓް އޯޑީ ކުރަން ޖެހެނީ އާމްދަނީ ލިބުން ދަތިވީމަ ކަމަށެވެ.
