ކޯލިޝަން ސަރުކާރުގެ ސަބަބުން ރާއްޖޭގެ ރައްޔިތުން އުއްމީދުކުރި ފުރިހަމަ ހެޔޮބަދަލު ފެނިގެން ނުދާކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ އެމްޑީޕީ މެންބަރު މުޙައްމަދު ރާޢީ ވިދާޅުވެެއްޖެއެވެ.
ރާއީ ގެންދަވަނީ އެމްޑީޕީ ހިމެނޭ މި ސަރުކާރު ކޯލިޝަނަށް ވަރަށް ބޮޑަށް ފާޑުވިދާޅުވަމުންނެވެ. ޚާއްޞަކޮށް ކޯލިޝަންގައި ހިމެނޭ އަދާލަތުޕާޓީއާއި އެޕާޓިގެ ރައީސް ޝައިޚް އިމްރާން ޢަބްދުﷲއަށްވެސް ވަރަށް ބޮޑަށް ފާޑުވިދާޅުވަމުން ގެންދަވައެވެ. ސަރުކާރު ކޯލިޝަންގައި ދެން ހިމެނެނީ ޖުމްހޫރީ ޕާޓީއެވެ.
ކޯލިޝަން ސަރުކާރަށް ފާޑުވިދާޅުވެ މެންބަރު ރާޢީ ވިދާޅުވީ، ކޯލިޝަން ސަރުކާރުގެ ސަބަބުން ރާއްޖޭގެ ރައްޔިތުން އުއްމީދުކުރި ފުރިހަމަ ހެޔޮބަދަލު ފެންނަމުން ނުދާކަމަށެވެ. އޭނާ ވިދާޅުވީ އަބަސްވެސް ރައްޔިތުންގެ އުއްމީދަކީ ހަމައެކަނި އެމްޑީޕީ ސަރުކާރުން ރައްޔިތުން އެދޭ ހެޔޮ ބަދަލު ގެނައުންކަމަށެވެ.
ކޯލިޝަން ސަރުކާރުގެ ސަބަބުން ރާއްޖޭގެ ރައްޔިތުން އުއްމީދުކުރި ފުރިހަމަ ހެޔޮބަދަލު ވަނީ ނުފެނިފައެވެ. އެއިރުވެސް، މިހާރުވެސް ރައްޔިތުންގެ އުއްމީދަކީ ފުރިހަމަ އާރާއި ބާރުގައިވާ ހަމަ އެކަނި MDP ސަރުކާރަކުން ރައްޔިތުން އެ އެދޭ ހެޔޮބަދަލު ގެނެވުމެވެ. ???? pic.twitter.com/RaI3v5zCWX
— Mohamed Raee / Makunudhoo Constituency (@Mraee12) November 5, 2021
ކޯލިޝަންގެ ޕްލެޓް ފޯމެއްގައި ވެރިކަމަށް ވަޑައިގެންނެވި، ރައީސް އިބުރާހިމް މުހައްމަދު ސޯލިހުގެ ވެރިކަން މިހާރު ވަނީ ތިން އަހަރާއި ގާތްވެފައެވެ.
ފާއިތުދިޔަ ތިން އަަހަރުގެ ތެރޭގައިވެސް، ކޯލިޝަންގައި ހިމެނޭ ޕާޓީތަކުގެ އެތަކެއް ވަޒީރުންނެއް މަގާމުން ދުރު ކުރެވިއްޖެއެވެ. މަގާމުން ދުރުކުރެވުނު ގިނަވަޒީރުން މާގަމުން ދުރުކުރެވިގެން ދިޔައީ، އެވަޒީރުންނަށް ރައްޔިތުންގެ މަޖިލިހުގެ ނުރުހުން އަމާޒު ވެގެންނެވެ. މިގޮތުން ސަރުކާރު ކެބިނެޓުގައި ތިއްބެވި، ޖުމުހޫރީ ޕާޓީއާއި، އަދާލަތު ޕާޓީ އަދި އެމްއާރުއެމްގެ، ވަޒީރުންތަކެއް މަޤާމުން ދުރުކޮށްފައިވެއެވެ.
ކޯލިޝަންގެ އެންމެ ބޮޑު ޕާޓީއެއްގެ ގޮތުގައި އަދިވެސް އޮތް އެމްޑީޕީގެ ލީޑަރޝިޕްގެ އިސް ބޭފުޅުންނާއި އަދި މަޖިލިސް ރައީސް ނަޝީދުގެ ފާޑުކިއުން މެދުކެޑުމެއްނެތި އަދާލަތު ޕާޓީއަށް އަމާޒުވަމުން ދާއިރު، އަދިވެސް އެޕާޓީ އޮތީ ކޯލިޝަންގެ މުހިންމު ޕާޓްނަރެއްގެ ގޮތުގައެވެ.
އެހެންނަމަވެސް، މަޖިލިސް ރައީސް ތުހުމަތު ކުރައްވަމުން ގެންދަވަނީ ރައީސް އިބުރާހިމް މުހައްމަދު ސޯލިހު ހުންނެވީ ހަރުކަށި ފިކުރުގެ މީހުންގެ މެދުގައި ތާށިވެފައިކަމުގައެވެ. އަދި އެއަށްފަހު ވިދާޅުވަމުން ގެންދަވަނީ، އަދާލަތުޕާޓީން ރައީސް އިބުރާހިމް މުހައްމަދު ސޯލިހުގެ ނިންމެވުންތަކަށް ނުފޫޒު ފޯރުވަމުން ގެންދަވާ ކަމަށެވެ.
