2008ގެ އާ ގާނޫނު އަސާސީން ގެނެސްފައި އޮތް ވެރިކަމުގެ ނިޒާމު ބަދަލުކޮށް، ފާއިތުވެދިޔަ 13 އަހަރު ވަންދެން ތަޖުރިބާ ކުރަމުންދާ ރިޔާސީ ނިޒާމު އުވާލާ، ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ކުރުމަކީ، އެމްޑީޕީގެ ރައީސް މުހައްމަދު ނަޝީދުގެ އިސްވެ ހުންނަވާ، އެމްޑީޕީން ކުރަމުންދާ ސިޔާސީ އެންމެ މުހިންމު އެއް މަސައްކަތެވެ.

އަދި ރައްޔިތުންގެ ފެންނަ ނުފެންނަ ވޯޓަކަށްވެސް ނުގޮސް، ރައްޔިތުންގެ މަޖިލިހުގެ ތެރެއިން ނެގޭ ވޯޓަކުން ގާނޫނު އަސާސީ ބަދަލުކޮށް، ބަރުލަމާނީ ނިޒާމަށް ވެރިކަމުގެ ނިޒާމު އަބުރާލުމަށް ނަޝީދު އެންމެ ފުރަތަމަ ވިސްނުން ގެންގުޅުއްވާ އަދި އެމަގުން މަސައްކަތް ކުރެއްވުމަށް ރައީސް ސާލިހުގެ ކިބައިން އެދިވަޑައިގަތް ނަމަވެސް، އޭރު ރައީސް ސާލިހުގެ ތާއީދު އެމަގުން އެމަސައްކަތަށް ލިބިވަޑައި ނުގަތުމުން، ފަހުން ވިދާޅުވެފައިވަނީ، ބަރުލަމާނީ ނިޒާމެއް ރާއްޖެއަށް ގެނައުމަށް ބޭނުންފުޅުވަނީ ރައްޔިތުންގެ ފެންނަ ނުފެންނަ ވޯޓަކަށް ގޮސްގެން ކަމުގައެވެ.

އަދި އެއަށްފަހު، އެމްޑީޕީގެ މަޖިލިސް ބައެއް މެމްބަރުންގެ ތާއީދާއެކު، ބަރުލަމާނީ ނިޒާމަށް ތާއީދުކުރާ މީހުންގެ ޕެޓިޝަނެއް ތައްޔާރު ކުރައްވަން ވަނީ ފައްޓަވާފައެވެ. މިގޮތުން، ފާއިތުވެދިޔަ ތަނުގައި ނަޝީދުގެ ބަރުލަމާނީ މަސައްކަތްތަކާ ގުޅޭގޮތުން ރައީސް ސާލިހު މާ ބޮޑު ޝައުގުވެރިކަމެއް ދައްކަވާފައި ނުވި ނަމަވެސް، ފަހުން ވިދާޅުވެފައިވަނީ ވެރިކަމުގެ ނިޒާމު ބަދަލު ކުރަން ބޭނުންވާނަމަ އެކަމަކަށް އޮތް ހަމައެކަނި މަގަކީ ރައްޔިތުންގެ ފެންނަ ނުފެންނަ ވޯޓަކަށް ދިއުން ކަމުގައެވެ.

އަދި އޭގެފަހުން، 6 މޭގެ ޓެރަރިސްޓު ހަމަލާއަށް ފަރުވާ ހޯއްދެވުމަށް ރާއްޖެއިން ބޭރުގައި ހުންނެވުމަށްފަހު މާލެ އެބުރި ވަޑައިގެން ވިދާޅުވެފައި ވަނީ، ބަރުލަމާނީ ނިޒާމުގެ މަސައްކަތްތައް ކުރިޔަށް ގެންދަވަނީ ރައީސް ސާލިހުގެ އިރުޝާދުގެމަތިން، އެމަނިކްފާނުގެ ތާއީދާވެސް އެކީ ކަމަށެވެ. އަދި ފަހުން ރައީސް އޮފީހުންވަނީ، ރަސްމީކޮށް، ވެރިކަމުގެ ނިޒާމު ބަދަލުކުރުމުގެ މަޝްވަރާތައް ނަޝީދާއި ރައީސް ސާލިހުއާ ދެބޭފުޅުން ކުރިޔަށް ގެންދަވާފައިވާ ކަންވެސް ހާމަ ކޮށްފައެވެ.

އެހެންކަމުން، ނަޝީދު ތަކުރާރުކޮށް ވިދާޅުވަމުން ގެންދަވާ ފަދައިން، މީގެކުރިން ވެރިކަމުގެ ނިޒާމު ބަދަލުކުރުމަށް ކުރެވެމުންދާ މަސައްކަތްތަކަށް، ރައީސް ސާލިހުގެ ޝައުގުވެރިކަން ކުޑަކަމަށް ބެލެވެމުން އައި ނަމަވެސް، ފަހުން ރަސްމީ މަޝްވަރާތައް މިމައްސަލައާއި ގުޅޭގޮތުން ކުރިޔަށް ގެންދަވާފައި ވުމާއެކު، އަދި މިއީ ތާއީދު ނުކުރައްވާނެ މަސައްކަތެއްގެ ގޮތުގައި އެއްވެސް އިރަކު ސިފަކުރައްވާފައި ނުވާތީއާވެސްއެކު، ނިޒާމު ބަދަލުކުރުމަށް ނަޝީދު ކުރައްވަމުން ގެންދަވާ މަސައްކަތްތަކަށް ރައީސް ސާލީހުގެ ތާއީދު ނެތްކަމުގައި މިއަދު ދެންނެވޭނެ ޖާގަ އޮތްކަމަކަށް ނުފެނެއެވެ.

ރައީސް ސާލިހުގެ ތާޢީދަށްފަހު، ނަޝީދު މިހާރު އެދިވަޑައި ގަންނަވަނީ ސިޔާސީ ޕާޓީތަކުގެ ތާއީދަށް!

މި ހަފްތާގެ އާދީއްތަ ދުވަހު، ނަޝީދުވަނީ ރަސްމީކޮސް ރައީސް ސާލިހުއާ ރައީސް އޮފީހުގައ،ި ވެރިކަމުގެ ނިޒާމު ބަަލުކުރުމާ ގުޅޭގޮތުން މަޝްވަރާ ކުރައްވާފައެވެ. އަދި މި ބައްދަލު ކުރެއްވުމުގެ އެއް އަމާޒަކީ، ވެރިކަމުގެ ނިޒާމު ބަދަލު ކުރުމާ ގުޅޭ މަޝްވަރާތައް ކުރިޔަށް ގެންދިއުން ކަމުގައި ރައީސް އޮފީހުން ހާމަ ކޮށްފައިވި ނަމަވެސް، މި މަޝްވަރާތަކުގެ ނަތީޖާއެއް އެއްވެސް ފަރާތަކުން ހާމަ ކޮށްފައެއް ނުވެއެވެ.

އެހެންނަމަވެސް ފެންނަމުންދާ މަންޒަރަކީ، ރައީސް ސާލިހުއާއި ކުރެއްވި މަޝްވަރާތަކަށްފަހު، ޖެހިގެން އައި ދުވަސްތަކުގައި، މަޖިލިހުގައި މެމްބަރުން ތަމްސީލު ކުރަމުންދާ ޕާޓީތަކުގެ އިސްވެރިންނާ ބައްދަލު ކުރައްވާ، ޕާޓީތަކުގެ އެހީތެރިކަމަށް ނަޝީދު އެދިވަޑައި ގަންނަވަމުންދާ ތަނެވެ.

މިގޮތުން މިހާތަނަށް މަޖިހުގައި މެމްބަރުން ތަމްސީލު ކުރަމުންދާ ޕާޓީތައް ކަމުގައިވާ، އިދިކޮޅު ޕީޕީއެމްގެ އިތުރުން، ޖުމުހޫރީ ޕާޓީގެ ލީޑަރު ގާސިމް އިބުރާހިމްއާއި އަދި ދާދިފަހުން އުފެއްދި ނޭޝަނަލް ޕާޓީގެ ލީޑަރޝިޕާވެސް ނަޝީދުވަނީ ބައްދަލު ކުރައްވާ، މިމަސައްކަތުގައި އެހީތެރިކަމަށް އެދިވަޑައިގެންފައެވެ. ޕާޓީތަކާއި ބައްދަލު ކުރެއްވުމަށްފަހު، ގިނަ ޕާޓީތަކުން އާންމު ކޮށްފައިވާ މައުލުމާތުތަކަށް ބަލާއިރު، ނަޝީދު ޕާޓީތަކުގެ ކިބައިން އެދިވަަޑައިގަންނަވަނީ، ވެރިކަމުގެ ނިޒާމު ބަދަލު ކުރުމަށްޓަކާ އާންމު ރައްޔިތުންގެ ފެންނަ ނުފެންނަ ވޯޓަކަށް ދިއުމަށް، ގާނޫނު އަސާސީ ބަދަލުކުރުމުގައި ޕާޓީތަކުން ތާއީދު ކޮށްދެއްވުމަށެވެ.

އެހެންނަމަވެސް، މި ހުރިހާ ޕާޓީތަކުގެ އިސް ވެރިންނަކީވެސް، ފާއިތުވެދިޔަ ތަނުގައި މިހާރު އޮތް ރިޔާސީ ނިޒާމު ބަދަލުކުރުމަށް ފާޅުގައި ދެކޮޅު ހައްދަވާފައިވާ ފަރާތްތައްކަންވެސް މިފުރުސަތުގައި ފާހަގަ ކޮށްލަން ޖެހެއެވެ.

އަދި މިބޭފުޅުން ވެރިކަމުގެ ނިޒާމު ބަދަލު ކުރުމަށް މީގެ ކުރިން ފާޅުގައި ދެކޮޅު ހައްދަވާފައިވުމުގެ އިތުރުން، ޕީޕީއެމް ފިޔަވާ، މީގެތެރޭގައި ހިމެނިވަޑައިގަންނަވާ ގިނަ ބޭފުޅުން ފާހަގަ ވެގެން ގޮސްފައިވަނީ، ފާއިތުވެދިޔަ ރިޔާސީ އިންތިޚާބުގައި އެއް ކޯލިޝަނެއްގައި ނަޝީދުއާއި އެކީ މަސައްކަތް ކުރައްވާ އެހެންނަމަވެސް، ފަހުން ކޯލިޝަން އުވާލުމަށް ނަޝީދު ކުރައްވަން ފެއްޓެވި މަސައްކަތުގެ ތެރެއިން، ނަޝީދު އަމިއްލަފުޅަށް މިބޭފުޅުންނާ ފެޔަށް ޖެހިވަޑައިގެންފައިވާ ބޭފުޅުންގެ ގޮތުގައިވެސް މެއެވެ.

ކޯލިޝަން ހެއްދެވި ހުރިހާ ފަހަރަކުވެސް ވެރިކަން ލިބިވަޑައިގަތުމުން ކޯލިޝަން ރޫޅާ ލެއްވި!

ރާއްޖޭގެ ވެރިކަމުގެ ނިޒާމު ބަދަލު ކުރުމަށް ނަޝީދު ކުރައްވަމުން ގެންދަވާ މަސައްކަތުގައި، ގިނަ ބައެއްގެ އެހީތެރިކަމަށް މިއަދު ބޭނުން ވެފައިވާއިރު، އަދި މިމަސައްކަތުގައި ސިޔާސީ ޕާޓީތަކާއި، ވާދަވެރި ސިޔާސީ ފަރާތްތަކުގެ ތާއީދު ލިބޭތޯ މަސައްކަތް ފައްޓަވާފައިވާއިރު، މިއަދު ގިނަ ބަޔަކު ފާހަގަ ކުރާއެއް ކަމެއް އެބަ އޮތެވެ. އެއީ ފާއިތުވެދިޔަ ތަނުގައި ނަޝީދާއެކީ ކޯލިޝަން ހައްދަވައިގެން ގިނަ ސިޔާސީ ފަރާތްތަކަށް ކުރަން ޖެހުނު ތަޖުރިބާތަކުގެ ވާހަކަތަކެވެ.

މިގޮތުން ބަލާއިރު، ނަޝީދު ރާއްޖޭގެ ވެރިކަމަށް އެންމެ ފުރަތަމަ ވަޑައިގެންނެވީވެސް، ރައީސް މައުމޫނުގެ ވެރިކަން އޭރު ބަދަލުކުރުމަށް ބޭނުންވި ސިޔާސީ އެތައް ބަޔަކާއެކީ ކޯލިޝަން ހައްދަވައިގެންނެވެ. އެހެންނަމަވެސް، 2008ވަނަ އަހަރު ކޯލިޝަންއަކާއެކީ އެމްޑީޕީއަށް ވެރިކަމަށް އާދެވުމަކާއެކު، ކުޑަ ދުވަސް ކޮޅެއްގެ ތެރޭގައި ނަޝީދުވަނީ ކޯލިޝަން ރޫޅާލައްވާ، ސަރުކާރަކީ އެމްޑީޕީގެ އެކަނި ސަރުކާރަކަށް ބަދަލު ކުރައްވާ، އަދި ފަހުން މުޅި ކެބިނެޓްވެސް އެމްޑީޕީގެ ވަޒީރުންގެ ކެބިނެޓަކަށް ހައްދަވާ، ކޯލިޝަން ރޫޅާ ލައްވާފައެވެ.

އެއަށްފަހު، ނަޝީދާއެކީ ސިޔާސީ ފަރާރްތަކުން ދެން ކޯލިޝަން ހައްދަވާފައިވަނީ، 2018ގެ ރިޔާސީ އިންތިޚާބުގައި ރައީސް ޔާމިންގެ ވެރިކަން ބަދަލު ކުރުމަށެވެ. އެ ކޯލިޝަން ހައްދަވާފައިވަނީ، ކޯލިޝަން ކެނޑިޑޭޓަށް ވެރިކަމަށް އާދެވުމުން، ރައްޔިތުންގެ މަޖިލިސް އިންތިޚާބުގައި ހުރިހާ ޕާޓީތަކަށް ދާއިރާތައް ބަހައިގެން ވާދަކުރުމާއި، ކެބިނެޓް ހުރިހާ ޕާޓީތަކުން ހިއްސާ ކުރުމާއި، އަދި އޭގެ އިތުރުން ސަރުކާރުގެ ވަޒީފާތަކުގެ އިތުރުން ކައުންސިލް އިންތިޚާބުގައި ދާއިރާތަަކަށް ވާދަކުރުމުގައިވެސް ޕާޓީތަކުން އެކައެއްޗެއް ކިއުމަށް ވައުދުވެ، އެއްބަސްވުން ތަކުގައި ސޮއިވެސް ކޮށްގެންނެވެ.

އެހެންނަމަވެސް، ކޯލިޝަން ކެނޑިޑޭޓެއްގެ ގޮތުގައި ރައީސް ސާލިހަށް ވެރިކަމަށް ވަޑައިގެންނެވުމަށް ފަހު، ނަޝީދުވަނީ، ރައީސް ސާލިހުގެ ވެރިކަމުގައި އައި ފުރަތަމަ މަޖިލިސް އިންތިޚާބުގައި، ކޯލިޝަން އެއްބަސްވުމާ ޚިލާފަށް، ހުރިހާ ގޮނޑިއަކަށް އެމްޑީޕީން ކެނޑީޑޭޓުން ނެރުއްވާ، ކެމްޕޭން ކުރައްވާ، އެމަގުން ގަދައަޅާ މަސައްކަތްވެސް ކުރައްވާފައެވެ. އަދި ރައީސް ސާލިހުގެ ވެރިކަމަށް އަހަރެއްހާ ދުވަސް ފާއިތުވެގެން ދިޔަތަނާ ކަހަލަ ގޮތަކަށް ނަޝީދުވަނީ، ކޯލިޝަން ރޫޅާލުމަށް، ފާޅުގައި ކުރެވެން އޮތްހާ މަސައްކަތެއް ކުރައްވާ، އަދި ކޯލިޝަން ޕާޓީތަކުގެ ވަޒީރުންވެސް ކެބިނެޓުން ބޭރުކުރުމަށް ގިނަ މަސައްކަތްތަކެއް ކުރައްވަން ފައްޓަވާފައެވެ.

އަދި މިމަގުން މަސައްކަތް ކުރައްވާ، ނަޝީދު އިސްވެ ހުންނަވާ، އެހެން ޕާޓީތަކުގެ ބައެއް ވަޒީރުން ކެބިނެޓުން ބޭރު ކުރައްވާފައިވާއިރު، ނަޝީދުގެ މިއަދުގެވެސް އެންމެ ބޮޑު އެއް އަމާޒަކަށް ހައްދަވާފައިވަނީ، ރައީސް ސާލިހު ވެރިކަމަށް ވަޑައިގެންނެވި ކޯލިޝަންގެ އެންމެ މުހިންމު އެއް ބައިވެރިއެއްގެ ގޮތުގައި އޮތް އަދާލަތު ޕާޓީ ކޯލިޝަނުން ބޭރު ކުރުމެވެ.

އެހެންކަމުން މި ހުރިހާ ހަގީގަތްތައް މިގޮތުގައި ހުރެމެ، އަދި ސިޔާސީ މަސްރަހުގައި މިވަގުތު ތިއްބެވި ގިނަ ފަރާތްތަކަކީ، ސިޔާސީ ގޮތުން ނަޝީދާއެކީ މަސައްކަތް ކުރައްވާ، އެހެންނަމަވެސް ފައިތުވެދިޔަ ތަނުގައި ހިތި އެތައް ތަޖުރިބާތަކެއް ކުރައްވަން ޖެހިވަޑައިގެންނެވި ބޭފުޅުންނަށް ވާތީވެ، ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ކޮށްލުމަށް ނަޝީދު ކުރައްވަމުން ގެންދަވާ މަސައްކަތްތަކަށް، އެމްޑީޕީ ފިޔަވާ އެހެން ސިޔާސީ ޕާޓީތަކުގެ ތާއީދު ލިބިގެން ހިގައިދަނެކަމީ މުސްތަހީލު ކަމެއްކަމުގައި މިއަދު ގިނަބަޔަކު ދަނީ ދެކެމުންނެވެ.