އިންޑިއާއަށް ދިވެހި ރާއްޖެއަކީ ފެމުނެއްގެ އަނގަ ހުޅުވިފައިވާ ފަދައިން ހުޅުވިފައިވާ ތަނެއް ކަމަށާއި، ނަމަވެސް ދިވެހި ބޭސްފަރުވާއަށާއި، އެނޫން ކަންކަމުގައިވެސް ދާން ބޭނުންވުމުން އިންޑިއާ ވެފައިވަނީ ދަތްބާރު ވެފައިވާ ކިނބުލަކަށް ކަމުގައި އިދިކޮޅު ޕީއެންސީގެ ނާއިބް ރައީސް އިބްރާހިމް ޝުޖާ ވިދާޅުވެއްޖެއެވެ.
ރޭ އިދިކޮޅު ކޯލިޝަނުން ބޭއްވި ޖަލްސާގައި ވާހަކަ ދައްކަވަމުން ޝުޖާވަނީ ރާއްޖޭގެ ރައްޔިތުން ބޭސްފަރުވާއާއި، ތައުލީމަށާއި އެނޫން ކަންކަމުގައިވެސް އިންޑިއާގެ ވިސާ ހޯދުން ބޮޑު ތަކުލީފަކަށް ވެފައިވާކަމަށެވެ. ރާއްޖޭގެ ސަރުކާރުގެ އެންމެ ބޮޑު ބައިވެރިއަކީ އިންޑިއާ ކަމަށްބުނާއިރު، އިންޑިއާއިން ދިވެހިން ބަލިވުމުން އެހީނުވާއިރު ދެން އެހީވާނެ އިތުރު ކަމެއް ނޯންނާނެކަމަށް ޝުޖާ ވިދާޅުވިއެވެ.
މިސަރުކާރުން ރައްޔިތުންނަށް އިޚުލާސްތެރިކަމެއް ހުރިނަމަ ނިކަން އިންޑިއާ އެމްބަސީ ކުރިމަތީގައި އޮތް ކިއު ނިމުމަކަށް ގެނެސްބަލަ. އަޅުގަނޑުމެން އެކިއު ނިމުމަކަށް ގެނައިން. މިއަދު އަނެއްކާވެސް އެކުވެރިޔާގެ ކައިރީގައި ކިއުވަނީ ދިގުވެފަ. އިންޑިއާއިން ރާއްޖޭގައި ކުރަން ބޭނުންވާ ކޮންމެ ކަމެއްގައި ރާއްޖެ އޮންނަނީ ފެމުނެއްހެން އަނގަ ހުޅުވިފަ. އެކަމަކު އަޅުގަނޑުމެން ދިވެހިން ބޭސްފަރުވާއަށް ދާން އުޅުނީމާވެސް މި އޮންނަނީ ކިނބުލެއްހެން ދަތްބާރުކޮށްގެން. މިއީތޯ އެކުވެރިއާގެ ހާލަތަކީ.
– ޝުޖާ ވިދާޅުވިއެވެ.
ޝުޖާ ވިދާޅުވީ މިސަރުކާރުން ދިވެހި ރައްޔިތުންގެ ބޭސްފަރުވާއަށްވެސް އިހުލާމު ވެފައިވާކަމަށެވެ. ރައްޔިތުން ބޭސްފަރުވާގެ ހައްގު ހޯދުމަށް މިއަދު އިންޑިއާގެ އެމްބަސީގައި ސަލާންޖެހުމުގެ ސަގާފަތެއް އެކުލަވާލާފައިވަނީ ދިވެހިންގެ ނިކަމެތިކަން ދެއްކު ކަމަށްކަމަށެވެ. އިންޑިއާއަކީ މާގާތް އެކުވެރިއެއްކަމަށް ސަރުކާރުން ބުނަމުންދާއިރު، އިޚުލާސްތެރިކަމުގެ ކަންފުޅެއްވެސް އިންޑިއާގެ ކިބައިން ނުފެންކަމަށް ޝުޖާ ވިދާޅުވިއެވެ.
އޭނާ ވިދާޅުވީ ރާއްޖޭގެ އެތައް ސަރަހައްދެއްގައި އިންޑިއާގެ ސިފައިންނާއި، އިންޑިއާގެ އެކި މީސްމީހުން ބާރުގަދަ ކުރަމުންދާއިރު ދިވެހި ސަރުކާރު އޮތީ ނިދާފައިކަމަށެވެ. ނަމަވެސް ކިތަންމެ ފޮރުވައިގެން އުޅުނަސް މިސަރުކާރަށް ސިއްރު އެގްރީމަންޓްތައް ހާމަނުކޮށް ނުތިބެވޭނެކަަމށް ޝުޖާ ވިދާޅުވިއެވެ.
ރާއްޖޭގެ ރައްޔިތުންގެ ހިތްތަކުގައި ބިރުވެރިކަން އުފެދޭ ވަރަށް އިންޑިއާ ސިފައިންނާއި، އިންޑިއާގެ ބާރުތައް މިޤައުމުގައި އަށަގަންނަމުންދާކަމީ ދިވެހި ރައްޔިތުން ނުހަނު ބިރުގަންނަ ކަމެއްކަމަށް ޝުޖާ ވިދާޅުވިއެވެ. ނަމަވެސް ދިވެހި ރައްޔިތުންނަކީ މިނިވަންކަމުގެ ދިފާއުގައި ނިކުމެ އެމިިނިވަންކަން ހޯދުމަށް ފަސްޖެހޭނެ ބައެއް ނޫންކަމަށާއި، ދިވެހި ރައްޔިތުން މިރެއިން ފެށިގެން ފަށާ މަސައްކަތަކީ މިނިވަންކަމުގެ ދިފާއުގައި، މިޤައުމު ސަލާމަތްކުރަން ފަށާ މަސައްކަތެއް ކަމަށެވެ. ދިވެހި ރައްޔިތުންގެ ހައްގުގައި އިދިކޮޅު ކޯލިޝަނުން މިފެށި މަސައްކަތް ނިންމާލާނީ މި ޤައުމު މިނިވަން އައްސޭރިއަކަށް ގެނެސްދިނުމަށް ފަހުގައިކަމަށް ޝުޖާ ވިދާޅުވިއެވެ.
