ރައީސް އިބުރާހިމް މުހައްމަދު ސާލިހުގެ ވެރިކަން ފެށިގެން އައީ ކޯލިޝަން ވެރިކަމެއްގެ ގޮތުގައެވެ. އެއީ އޭރު އޮތް ރައީސް ޔާމިންގެ ވެރިކަން ނިމުމަކަށް ގެނައުމަށް މަސައްކަތް ކުރަމުންދިޔަ އޭރުގެ އިދިކޮޅު ޕާޓީތައް އެކުވެގެން އުފެއްދި ކޯލިޝަންއެކެވެ.

އެހެންނަނަމަވެސް، ކޯލިޝަންގެ އެންމެ ބޮޑު ޕާޓީއެއްގެ ގޮތުގައި އެމްޑީޕީއޮވެ، ޖޫމްހޫރީ ޕާޓީއާއި، އަދާލަތު ޕާޓީއާއި، ރައީސް މައުމޫންގެ އެމްއާރުއެމްގެ އިތުރުން، ރައީސް ޔާމިންގެ ސަރުކާރާ ދެކޮޅަށް އޭރު މަސައްކަތް ކުރަމުން އައި ސިޔާސީ ހުރިހާ ފަރާތަތަކެއް ކަހަލަ ގޮތަކަށް ކޯލިޝަންގައި ހިމެނި، ކޯލިޝަންގެ ރިޔާސީ ކެނޑިޑޭޓެއްގެ ހައިސިއްޔަތުން ރައީސް އިބުރާހިމް މުހައްމަދު ސާލިހު ރިޔާސީ އިންތިޚާބު ކާމިޔާބުކުރައްވާ ވެރިކަމަށް ވަޑައިގަތުމަށްފަހު، ވެރިކަމުގެ ނާ އަމާންކަމާ އެކީ ދަތުރު ކޮށްފައިވަނީ އަހަރެއްހާ ދުވަހުގެ މުއްދަތަކަށް ކަމުގައި ދަންނެވިދާނެއެވެ.

މިގޮތުން 2018ވަނަ އަހަރުގެ ނޮވެމްބަރުމަހު ވެރިކަމުގެ ހުވާކުރައްވާ، ގިނަ ޕާޓީތަކެއް އެކުލެވޭ ކޯލިޝަންގެ ނާގެ ހުންގާނުގައި ހުންނަވާ، ރައީސް ސާލިހަށް މާކަޑުގެ ރާޅުތަކުގެ ތެރޭގައި އާމާން ކަނޑެއްގައި ދަތުރު ކުރެއްވޭވަރުވީ 2019ވަނަ އަހަރު ނިމުމަކާ ހަމައަށް ދަންދެންކަން މިއީ ރައީސް ސާލިހުގެ ވެރިކަމުގެ ފާއިތުވެދިޔަ ތަނަށް ނަޒަރެއް ހިންގާލުމުން ސާފުކޮށް ފެންނާން އޮތް ވަރަށް ބޮޑު ހަގީގަތެކެވެ.

އެއަށްފަހު، 2020 ވަނަ އަހަރު ފެށުމާއެކު، މުޅި ދުނިޔެއަށްވެސް ކުރިމަތިވީ، ކޯވިޑްގެ އާލަމީ ވަބާއާއި ހަނގުރާމަ ކުރައްވަން ރައީސް ސާލިހަށް ޖެހިވަޑައިގެންނެވީ، ދައުލަތުގެ ހުރިހާ ވަސީލަތެއްގެ ބޭނުން ކުރައްވައިގެންނެވެ. އަދި އެއަށްފަހު ފާއިތުވެދިޔަ ދޮޅު އަހަރެއްހާ ދުވަހުގެ ތެރޭގައި މިހަގުރާމައަށް ލުޔެއްނުލިބި، ކޯވިޑް19ގެ ބޮޑެތި ގޮންޖެހުންތަކާ ސަރުކާރަށް ކުރިމަތިލާން ޖެހިފައިވާއިރު، ހަމަ މި މުއްދަތުގެ ތެރޭގައި ރައީސް ސާލިހަށް ޖެހިވަޑައިގެންނެވީ، ސިއްޙީ އާލަމީ ވަބާއަކަށް ނުވިނަމަވެސް، ސިޔާސީގޮތުން އެފަދަ ދެވަނަ ހަގުރާމައެއް ކުރައްވަންކަން މިފުރުސަތުގައި ފާހަގަ ކޮށްލަންޖެހެއެވެ.

އެއީ އެމްޑިޕީގެ އެތެރޭގައި އުފެދި ހުޅު ރޯވެގެން ގޮސްފައިވާ، އެޕާޓީގެ އެތެރޭގެ ސިޔާސީ ކޯޅުންތަކެވެ. އަދި މިކޯޅުންތަކުގެ އަސަރު އެމްޑީޕީގެ އެތެރޭގެ ހުރިހާ ގުނަވަނެއް ފަހަނައަޅާ، އެމްޑީޕީގެ ސުޕަރ މެޖޯރިޓީއޮތް އެޕާޓީގެ ޕާލަމެންޓްރީ ގްރޫޕްގެ ތެރެއަށް ފޭދި، އެންމެ ފަހުން، އެމްޑީޕީގެ ރައީސް އަދި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ރައީސް ސާލިހަށް ކުރައްވަމުން ގެންދެވި އިތުބާރާއި ތާޢީދުވެސް ވަނީ އަބުރާ ގެންދަވާފައެވެ.

ކޮންމެއަކަސް، އޭރުވެރުވެސް މިހާރުވެސް، ގިނަފަރާތަކުން ގަބޫލުރާ އެއް ހަގީގަތަކީ، ރައީސް ސާލިހާއި ރައީސް ނަޝީދު ޚިޔާލުތަފާތު ވެގެންދިޔަ ހަގީގީ ސަބަބަކީ 2023ގެ ރިޔާސީ އިންތިޚާބު ކަމުގައެވެ. އަދި މި ސާފު ހަގީގަތަކީ ގިނަ ބަޔަކު މީގެކުރިން ޝައްކުގެ ނަޒަރަކުން ދެކެމުން އައި ހަގީގަތަކށްވި ނަމަވެސް، މާދަމާ ބޭއްވުމަށް ހަމަޖެހިގައިވާ އެޕާޓީގެ ގައުމީ މަޖިލިސް އިންތިޚާބަށް ފުރިހަމަޔަށް ނަޒަރެއް ހިންގާލުމުން މިއަދު މިއޮތީ ދެބަސްވެވެން ނެތް މި ހަގީގަތް ސާފުކޮށް ފެންނާށެވެ.

އެތައް ގޮތަކުން މުހިންމު އިންތިޚާބެއް، އަމާޒަކީ 2023!

2023ގެ ރިޔާސީ އިންތިޚާބަށް ކުރިޔަށް އެންމެ 2 އަހަރެއްހާ ދުވަސް ބާކީ އޮތްއިރު، މި އިންތިޚާބުގައި ވާދަކުރައްވާނެކަމަށް ރައީސް ނަޝީދު ވަނީ ރަސްމީކޮށް އިއުލާން ކުރަވާފައިވާފައެވެ.

އެހެންނަމަވެސް، 2023ގެ ރިޔާސީ އިންތިޚާބުގެ ވާހަކަ ރައީސް ސާލިހު ސާފު ބަހުން އަދި ދައްކަވަމުން ނުގެންދެވި ނަމަވެސް، އެމަނިކްފާނު ރާއްޖެތެރޭގެ ރަށްރަށަށް ކުރައްވަމުން ގެންދަވާ ދަތުރުފުޅު ތަކުންނާއި، އަދި އެމަނިކްފާނުގެ ގާތް ބައެއް ބޭފުޅުންގެ ރިވާތަކުންވެސް، ރައީސް ސާލިހުވެސް 2023ގެ ރިޔާސީ އިންތިޚާބުގައި ވާދަކުރައްވަން ކަމަރު ބަންނަވައިގެން ހުންނެވިކަން މިއީ މިއަދު އޮޅުމެއް ނެތް މިންވަރަށް ކަށަވަރުވެ ޔަގީންވާ ކަމެކެވެ.

އެހެންކަމުން، މިއަދު ދެ ފެކްޝަނަކަށް ރަސްމީކޮށް ބެހިގެން ގޮސްފައިވާ އެމްޑީޕީގެ އެތެރޭގެ ހާލަތު އޮތް ގޮތަށް ރަގަޅަށް ނަޒަރެއް ހިންގާލާއިރު، 2023ގައި ވާދަ ކުރެއްވުމަށްޓަކާ، ރައީސް ނަޝީދަށްވެސް އަދި ރައީސް ސާލިހަށްވެސް، އެޕާޓީގެ ރިޔާސީ ޓިކެޓްގެ ޔަގީންކަމެއް ނެތި، ނުވަތަ އެޕާޓީގެ ކެޑިޑަސީ ލިބޭނެ ކަމުގަ ކަށަވަރުކަމެއް ނެތި، ދެކަނޑިއަކަށް އެއް އުރައްގެ އޮވެ، ކުރިޔަށް ދިއުމުގައި ބޮޑެތި ގޮންޖެހުންތަކެއް ހުންނާނޭ ކަމީ މިއަދު ގަބޫލުކުރަން ޖެހޭ ވަރަށް ބޮޑު ހަގީގަތެކެވެ.

ސަބަބަކީ، އެމްޑިޕީގެ އަސާސީ ގަވާއިދު އޮތްގޮތުން، 2023ގެ ރިޔާސީ އިންތިޚާބަށް އެޕާޓީގެ ފަރާތުން ކުރިމަތިލާ ކެނޑިޑޭޓަކަށް ޕާޓީ ޕްރައިމަރީ ކާމިޔާބު ކުރެއްވުން އެއީ ލާޒިމްކަމަށް ވެގެންދާނެތީއެވެ.

އެހެންކަމުން 2032ގެ ރިޔާސީ އިންތިޚާބުގެ ޝައުގުގައި އެއްޕާޓީއެއްގައި ދެލީޑަރަކު ކުރިޔަށް ވަޑައިގަންނަވާ އިރު، އެމްޑީޕީގެ ތެރޭގައި މިގޮތުން ބޭއްވޭ ޕްރައިމަރީއެއް ކާމިޔާބު ކުރެއްވުމުގައި، އެޕާޓީގެ ގައުމީ މަޖިލިހުގެ މެޖޯރިޓީއަކީ، ޕްރައިމަރީގައި ވާދަކުރައްވާ ކޮންމެ ބޭފުޅަކަށްވެސް ވަރަށް މުހިންމު އެސެޓަކަށް ވެގެންދާނެކަމީވެސް މިފުރުސަތުގައި ފާހަގަ ކޮށްލަންޖެހޭ ކަމެކެވެ.

މިގޮތުން، މިހުރިހާ ސަބަބުތަކަށްޓަކާ، މާދަމާ ބޭއްވިގެންދާ އެމްޑީޕީގެ ގައުމީ މަޖިލިސް އިންތިޚާބުވެގެން ދާނީ ހުރިހާ މާނައެއްގައިވެސް އެއްގޮތަށްވުރެ ގިނަ ގޮތްގޮތުން މުހިންމު އިންތިޚާބަކަށެވެ.

ދެފެކްޝަންގެ ވާދަވެރިކަން އިންތިހާއަށް ބޮޑު!

އެމްޑީޕީގެ އެތެރޭގައި މިވަގުތު އޮތް، ރައީސް ނަޝީދުގެ ފެކްޝަނާއި ރައީސް ސާލިހުގެ ފެކްޝަނަށްވެސް މިއިންތިޚާބުގެ މުހިންމުކަން އެތައްގުނަޔަކުން، ބޮޑުވެގެން ގޮސްފައިވާކަން ސާފުކޮށް އެގެން އޮތް އެއް ކަމަކީ، މި އިންތިޚާބަށް ކުރެވިގެންދާ ކެމްޕޭނުތަގައި ދެފެކްޝަނުންވެސް އެފެކްޝަނަކަށް ތާއީދުކުރާ ކެނޑިޑޭޓުންގެ ލިސްޓުތައް އެކުލަވާލާ، ވަކި ދެފެކްޝަނެއްގެ ގޮތުގައި އިންތިޚާބު ކާމިޔާބު ކުރުމަށް ކުރަމުންދާ މަސައްކަތްތަކެވެ. މިގޮތުން، އެމްޑީޕީގެ ގައުމީ މަޖިލިސް އިންތިޚާބުގައި، އެޕާޓީގެ ރައީސް ނަޝީދުގެ ފެކްޝަނަށް ތާއީދުކުރާ ކެނޑިޑޭޓުން ކެމްޕޭން ކުރަމުންދަނީ، ބަރުލަމާނީ ނިޒާމަކަށް ތާއީދުކުރާކަން ހާމަކޮށް، އެނިޒާމަށް ތާއީދު އޮތްކަން އަމަލާ ބަހުން ސާބިތު ކޮށްދެމުންކަންވެސް މިފުރުސަތުގައި ފާހަކޮށްލަން ޖެހެއެވެ.

އަދި މީގެ އިތުރުންވެސް، މިއިންތިޚާބުގެ ވާދަވެރިކަން އެމްޑީޕީގެ ޕާލަމެންޓްރީ ގުރޫޕުގެ ތެރޭގައި އޮތް މިންވަރަށް ބަލާލުމުންނާއި އަދި މާލޭ ދާއިރާފަދަ ބޮޑެތި ބައެއް ދާއިރާތަކުގައި ވާދަކުރަމުންދާ ކެނޑިޑޭޓުންގެ ވާދަވެރިކަމަށް ބަލާލުމުންވެސް، ދެފެކްޝަންގެ މެދުގައި މި އިންތިޚާބުގައި އޮތް ވާދަވެރިކަން ވަރަށް ރަގަޅަށް ވަޒަން ކުރެވިގެން ދެއެވެ.

މިގޮތުން ފެންނާން އޮތް އެންމެ ފުރިހަމަ އެއް މިސާލަކީ އަލިފުށީ ދާއިރާއެވެ. އެދާއިރާގެ މިހާރުގެވެސް މަޖިލިސް މެމްބަރު  މުހައްމަދު ރަޝީދު ހުސެއިން، ބިގޭއާއި އާއި، އިނގުރައިދޫ ދާއިރާގެ މެމްބަރު މެމްބަރު ހަސަން އަހުމަދު، ހަސަންޓޭ އާއި ދެމެމްބަރުންވެސް ވާދަ ކުރައްވަނީ، އެއްދާއިރާ އަކަށެވެ. ބިގޭއާއި ރައީސް ސާލިހާއި ދެބޭފުޅުންނަކީ ދެ ޅިޔަނުންނަށް ވާއިރު، މެމްބަރު ހަސަންޓޭ ފާހަގަ ކުރެވިގެން ގޮސްފައިވަނީ ޕާލަމެންޓްރީ ގުރޫޕުގައި ރައީސް ނަޝީދުގެ ފެކްޝަނުގައި ހުންނެވި މެމްބަރެއްގެ ގޮތުގައެވެ.

ހަމައެއާއެކު، އެހާމެ ވާދަވެރިކޮށް ކެމްޕޭން ކުރަމުންދާ އެއްދާއިރާ ކަމަގައިވާ ގައުމީ މަޖިލިހުގެ މާލޭ ދާއިރާއަކީވެސް، މިއިންތިޚާބުގައި ދެފެކްޝަންގެ ވާދަވެރިކަން ވަރަށް ބޮޑަށް ރަމްޒުކޮށްދެމުންދާއި އެއް ދާއިރާކަން ފާހަގަ ކޮށްލަން ޖެހެއެވެ. ސަބަބަކީ މާލޭ ދާއިރާއަށް ވާދަކުރަމުންވަމުން ގެންދަވާ، މާލޭ ސިޓީ ކައުންސިލްގެ ކުރީގެ މޭޔަރު ޝިފާއަކީ ފާޅުގައި ސަރުކާރަށް ފާޑު ވިދާޅުވަމުން ގެންދަވާ ބޭކަނބަލަކަށް ވެފައި، އޭނާއަކީ، ނަޝީދުގެ ތާޢީދު އިންތިހާއަށް އޮތް ފަރާތެއްކަންވެސް ސާފުކޮށް އެގެން އޮތުމެވެ. އަދި މި ދާއިރާއިން ޝިފާއާއި ވާދަކުރައްވަމުން ގެންދަވާ، ހައުސިންގ މިނިސްޓްރީގެ ސްޓޭޓް މިނިސްޓަރު އަކުރަމް ކަމާލުއްދީނަކީ އެމްޑީޕީގެ ރައީސް ނަޝީދު ފާޅުގައި ފާޑު ވިދާޅުވާ ބޭފުޅަކަށް ވުމުގެ އިތުރުން އޭނާއަކީ ސަރުކާރުގެ އިސް މަގާމެއްގައި މިވަގުތު ހުންނެވި ބޭފުޅަކަށް ވާތީވެސްމެއެވެ.

އެހެންކަމުން މިދާއިރާގެ ނަތީޖާ ނިކުމެގެންދާ ގޮތުންވެސް، އެމްޑީޕީގެ ގްރާސް ރޫޓުގައި، ރައީސް ސާލިހުގެ ފެކްޝަންއާއި، ރައީސް ނަޝީދުގެ ފެކްޝަންގެ އިތުބާރާއި ތާއީދު އޮތްގޮތް ވަރަށް ރަގަޅަށް ވަޒަން ކުރެވިގެން ދާނޭ ކަމީވެސް ގަބޫލުކުރަން ޖެހޭ ހަގީގަތެކެވެ.

ނަތީޖާއިން ގިނަ ކަންކަން ސާފު ވެގެންދާނެ!

ކޮންމެއަކަސް، މާދަމާ ބޭއްވުމަށް ހަމަޖެހިފައިވާ، އެމްޑީޕީގެ އެތެރޭގެ އިންތިޚާބު ހުރިހާ ގޮތަކުންވެސް މޭރުން ކުރަންޖެހެނީ، ކުރިޔަށް އޮތް 2023ގެ ރިޔާސީ އިންތިޚާބާ ގުޅި ލާމެހިފައި ވާ އިންތިޚާބެއްގެ ގޮތުގައެވެ. އަދި އެޕާޓީގެ ތެރޭގައި ރަސްމީ ސިފައެއްގައި އުފެދިގެން ގޮސްފައިވާ ދެފެކްޝަންގެ ދެމެދުގައި އޮތް ވާދަވެރިކަންވެސް ވަރަށް ރަގަޅަށް ރަމްޒު ކޮށްދޭ އިންތިޚާބެއްގެ ގޮތުގައިވެސްމެއެވެ.

އޭގެ އިތުރުންވެސް، މި އިންތިޚާބުގެ ނަތީޖާ ވެގެންދާނީ މަޖިލިސް ރައީސް މުހަންމަދު ނަޝީދު، ރާއްޖޭގެ މިވަގުތު އޮތް ރިޔާސީ ނިޒާމް އުވާލާ، ރާއްޖެއަށް ބަރުލަމާނީ ނިޒާމެއް ގެނައުމަށް މިހާރު ކުރައްވަމުން ގެންދަވާ މަސައްކަތްތަކައްވެސް ކުރިމަތިވެގެންދާނެ ވަރަށް ބޮޑު އިމްތިހާނެއްގެ ގޮތުގައިކަންވެސް މި ފުރުސަތުގައި ފާހަގަ ކޮށްލަންޖެހެއެވެ.

ސަބަބަކީ، އެމްޑީޕީގެ މިފަހަރުގެ ގައުމީ މަޖިލިސް އިންތިޚާބުގައި ވާދަކުރާ ކެނޑިޑޭޓުންގެތެރެއިން އެމަނިކްފާނު ތާއީދު ކުރައްވާނީ، ބަރުލަމާނީ ނިޒާމަށް ތާއީދުކުރާ ކެނޑިޑޭޓުންނަށް ކަމަށް މީގެކުރިން ނަޝީދު އިއުލާން ކުރައްވާފައި ވާތީއެވެ. އަދި އޭގެ ނަތީޖާއެއްގެ ގޮތުން، މިއަދު ގިނަ ބަޔަކު މި އިންތިޚާބު ސިފަކުރަމުންދަނީ އެއްގޮތަށްވުރެ ގިނަ ގޮތްގޮތުން، ނަޝީދުގެ ސިޔާސީ މުސްތަގުބަލާވެސް ގުޅިލާމެހިފައިވާ އިންތިޚާބެއްގެ ގޮތުގައެވެ.

އެހެންކަމުން، ގިނަ ބަޔަކު މިހާރު ކުރަމުންދާ ހިފެހެއްޓުމެއް ނެތް އިންތިޒާރަކީ، ރައީސް ނަޝީދުއާއި ރައީސް ސާލިހުއާ ދެބޭފުޅުންގެ މި ގަދަ ހިފުމުން ގަދަވާނީ ކޮންބޭފުޅެއްތޯ ބެލުމަށް ކުރަމުންދާ އިންތިޒާރެވެ. އަދި ހަމައެފަދައިން، އެމްޑީޕީގެ ގައުމީ މަޖިލިހުގެ އިންތިޚާބު ކާމިޔާބު ކޮށް، 2023ގެ ރިޔާސީ ޓިކެޓް އެޕާޓީގެ ތެރެއިން ކަށަވަރު ކުރުމުގައި ކުޅިފަސް ހޯއްދަވާނީ ކޮން ބޭފުޅެއްތޯ ދުރާލާ ދެނެގަތުމަށް ކުރަމުންދާ އިންތިޒާރެވެ.

އަދި ވަކީން ޚާއްސަކޮށް، މިއިންތިޚާބު މިއަދު ގިނަ ބަޔަކު ސިފަކުރަމުންދަނީ، ފެށުނީއްސުރެ އެމްޑިޕީގެ އެތެރޭގައި ރައީސް ނަޝީދަށް އޮތް ކޮންޓްރޯލު ގެއްލި، އެމްޑީޕީގެ ގްރާސް ރޫޓުގެ ތާއީދުވެސް އެމަނިކްފާނަށް މިހާރު ނެތްކަމަށް ގިނަ ބަޔަކު ބުނަމުންދާ ބުނުމުގެ ހަގީގަތްވެސް ވަރަށް ފުރިހަމަޔަށް ސާފުވެގެންދާނެ އިންތިޚާބެއްގެ ގޮތުގައެވެ.

އަދި ހަމަ އެފަދައިން އެޕާޓީގެ ގައުމީ މަޖިލީހާއި، ޕާލަމެންޓްރީ ގުރޫޕްގެ ސާފު މެޖޯރިޓީވެސް ރައީސް ސާލިހުގެ އަތްޕުޅުގައި އޮތްކަމަށް އެމަނިކްފާނު ވިދާޅުވާ ވިދާޅުވުމުގެ ހަގީގަތްވެސް އޭގެ ޒާތުގައި ވަރަށް ފުރިހަމަޔަށް އެގި ހާމަވެގެންދާނެ އިންތިޚާބެއްގެ ގޮތުގައި ވެސްމެއެވެ.