ގާހިރާ (26 އޮކްޓޯބަރު 2026) — ޔަމަނުގެ ހޫތީން ދެމުންދާ ހަމަލާތަކުން ސައޫދީ އަރަބިއްޔާ ދިފާއުކުރުމަށް އަސްކަރީ އެހީ ފޯރުކޮށްދިނުމުގެ ހުއްދަ، މިސްރުގެ ރައީސް އަބްދުލްފައްތާހް އަލް-ސީސީއަށް އެ ގައުމުގެ ރައްޔިތުންގެ މަޖިލީހުން ދީފި އެވެ.
މި ގަރާރު ފާސްކުރީ މަޖިލީހުގެ ތިންބައިކުޅަ ދެބައިގެ އަޣްލަބިއްޔަތުންނެވެ. ވޯޓަށް އެހުމުގެ ކުރިން ސިއްރު ތިން ބައްދަލުވުމެއް ބޭއްވި އިރު، ވޯޓު ދެ ފަހަރު ފަސްކުރި އެވެ. މި ހުއްދައާ އެކު، ސައޫދީއަށް އެހީވުމަށް ބޭނުންވާ އަވަސް ފިޔަވަޅުތައް އެޅުމުގެ ބާރު ރައީސް ސީސީއަށް ލިބިގެންދާނެ އެވެ.
ރައީސް ސީސީ ވިދާޅުވީ، މި އެހީއަކީ ސައޫދީގެ އިސްތިގުލާލު ރައްކާތެރިކުރުމަށް ދޭ އެހީއެއް ކަމަށާއި، ޔަމަނަށް ހަމަލާދިނުމުގެ ނިޔަތެއް ނެތް ކަމަށެވެ. ނަމަވެސް، ފޯރުކޮށްދޭނެ އެހީގެ ބާވަތާއި ދާއިރާ ހާމައެއް ނުކުރެ އެވެ.
އަރަބި ދުނިޔޭގެ އެންމެ ބޮޑު އަސްކަރީ ބާރަކީ މިސްރެވެ. އަދި ސީސީގެ ވެރިކަމަށް މާލީ އަދި ސިޔާސީ ގޮތުން އެންމެ ބޮޑަށް އެހީތެރިވެދޭ އެއް ގައުމަކީ ސައޫދީ އެވެ.
ރެޑް ސީ އާއި ބާބު އަލް-މަންދަބު ސަރަހައްދުގައި ހޫތީން ދޭ ހަމަލާތަކުގެ ސަބަބުން، ސުއޭޒް ކެނަލުން މިސްރަށް ލިބޭ އާމްދަނީ ވަނީ ވަރަށް ބޮޑަށް ދަށްވެފަ އެވެ.
ކޮމެންޓު ފޮނުވާ