ބްރެޒިލްގެ ރިޔާސީ އިންތިޚާބުން ލުއިޒް އިނާސިއޯ ލޫލާ ދަ ސިލްވާ ކާމިޔާބުކުރެއްވީ އޮޅުވާލާފައިވާ އިންތިޚާބަކުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. ނަމަވެސް އެ ތުހުމަތު ސާބިތުކުރާނެ އެއްވެސް ހެއްކެއް ޓްރަމްޕް ހުށަހަޅުއްވާފައެއް ނުވެ އެވެ.
ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ވަކި ފަރާތަކަށް ނުޖެހޭ ނަމަވެސް، އިންތިޚާބު ހިނގާދިޔަ ގޮތް ފެނުނީ ވަރަށް ގޯސްކޮށް ކަމަށެވެ.
ޓްރަމްޕްގެ ބަޔާނާ ހިލާފަށް، ލޫލާއާ ވާދަކުރެއްވި ކަނާތުފިޔަވައިގެ ކެންޑިޑޭޓް ފްލާވިއޯ ބޮލްސޮނާރޯ ނިސްބަތްވާ ލިބަރަލް ޕާޓީން ވަނީ ނަތީޖާ ގަބޫލުކޮށްފަ އެވެ. ހޯމަ ދުވަހުގެ ފަހުކޮޅު ނެރުނު ބަޔާނެއްގައި ޕާޓީގެ ރައީސް ވަލްޑެމާ ކޮސްޓާ ނެޓޯ ވިދާޅުވީ، ދެވަނަ ބުރުގެ ނަތީޖާ ގަބޫލުކުރާ ނަމަވެސް، ފާހަގަކުރެވުނު މައްސަލަތަކަށް ސާފު ޖަވާބު ލިބެންޖެހޭ ކަމަށެވެ.
ކުރީގެ ރައީސް ޖައިރް ބޮލްސޮނާރޯގެ ދަރިކަލުން ފްލާވިއޯ، ފުރަތަމަ ވަނީ ބަލިވުން ގަބޫލުކުރަން އިންކާރުކުރައްވާފަ އެވެ. ސުޕްރީމް ކޯޓުން ވޯޓުލުމުގެ ވަގުތު ދެ ގަޑިއިރަށް އިތުރުކުރުމުން، ނަތީޖާ ބާތިލުކުރުމަށް މަސައްކަތްކުރައްވާނެ ކަމަށް އޭނާ ވިދާޅުވި އެވެ. ނަމަވެސް ގޭބަންދުގައި ހުންނަވާ ބައްޕައާ ބައްދަލުކުރެއްވުމަށްފަހު، ޕާސްޕޯޓް ހަވާލުކުރުމަށް ފެޑަރަލް ފުލުހުން ކުރި އަމުރަށް ތަބާވާނެ ކަމަށް އޭނާ ވިދާޅުވި އެވެ. އަދި ގައުމު ދޫކޮށް ފިލަން އުޅޭ ކަމަށް ދެކެވޭ ވާހަކަ ވެސް އޭނާ ދޮގުކުރެއްވި އެވެ.
ޓްރަމްޕް ރަސްމީކޮށް ބޮލްސޮނާރޯއަށް ތާއީދު ނުކުރެއްވި ނަމަވެސް، ބޮލްސޮނާރޯގެ އާއިލާ އަނބުރާ ވެރިކަމަށް ގެނައުމަށް އެމެރިކާގެ ސްޓޭޓް ޑިޕާޓްމަންޓުގެ އޮފިޝަލުން ކެމްޕޭނެއް ހިންގި ކަމަށް ރޮއިޓާސް އިން ރިޕޯޓުކޮށްފައިވެ އެވެ. ބޮލްސޮނާރޯ ބަލިވީ ހަތަރު މިލިއަނަށްވުރެ ގިނަ ވޯޓުގެ ތަފާތުންނެވެ.
ކޮމެންޓު ފޮނުވާ