މަޝްހޫރު ފިލްމީ ތަރި ޝީލްޕާ ޝެއްޓީގެ ފިރިމީހާ، ވިޔަފާރިވެރިޔާ ރާޖް ކުންދުރާ ކަފާލާތުގެ ދަށުން މިނިވަން ވެއްޖެއެވެ.
ބަރަހަނާ ވީޑިއޯ ހަދައި އޭގެ ވިޔަފާރި ކުރިކަމުގެ ތުހުމަތުގައި ރާޖް ހައްޔަރުކުރިތާ ދެ މަސްފަހުން ކަފާލާތުގެ ދަށުން ދޫކޮށްލާފައިވަނީ އިއްޔެއެވެ.
ޖުލައި 19ގައި ހައްޔަރު ކުރި ރާޖް ދޫކޮށްލާފައިވަނީ ކަފާލާތަށް 50،000 ރުޕީސް ދެއްކުމުންނެވެ. މި މައްސަލާގައި ރާޖާއެކު އެނާގެ ވިޔަފާރީގެ ބައިވެރިއެއް ކަމުގައިވާ ރަޔަން ތޯޕީވެސް ހައްޔަރު ކުރިއެވެ. އޭނާ ވެސް ވަނީ ކަފާލާތުގެ ދަށުން ދޫކޮށްލާފައެވެ.
މުމްބާއިީ ފުލުހުންގެ ކްރައިމް ބްރާންޗުން މީގެކުރިން ބުނެފައިވާ ގޮތުގައި ބަރަހަނާ ވިޑިއޯގެ ވިޔަފާރި ކުރުމުގައި އެންމެ އިސްކޮށް އުޅުނީ ރާޖެވެ. އަދި މި ވިޔަފާރީގައި އިނގިރޭސިވިލާތުގައި ތިބި އޭނާގެ ޕާޓްނަރުންގެ ހިއްސާވެސް އޮތް ކަމަށް ފުލުހުން އޭރު ވަނީ ބުނެފައެވެ. ބަރަހަނާ ވީޑިއޯތައް ދައުރު ކޮށްފައިވަނީ ހޮޓްޝޮޓް ކިޔާ އެޕެއް ބޭނުންކޮށްގެނެވެ.
ފުރަތަމަ ދުވަހުން ފެށިގެންވެސް ރާޖްވަނީ މި ތުހުމަތު ތަކަށް އިންކާރު ކޮށްފައެވެ. އަދި ޝިލްޕާވެސް ބުނެފައިވަނީ މި ކަމާ ގުޅޭގޮތުން އޭނާއަށް އެއްވެސް މައުލޫމާތެއް އެނގިފައި ނުވާ ކަމަށެވެ. އަދި ރާޖް ބަރަހަނާ ފިލްމް ހެދީ ނޫންކަމަށާއި އެއީ "އިރޮޓިކް" ފިލްމް ތަކެއް ކަމަށް ބުނެ އެކަން ދިފާއުކޮށް ޝިލްޕާ ވަނީ ވާހަކަ ދައްކާފައެވެ.
ރާޖްގެ މައްސަލަ ކުރިއަށް ދާއިރު މުމްބާއީ ފުލުހުން ވަނީ 1400 ސޮފްހާގެ ލިޔެ ކިޔުން ހެކީގެ ގޮތުގައި ކޯޓަށް ހުށައަޅާފައެވެ.
ޝިލްޕާ އާއި ރާޖް ކައިވެނި ކޮށްފައިވަނީ 2009 ވަނަ އަހަރުއެވެ. މި ކައިވެންޏަށް 2 ދަރިން ލިބިފައިވެއެވެ.
