ސިވިލް ސާވިސްގައި މަސައްކަތް ކުރާ މުވައްޒަފުންގެ މުސާރަތައް ހެޔޮ ބަދަލެއް ގެނެސްދިނުމަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފިއެވެ.
މިމައްސަލަ މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ ބިލެއްތްދޫ ދައިރާގެ މެމްބަރު އަހުމަދު ހަލީމްއެވެ. ހަލީމް ހުށަހެޅުއްވި މިމައްސަލާގައި ބުނެފައިވަނީ ސިވިލް ސަރވިސާވަންޓުންނަށް ލިބެމުންދާ އުޖޫރައަކީ އެ މުވައްޒަފުން ހުއްޓުމެއްނެތި ދެއްވަމުން ގެންދާ ހިދުމަތާބަލާއިރު އެކަށީގެންވާ އުޖޫރައެއް ނޫންކަމަށެވެ. ސިވިސް ސަރވިސްގެ މުވައްޒަފުންނަށް ލިބެމުންދާ އުޖޫރައާ ރަނގަޅު ކުރުމަށްޓަކައި ސަރުކާރުގެ މުވައްޒަފުންގެ މުސާރައިގެ އޮނިގަނޑު ލަސްނުކޮށް ނިންމުމަށް މިމައްސަލާގައިވަނީ ސަރުކާރަށް ގޮވާލާފައެވެ.
މައްސަލަ ހުށަހަޅުއްވަމުން އަހްމަދު ހަލީމް ވިދާޅުވީ ސިވިލް ސާވިސްގައި އުޅޭ މުވައްޒަފުންނަށް މިއަދު ލިބެނީ ހަމަޖެހިގެން ދިރިއުޅެވޭ ވަރުގެ މުސާރައެއް ކަމަށް ގަބޫލުނުކުރައްވާ ކަމަށެވެ. ދައުލަތް ހިންގުމަށް އެންމެ ގިނަ މަސައްކަތް ކުރަމުން ގެންދާ ބަޔަކީ ސިވިލް ސާވިސްގެ މުވައްޒަފުން ކަމަށްވާތީ އެ މީހުންނަށް ރަނގަޅު މުސާރައެއްދީ ހަމަޖެހިގެން ދިރިއުޅެވޭނެ ގޮތްތަކެއް ހޯދައިދޭން ޖެހޭނެ ކަމަށެވެ.
ސިވިލް ސަރވަންޓުންގެ މުސާރާއިގެ މައްސަލާއިގައި ހުރި ކަންބޮޑުވުންތަކާއި ގުޅިގެން ސަރުކާރުން ވިދާޅުވީ ނޭޝަނަލް ޕޭ ކޮމިޝަނުން މިހާރު މަސައްކަތްކުރަމުން އަންނަ ޕޭ ފްރޭމްވޯކް އޮތީ ނިމުމުގެ އެންމެ ފަހުގެ މަރުޙަލާގައިކަމަށެވެ. އަދި މި ފްރޭމްވޯކްގެ މަސައްކަތް ނިމި ތަންފީޒުކުރަން ފެށުމާއެކު ސިވިލް ސަރވިސްގެ އެންމެ އާދައިގެ މުވައްޒަފުންގެ މުސާރައިންވެސް ހެޔޮ ބަދަލެއް ފެންނާނެކަމަށް ސަރުކާރުން ވިދާޅުވެއެވެ. އަދި ސަރުކާރުގެ އަމާޒަކީ ޕޭ ފްރޭމްވޯކްގެ މަސައްކަތް މިއަހަރު ނިންމާ އަންނަ އަހަރު ޢަމަލުކުރަންފެށުންކަމަށްވެސް ސަރުކާރުން ވިދާޅުވެއެވެ.
މި ފްރޭމްވޯކްއާއެކު ސަރުކާރުގެ މުވައްސަސާތަކުގެ މެދުގައި މިހާރު ފެންނަ މުސާރާއިގެ ފަރަގުތަކާއި އެކި ފަންނުތަކުގެ މެދުގައި އޮތް މުސާރާއިގެ ފަރަގުވެސް ނައްތާލެވޭނެކަމަށް ސަރުކާރުން ވިދާޅުވެއެވެ. ސަބަބަކީ މިފްރޭމް ވޯކްގެ ދަށުން މުސާރައާއި ޢިނާޔަތްތައް ދޭނީ ކަނޑައެޅިފައި އޮންނަ އެއްހަމައަކުން ކަމަށްވާއިރު ކޮންމެ ފަންނަކަށްވެސް އެފަންނަކާއި އެކަށީގެންވާ ގޮތެއްގައި މުސާރައާއި ޢިނާޔަތްތައް މި ފްރޭމްވޯކްގައި ބަޔާންކޮށްފައި އޮތުމުންކަމަށް ސަރުކާރުން ފާހަގަކުރައްވައެވެ.
ސިވިލް ސަރވިސްގެ މުވައްޒަފުންގެ ޝަކުވާގެ ތެރޭގައި މަޤާމުގެ މަސްއޫލިއްޔަތާއި ލިބިފައިވާ ޢިލްމީ ޤާބިލުކަމާއި ތަޖުރިބާއަށް އެކަށީގެންވާ މުސާރައާއި ޢިނާޔަތްތައް ނުލިބުމުގެ ޝަކުވާ ހިމެނެއެވެ. އަދި އަދާކުރަންޖެހޭ މަސައްކަތުގެ ބުރަކަމާއި ކުރިމަތިވާ އެކި ހިރާސްތަކާއި ޖިސްމާނީ ބުރަތަކަށް ރިޢާޔަތްކުރާއިރު މުސާއަރާއި ޢިނާޔަތްތައް އެކަށީގެންނުވާކަމުގެ ޝަކުވާވެސް ހިމެނެއެވެ. ސަރުކާރުން ވިދާޅުވީ އަލަށް އެކުލަވާލާ ޕޭ ފްރޭމްވޯކާއެކު މިމައްސަލައަށް ޙައްލެއް ލިބިގެންދާނެކަމަށާއި، ފްރޭމްވޯކްގައި މިހުރިހާ ދާއިރާއަކަށް އަލިއަޅުވާލާފައިވާނެކަމަށެވެ.
