ކުރިޔަށް އޮތް 2023ގެ ރިޔާސީ އިންތިޚާބުގައި މިހާރުގެ ރައީސުލްޖުމްހޫރިއްޔާ އިބުރާހިމް މުހައްމަދު ސާލިހުއަށް ވާދަކުރުމުގެ ފުރުސަތު ގެއްލިއްޖެނަމަ، އެންމެ ރަގަޅު ޗޮއިސްއަކީ، ޖުމުހޫރީ ޕާޓީގެ ލީޑަރު ގާސިމް އިބުރާހިމް ކަމުގައި، މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަައުދުﷲ އަހުމަދު ވިދާޅު ވެއްޖެއެވެ.
ސައުދު ވިދާޅުވީ، ރައްޔިތުން ކުރިޔަށް ދާންވާނީ، މާޒީން އިބުރަތް ހާސިލް ކޮށްގެން ކުރިޔަށް ދާން ކަމަށާއި، ގާސިމް އިބުރާހީމަކީ، އަމަލީގޮތުން ތަޖުރިބާ ގައުމަށް ދައްކަވާފައިވާ ބޭފުޅެއް ކަމަށެވެ. އަދި ގާސިމްއަކީ ނަތިޖާވެސް ނެރެދެއްވާފައި ހުންނެވި ހިންގުންތެރިއެއް ކަމަށާއި، ރާއްޖޭގައި މިހާރު ވެރިކަން ކުރަމުންދާ ރިޔާސީ ނިޒާމުގައި ހުރި އަސާސްތައް ފުރިހަމަ ކޮށްދެއްވޭނެ ފަދަ ލީޑަރަކީވެސް ގާސިމް އިބުރާހިމް ކަމުގައި ސަދު ވިދާޅުވެފައިވެއެވެ.
2023ge riyasee inthihaab enme Qaabil beyfulhakee JP leader @qasimibrahim .Amalee gothun thajuribaa Qaumah dhahkavafa natheejaa neredheefa huri hingun theri eh.Qaumuge ohnan rahyithun nihmaafa oih riyaasee nizam ge huri asaasthah furihama kohheveyne fadha leader eh.@KhabaruOnline
— Saudulla Ahmed (@saudullaahmed1) September 14, 2021
އެހެންކަމުން، 2023ގައި އޮންނަ ރިޔާސީ އިންތިޚާބުގައި ވާދަ ކުރައްވަން އެންމެ އެކަށީގެންވާ ލީޑަރަކީ ގާސިމް އިބުރާހިމް ކަމުގައި ސައުދު ވިދާޅުވެފައި ވެއެވެ.
ގާސިމް އިބުރާހިމަކީ 2023ގެ ރިޔާސީ އިންތިޚާބަށް އެންމެ އެކަށީގެންވާ ލީޑަރު ކަމުގައި ސައުދު ވިދާޅުވެފައިވާއިރު، ރޭ ކުނޫޒުގައި ބޭއްވި ނޫސްވެރިންގެ ބައްދަލުވުމުގައި ޖޭޕީގެ ލީޑަރު ގާސިމް އިބުރާހިމް ވިދާޅުވެފައިވަނީ ރިޔާސީ އިންތިޚާބާމެދު ވިސްނަން އަދި މާ އަވަސް ކަމުގައެވެ. އަދި ޖުމުހޫރީ ޕާޓީން 2023ގެ ރިޔާސީ އިންތިޚާބުގައި ވާދަ ކުރާނޭ ބޭފުޅަކު ނިންމާނީ ޖޭޕީގެ ކައުންސިލުން ކަމުގައިވެސް ގާސިމް ވިދާޅުވިއެވެ.
2023ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބަށް ކުރިޔަށް 2 އަހަރެއްހާ ދުވަސް އޮތްއިރު، މިއިންތިޚާބުގައި ވާދަކުރައްވާނެ ކަމަށް މިހާތަނަށް އިއުލާން ކުރައްވާފައިވާ ހަމައެކަނި ކެނޑިޑޭޓަކީ އެމްޑީޕީގެ ރައީސް މުހައްމަދު ނަޝީދެވެ. މީގެ އިތުރުން މިހާރުގެ ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު ވިދާޅުވެފައިވަނީ، ރިޔާސީ އިންތިޚާބާމެދު ވިސްނަވާނީ ތަރައްގީގެ މަޝްރޫޢުތައް ކުރިޔަށް ގެންދެވުމަށް ފަހުގައި ކަމުގައެވެ.
