މިސަރުކާރަކީ އަނިޔާއާއި އަބަދުވެސް ދެކޮޅު ސަރުކާރެއް ކަމަށާއި އެއްވެސް މީހަކަށް އަނިޔާއެއް ދިނުމަށް މިސަރުކާރުން ތާއީދު ނުކުރާނެކަމަށް ރައްޔިތުންގެ މަޖިލީހުގެ ހަނިމާދޫ ދާއިރާ މެމްބަރު ޢަބްދުލް ޣަފޫރު މޫސާ ވިދާޅުވެއްޖެއެވެ.
ހުޅުމާލޭ ޖަލުގައި ހުކުމް ތަންފީޒު ކުރަމުންދިޔަ ގައިދީއަކު ކުއްލި ގޮތަކަށް ނިޔާވި މައްސަލައިގައި ކަމާބެހޭ ފަރާތްތަކުން އިހުމާލުވެފައިވާ ކަމަށް ޢާއިލާއިން ކުރާ ތުހުމަތު ތަޙްޤީޤުކޮށްދިނުމަށް ސަރުކާރަށް ގޮވާލާ ހުށައަޅާ ކުއްލި މައްސަލާއިގައި ވާހަކަ ދައްކަވަމުން ޣަފޫރު ވިދާޅުވީ ނިމިދިޔަ ސަރުކާރު އޮތްއިރު ޖަލުގައި 10 މީހަކު މަރުވިކަމަށެވެ. ނަމަވެސް މިސަރުކާރުގައި ނިޔާވީ އެންމެ މީހެއްކަމަށެވެ.
މިރެކޯޑްތަކުންވެސް ކުރީ ސަރުކާރާއި މިސަރުގެ ތަފާތު ފެންނަމުންދާކަމަށެވެ. އަދި މިހާރު ޖަލުގައި ނިޔާވި މީހާގެ މަރުގެ މައްސަލާގައި އިންސާފު ހޯދުމަށް ކުރަންޖެހޭ ހުރިހާ ކަމެއް ސަރުކާރުން ކުރާނެކަމަށް ޣަފޫރު ވިދާޅުވިއެވެ. އޭނާ ވިދާޅުވީ މިސަރުކާރުން އެއްވެސް ރައްޔިތަކަށް އަނިޔާވެރިވުމަށް ތާއީދު ނުކުރާނެކަމަށެވެ. އަދި އިންސާފު ގާއިމް ކުރުމަކީ މިސަރުކާރުގެ އެންމެ ބޮޑު ވައުދު ކަމަށެވެ.
ސަރުކާރަށް ތިން އަހަރު. ޖަލުގައި އެންމެ މީހަކު މަރުވީ. ކުރީ ސަރުކާރުގައި ޖަލުގައި 10 މީހުން އެބައޮތް މަރުވެފައި. އެހެންވީމަ ކަންކަން ބެލޭ އެބަ ރަނގަޅަށް. 10 މީހުންގެ ތެރެއިން އެންމެ މީހެއްގެ މައްސަލަވެސް މަޖިލީހަށް ހުށަނޭޅޭ. ރެކޯޑް ކާޑު އެހެންވީމާ ގޯހެއްނޫން. މިމައްސަލާގައި ސަރުކާރުން ބަލަންޖެހޭ ހުރިހާ ކަމެއް ބަލާނެ. އިހުމާލެއްވޭތޯ ބަލާނެ. އަޅުގަނޑުމެންނެއް އަނިޔާ ވެރިއެއް ނުވާނެ. މިސަރުކާރުން އަނިޔާވެރިއެއް ނުވާނެ. އެމްޑީޕީއަކުން އަނިޔާވެރިއެއް ނުވާނެ.
– ޣަފޫރު ވިދާޅުވިއެވެ.
މިމައްސަލަ މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރެވެ. މިމައްސަލައިގައި ބުނެފައިވަނީ ހުޅުމާލޭ ޖަލުގައި 3 އަހަރުގެ ޖަލު ހުކުމެއް ތަންފީޒު ކުރަމުންދިޔަ ގދ.ވާދޫ ޖަނަވަރީގެ ޢުމުރުން 40 އަހަރުގެ މުޙައްމަދު އަސްލަމް ރޭ ކުއްލި ގޮތަކަށް ނިޔާވެފައިވާއިރު، މުޙައްމަދު އަސްލަމްގެ މަރުގެ މައްސަލަ ޢާއިލާއަށް ނާންގާ ސިއްރު ކުރުމަށް މަސައްކަތްކޮށްފައިވާ ކަމަށް ޢާއިލާއިން ބުނަމުންދާކަމަށެވެ.
ހުޅުމާލޭ ޖަލުގައި އޭނާ ހުއްޓާ ބަލިވެގެން ހުޅުމާލޭ ހޮސްޕިޓަލަށް އިއްޔެ ހަވީރު 5:30 ހާއިރު މުޙައްމަދު އަސްލަމް ގެންދެވިފައިވާ ކަމަށާއި ނަމަވެސް ޢާއިލާއަށް މިކަމުގެ މަޢުލޫމާތު ލިބިފައިވަނީ އަސްލަމް ނިޔާވެއްޖެ ކަމަށްބުނެ އެހެން ފަރާތަކުން ގުޅާފައި ދިން މަޢުލޫމާތަކުން އިރުއޮއްސި ހަތެއްޖެހިފަހުން ކަމަށެވެ. ނިޔާވިތާ އެތައް އިރެއްވީއިރުވެސް އާއިލާއަށް އަސްލަމް ނިޔާވެފައިވާކަން އަންގާފައިނުވާކަމަށް ވަނީ ބުނެފައެވެ.
ކަރެކްޝަނުން ބުނެފައިވަނީ ނިޔާވެފައިވަނީ ހުޅުމާލެ ޖަލުގައި 3 (ތިން) އަހަރުގެ ޖަލު ޙުކުމެއް ތަންފީޒު ކުރަމުންދިޔަ ގދ. ވާދޫ/ ޖަނަވަރީގެ، އުމުރުން 40 އަހަރުގެ މުޙައްމަދު އަސްލަމް ކަމަށެވެ. އޭނާ ރޭ ގާތްގަނޑަކަށް 6:00 ޖަހާ އެހާކަށްހާއިރު ޔާޑު ސަރަހައްދުގައި އިށީދެގެން އިންދާ ކުއްލިއަކަށް ވެއްޓުމާ ގުޅިގެން އިމަރޖެންސީ ހާލަތުގައި ހުޅުމާލެ ހޮސްޕިޓަލަށް ގެންގޮސްފައިވާ ކަމަށާއި، އަދި ހޮސްޕިޓަލުން ބެލުމަށްފަހު އޭނާ ނިޔާވެފައިވާ ކަމަށް ރޭ 20:23 ގައި މައުލޫމާތު ދީފައިވާކަމަށެވެ.
އަސްލަމަކީ މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޛުކުރަމުންދިޔަ މީހެކެވެ. އަދި ނިޔާވިއިރު މީނާއަކީ ބޮޑު ބައްޔަކަށް ބޭސްފަރުވާ ކުރަމުންދިޔަ މީހެއް ނޫންކަމަށް ކަރެކްޝަނުން ބުނެއެވެ.
އަސްލަމް ހުޅުމާލެ ހޮސްޕިޓަލަށް ގެންދިއުމާ ގުޅިގެން އެކަން އިންސްޕެކްޓަރ އޮފް ކަރެކްޝަނަލް ސަރވިސް، މޯލްޑިވްސް ޕޮލިސް ސަރވިސް އަދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށް އަންގާފައިވާ ކަމަށް ކަރެކްޝަނުން ވަނީ ބުނެފައެވެ.
