ސައިފް އަލީ ޚާނާއި ރިތިކް ރޯޝަނާއެކު އިއުލާން ކޮށްފައިވާ "ވިކްރަމް ވެދާ"ގެ ހިންދީ ރިމޭކްގައި ނަށަންޖެހޭ އެއްވެސް ކަހަލަ މަންޒަރެއް ހިމެނޭނަމަ އެ ފިލްމް ނުކުޅޭނެ ކަމަށް ސައިފް ބުނެފިއެވެ.
ބޮލީވުޑްގެ އެންމެ މޮޅު ހުނަރުވެރި ޑާންސާގެ ގޮތުގައި ގިނަ ބަޔަކު ރިތިކް ސިފަކުރާއިރު ސައިފަކީ ނަށަން އެނގޭ މީހެއް ނޫންކަމަށް އޭނާ ބުނެއެވެ. އަދި ނަށަން ޖެހޭނަމަ ރިތިކާއެކު ފިލްމް ނުކުޅޭނެ ކަމަށް ވެސް އޭނާ ވަނީ ބުނެފައެވެ.
ސައިފާއި ރިތިކް ވަނީ 2002 ވަނަ އަހަރުގެ ފިލްމް "ނަތުމް ޖާނޯ ނަހަމް" އިން އެކުގައި ފެނިގެން ގޮސްފައެވެ. ނަމަވެސް އެ ފިލްމް ގައި އޭނާ ކުޅެފައިވަނީ ވަރަށް ކުޑަ ރޯލެކެވެ.
ޕިންކް ވިލާއާ ވަހަކަ ދައްކަމުން ސައިފް ބުނެފައިވާގޮތުން ރިތިކާއި އެކު މަސައްކަތް ކުރުމަށް އޭނާ ހުރީ ކެތްމަދުވެފައެވެ. އަދި މި ފިލްމަކީ މީގެ އޮރިޖިނަލް ފިލްމް ފަަދަ ހިޓު ފިލްމަކަށް ވާނެ ކަމަށް އުންމީދު ކުރާ ކަމަށްވެސް ސައިފް ވަނީ ބުނެފައެވެ.
"ވިކްރަމް ވޭދާ" އަކީ 2017 ވަނަ އަހަރު ރިލީޒް ކުރި ޓަމިލް ހިޓު ފިލްމެކެވެ.
މި ފިލްމުން ފެނިގެން ގޮސްފައިވަނީ އާރް މާދަވަން އާއި ވިޖޭ ސެތުޕަތީއެވެ. މި ފިލްމުގެ ވާހަކަ އެނބުރޭނީ ވިކްރަމް ކިޔާ ފުލުހަކާއި ވޭދާ ކިޔާ ކުއްވެރިއަކާ ދެމެދުގައެވެ.
ކޮމެންޓު ފޮނުވާ