ޖުޑީޝަރީ ކޮމިޓީ ފެއިލްވެފައިވާކަމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީގެ މެންބަރު އަދި ވިލިނގިލި ދާއިރާގެ މެންބަރު ސަޢުދު ޙުސައިން ވިދަޅުވެއްޖެއެވެ.
ޕްރޮސެކިއުޓަރ ޖެނެރަލްގެ އޮފީހުގެ މަސައްކަތްތަކާއި ގުޅޭގޮތުން ޕީޖީ ޙުސައިން ޝަމީމް ޙާޒިރުކޮށްގެން ކުރިއަށްގެންދިޔަ ކޮމިޓީ ބައްދަލުުމުގައި ސަޢުދު ވިދާޅުވީ، ޖުޑީޗަރީ ކޮމިޓީން އެކޮމިޓީގެ ޒިންމާ ނަގަމުން ނުދާކަމަށެވެ. ސަޢުދު ވިދާޅުވީ ކޯޓުތަކުން މައްސަލަތައް ނިންމުން ލަސްވާ މައްސަލައަކީ އަބަދުވެސް އޮންނަ ޝަކުވާއެއްކަމަށާއި، އެކަމަށްވެސް ކޮމިޓީއަށް މަސައްކަތެއް ކުރެވިފައިނުވާކަމަށެވެ.
ރައްޔިތުންގެ މަޖިލީހުގެ ޖުޑީޝަރީ ކޮމިޓީން ކުރަންޖެހޭ ވަރަށް ގިނަ ކަންކަން ނުކުރެވިހުރިކަން މިއަދުވެސް ހާމަވެއްޖެ ޕްރޮސެކިއުޓަރ ޖެނެރަލް ޙާޒިރުކޮށްގެން އަޅުގަނޑުމެން މިކުރާ ސުވާލުންވެސް. ކޯޓުތަކުން މައްސަލަ ލަސްވެގެން އަޅަންޖެހޭ ފިޔަވަޅުތައް އަދިވެސް އަޅުގަނޑުމެންނަކަށް ނޭޅޭ. އަޅުގަނޑުމެންނަށް އެބަފެނޭ އަޅުގަނޑުމެންގެ ޒިންމާ އަޅުގަނޑުމެން ވަޢުދުވިގޮތަށް އަދައެއް ނުކުރެވޭ.
– ވިލިނގިލި ދާއިރާގެ މެންބަރު ސަޢުދު ޙުސައިން
ޖުޑީޝަލް ސާރވިސް ކޮމިޝަން އެކުލެވިގެންވާގޮތް އަދިވެސް ބަދަލު ނުކުރެވޭކަން ފާހަގަކުރައްވަމުން ސަޢުދު ވިދަޅުވި، ޖުޑީޝަރީ އިސްލާހުކުރެވޭ ވާހަކަ މިހާރު ނުވެސް ދެކެވޭކަމަށެވެ.
ކްރިމިނަލް ކޯޓްގަ ހައިކޯޓްގަ ރައޔިތުންގެ ފަރާތުން ތަކުރާރުކޮށް ޝަކުވަލިބޭ ގާޒީން އަދިވެސް އެބަތިބި. އެބޭފުޅުންގެ މައްސަލތަކަށް ވީގޮތެއްވެސް ނޭނގެ. ޖުޑީޝަރީ ކޮމިޓީން އެބަޖެހޭ ކޮމިޓީގެ ޒިންމާ އަދިވެސް ނަންގަވަން.
– ވިލިނގިލި ދާއިރާގެ މެންބަރު ސަޢުދު ޙުސައިން
ރައްޔިތުންގެ މަޖިލީހުގެ ޖުޑީޝިއަރީ ކޮމިޓީގެ 35 ވަނަ ބައްދަލުވުން pic.twitter.com/KpTOm0sBvX
— People's Majlis (@mvpeoplesmajlis) August 30, 2021
އެމްޑީޕީން ވެރިކަމަށް އައުމަށް ރައްޔިތުންނަށް ވިއްކި މެނިފެސްޓޯގައި އެމްޑީޕީން ހުށަހަޅާފައިވަނީ ފަނޑިޔާރުންނަށް ފާރަވެރިވެ، ފަނޑިޔާރުންގެ ސުލޫކީ މިންގަޑު ބެލެހެއްޓުމަށްއޮތް ޖުޑީޝަލް ސަރވިސް ކޮމިޝަން އެކުލެވިގެންވާ ގޮތަށާއި، އެކުލަވާލާ ގޮތަށް ބަދަލު ގެނައުމަށެވެ. ފަނޑިޔާރުންގެ ޒާތީ މަސްލަހަތާއި، ތައައްސަބުން އެއްކިބާވެފައިވާ ޖުޑިޝަލް ސަރވިސް ކޮމިޝަނެއް ގާއިމްކުރުމަށެވެ.
ފަނޑިޔާރުންގެ ޒާތީ މަސްލަހަތާއި، ތައައްސަބުން އެއްކިބާވެފައިވާ ޖުޑިޝަލް ސަރވިސް ކޮމިޝަނެއް ގާއިމްކުރުމަށް ހުށަހަޅާފައިވާ ކަންތައްތަކުގެ ތެރޭގައި، ޖޭއެސްސީ ގެ މެންބަރުން ކަނޑައަޅާއިރު ފަނޑިޔާރުންނާއި، މާޤާމުގެ ހައިސިއްޔަތުން ޢައްޔަންކުރެވޭ ފަރާތްތައް ކޮމިޝަންގައި ނުހިމެނުން އަދި ކޮމިޝަންގައި ހިމެނޭ ހުރިހައި މެންބަރުންނަކީ ޢާންމުރައްޔިތުންގެ ތެރެއިން ބަޔަކަށްވުމާއެކު، އެއްވެސް މެންބަރަކީ ވަކި ދާއިރާއަށް ޚާއްސަވެފައިވާ މީހަކަށް ވާންނުޖެހުމެވެ.
މީގެ އިތުރުން މެންބަރުންގެ ޝަރުޠުތަކުގެތެރޭގައި ޑިގްރީއެއް އޮތުމާއި، ކުށުގެ ރެކޯޑެއް ނެތުންފަދަ ޝަރުޠުތަކެއް ކަނޑައެޅިފައި އޮތުން ހިމެނެއެވެ. ނަމަވެސް މިއަދާއި ހަމައަށްވެސް މިވައުދު ފުއްދުމަށާއި، މެނިފެސްޓޯގައި ހުށަހަޅާފައިވާ ކަންކަން ތަންފީޒު ކުރުމަށް މާބޮޑު މަސައްކަތެއް ކުރެވިފައި ނުވާކަމަށް ބައެއް ފަރާތްތަކުން ތުހުމަތުކުރެއެވެ.
