ރައީސް ޔާމީންގެ ހުކުމާއި ގުޅޭގޮތުން ލީކުވެފައިވާ އޯޑިއޯއަކީ ފައިސާ ދީގެން އުފައްދާފައިވާ އޯޑިއޯއެއްކަމުގެ ތުހުމަތު ރައްޔިތުންގެ މަޖިލީހުގެ އެމްޑީޕީގެ ބައެއް މެންބަރުން ތުހުމަތުކުރައްވައިފިއެވެ.

ރައީސް ޔާމީންގެ ޝަރީއަތުގެ މަޖިލިސް ބެއްލެވި ތިން ފަނޑިޔާރެއްގެ އޯޑިއޯ ލީކުވި މައްސަލަގައި މަޖިލީހުގައި އިދިކޮޅު ފަރާތްތަކުން އިހުތިޖާޖުކުރައްވަމުން ގެންދިއުމާއި ގުޅިގެން މަޖިލިސް ޖަލްސާ ފެށުމާއެކު ވަނީ ތަޅުން ހޫނުވެފައެވެ. އިދިކޮޅު މެންބަރުން މަޖިލީހުގެ ރިޔާސަތު ކުރިމަތީގައި އިހުތިޖާޖުކުރައްވަމުން ގެންދެވިއިރު، މަޖިލިސް ނިޒާމީ އޮއިވަރެއްގައި ޖެހުނެވެ. އެމްޑީޕީގެ މެންބަރުން ގެންދެވީ ނިޒާމީ ނުކުތާތައް ނަންގަވާ އެއީ ޝަރުޢީ ދާއިރާއާއި ގުޅުންހުރި މައްސަލައެއްކަމުން ޝަރުޢީ ދާއިރާއަށް އެ އޯޑިއޯގެ މައްސަލަ ހުށައެޅުއްވުމަށް ގޮވާލައްވަމުންނެވެ.

މިގޮތުން ތިނަދޫ ދެކުނު ދާއިރާގެ މެންބަރު ޢަބްދުﷲ ސަނީފް ވިދާޅުވީ، މަޖިލީހަކީ ރާއްޖޭގެ ދުސްތޫރީ ކޯޓެއް ނޫންކަމަށެވެ.

މިއަދު ބައެއް ބޭފުޅުންނަށް ރައްޔިތުންގެ މަޖިލީހަކީ ކޯޓެއްކަމަށް ފެނިގެން އުޅޭ އުޅުމަކީ އެބޭފުޅުންގެ ބުއްދި ތަޣައްޔަރުވެފައިހުރިކަމުގެ ހެއްކެއް. ވީމާ އެބޭފުޅުން ކޯޓަށް އެ މައްސަލަ ހިފައިގެން ދުރުވުން އެދެން.

– ތިނަދޫ ދެކުނު ދާއިރާގެ މެންބަރު ޢަބްދުﷲ ސަނީފް

ނިޒާމީ ނުކުތާ ނަންގަވާ ވާހަކަފުޅު ދައްކަވަމުން ބިލަތްދޫ ދާއިރާގެ މެންބަރު އަޙްމަދު ޙަލީމް (ދޮންބިލަތް) ވިދާޅުވީ، އޯޑިއޯއެއް ލާރިދީގެން ހެދުމަކީ މަޖިލީހުގެ ނިޒާމާއި ގުޅޭކަމެއް ނޫންކަމަށެވެ.

މި ޖަމްލސާ ކުރިއަށް ގެންދިއުމުގެ ފުރުޞަތުދެއްވާ އިއްޒަތްތެރި ރައީސް. ނަން އިއްވަން އެބަޖެހޭ. އަޅުގަނޑުމެން މި ޖަލްސާ ކުރިއަށްގެންދަންޖެހޭނެ. މިހާރު އެ ދައްކަވަނީ ނިޒާމާއި ގުޅުންހުރި މައްސަލައެއް ނޫން. ބަޔަކަށް ލާރިދީގެން އަދި އޯޑިއޯއެއް ނެރުނުކަމަސްވިޔަސް އެއީ މި މަޖިލީހުގެ ނިޒާމާއި ގުޅުންހުރިކަމެއް ނޫން.

– ބިލަތްދޫ ދާއިރާގެ މެންބަރު އަޙްމަދު ޙަލީމް

މިއާއެކު މަޖިލީހުގެ ރިޔާސަތުަގައި އިންނެވި ވިލުފުށީ ދާއިރާގެ މެންބަރު ހަސަން އަފީފް ވަނީ އެއީ ޝަރީޢަތުގައި އޮތް މައްސަލައެއްކަަމށާއި، މަޖިލީހަކީ ޝަރީޢަތް ނިންމާތަނެއް ނޫންކަމަށް ވިދާޅުވެ މަޖިލިސް ކުރިއަށްގެންދިއުމަށް މަސައްކަތްކޮށްފައެވެ.

ހައިކޯޓަށް ވަޑައިގެންނެވޭނެ، ސުޕްރީމް ކޯޓަށް ވަޑައިގެންނެވޭނެ. އެހެންވީމަ އިއްޒަތްތެރި މެންބަރުން މަޖިލިސް ކުރިއަށް ގެންދިއުމުގެ ފުރުޞަތުދެއްވާ."

މަޖިލީހުގެ ނިޒާމު ގެއްލި އިހުތިޖާޖު ކުރަމްުން ގެންދިއުމާއި ގުޅިގެން މަޖިލީހުގެ ރިޔާސަތުން ވަނީ 10 މިނެޓަށް މަޖިލިސް މެދުކަނޑާލާފައެވެ.

ރައީސް ޔާމީން ޖަލަށްލުމަށް ޙުކުމްކޮށްފައިވަނީ ބޮޑު ގެއްލުމެއް ލިބިދާނެތީ ކަމަށް އެމަނިކުފާނުގެ މައްސަލަ ކްރިމިނަލް ކޯޓުގައި ބެއްލެވި ފަސް ގާޒީންގެ ބެންޗްގައި ހިމެނިވަޑައިގެންނެވި ގާޒީ ހުސެއިން ފާއިޒް ރަޝާދު ވިދާޅުވާ އޯޑިއޯއެއް މިހާރު ވަނީ ލީކުވެފައެވެ.

ޢާންމުވެފައިވާ އޯޑިއޯގައި ރަހުމަތްތެރިޔަކާއިއެކު ގާޒީ ހުސެއިން ފާއިޒް ދެއްކެވި ވާހަކަފުޅު ޤާޟީ ވަނީ ރައީސް ޔާމީންގެ މައްޗަށް ފަސް އަހަރުގެ ޖަލު ހުކުމެއް އިއްވީ އޭނާ އަށް ބިރުދެއްކުމުންކަމަށެވެ. ބިރު ދެއްކުމުން އޮތީ ދެގޮތެއް ކަމަށާއި އެއްގޮތަކީ ބިރާއި ދެކޮޅު ހެދުންކަމަށާއި އަނެއް ގޮތަކީ ބިރާއި އެއްކޮޅަށް ހުކުމް ކުރުން ކަމަށް ހުސެއިން ފާއިޒް ވިދާޅުވެފައިވެއެވެ.

ކުރިމަތިވި ހާލަތުގައި ޔާމީންގެ މަސްލަހަތު ހިމާޔަތް ކުރެވޭނީ ޔާމީންގެ މައްޗަށް ޖަލު ހުކުމެއް ކޮށްގެން ކަމަށް ހުސެއިން ފާއިޒް ވިދާޅުވިއެވެ. އެއީ ހުކުމް ނުކޮށްފިނަމަ ޔާމީނަށް އެއަށްވުރެ ބޮޑު ގެއްލުމެއް ލިބިދާނެތީ ކަމަށްވެސް ހުސެއިން ފާއިޒް ވިދާޅުވެފައިވެއެވެ.

މިފަދައިން ފާއިޒް ވިދާޅުވެފައިވާއިރު، ރައީސް ޔާމިންގެ މައްޗަށް ކްރިމިނަލް ކޯޓުން ޙުކުމްކުރަން ތަޢާވަލުކޮށްފައިވަނިކޮށް އެމައްސަލަ ފުރަތަމަ ބެއްލެވި އެކޯޓްގެ ކުރީގެ އިސް ޤާޟީ އަޙްމަދު ޙައިލަމް ސަސްޕެންޑްކުރުމަށްފަހު ދެން ބެއްލެވީ ފަސް ގާޒީންގެ ބެންޗަކުންނެވެ. އެބެންޗްގައި ތިއްބެވީ ގާޒީ އަލީ ރަޝީދު ހުސެއިނާއި، ގާޒީ އަހުމަދު ޝަކީލާއި ގާޒީ މުހައްމަދު ސަމީރާއި ގާޒީ އަލީ އާދަމް އަދި ގާޒީ ހުސެއިން ފާއިޒް ރަޝާދެވެ.