މުޅި ދުނިޔެއަށް ކުރިމަތިވެފައި މިވާ ކޯވިޑްގެ އާލަމީ ވަބާއާއެކު އޭގެ އެންމެ ބޮޑު އަސަރެއް ކުރި އެއް ބަޔަކީ ކިޔަވާކުދިންނެވެ. އެކުދިންގެ ކިޔެވުމާއި ސްކޫލް މާހައުލުގެ ތަރުބިއްޔަތުތައް މުޅިން ހަރާބުވެ އަބަދު ގޭގައި ތިބެން ޖެހުން ވީ ކުދިންގެ ނަފްސާނީ ދުޅަހެޔޮކަމަށްވެސް ހީނުކުރާފަދަ އަރުތަކެއް ކުރުވި ކަމަކަށެވެ. ރާއްޖޭގެ ސްކޫލް ދަރިވަރުންގެ އާބާދީގެ ބޮޑުބައެއް މިވީ ދޮޅުއަހަރެއްހާ ދުވަހު ތަހަންމަލް ކުރީ މިކަންކަމެވެ.
މިދިޔަ މީލާދީ އަހަރުގެ ބޮޑުބައެއް ސްކޫލާއި، މުދައްރިސުންގެ އިތުރުން، އެއްއުމުރުގެ އެކުވެރިންނާއި ދުރުގައި ހޭދަކޮށް، އޮންލައިން ނުވަތަ އެނޫންވެސް އެހެން ވަސީލަތްތައް މެދުވެރިކޮށް ދަރިވަރުން ކިޔަވައި ފިލާވަޅުތައް ނަގަމުން ދިޔަނަމަވެސް އެކުދިން ސްކޫލަށް ހާޒިރުވެ އެއްތާ ތިބެގެން ކިޔެވުމުގައި ނެރެވޭފަދަ ހެޔޮ ނަތީޖާއެއް އެކަމުން ނެރެވޭތަން ނުފެނުނެވެ. އެއާއެކު މިއަހަރުގެ ޖަނަވަރީ މަހު ފެށި ދިރާސީ އަހަރުގެ ދެވަނަޓާމުގެ ކިޔެވުމާއެކު ކުދިން ސްކޫލްތަކަށް ހާޒިރުވެ ކިޔަވަން ފެށިއެވެ. ހާއްސަކޮށް މާލޭ ސަރަހައްދުގެ ހުރިހާ ގްރޭޑްތަކެއް ސްކޫލަށް ހާޒިރުކޮށް ކިވަދޭން ފެށިއެވެ. ނަމަވެސް ކުޑަ ދުވަސްކޮޅެއްގެ ތެރޭގައި ރާއްޖޭގައި ކޯވިޑުގެ ހާލަތު ގޯސްވެ އަނެއްކާވެސް ސްކޫލަށް ހާޒިރުކޮށް ކިޔަވައިދިނުން ހުއްޓާލަންޖެހުނެވެ. އަދި އެއާއެކު ދިރާސީ އަހަރު ނިންމާލަން ޖެހުނީ އޮންލައިންކޮށް ލިބުނު އިލްމަކާއެކު އެވެ.
އެހެންނަމަވެސް މީލާދީ އަހަރުގެ މެދުތެރޭ ދިރާސީ އައު އަހަރު މިއަދު ފަށާފައި ވާއިރު މިއީ ރާއްޖޭގެ ތަޢުލީމީ ނިޒާމަށްވެސް ދިގުމުއްދަތަކަށް ފަހު އައި ބޮޑު ބަދަލެކެވެ. އެގޮތުން ޒަމާންތަކަކަށް ރާއްޖޭގައި އޮތް، އަހަރުގެ ކުރީކޮޅު ދިރާސީ އަހަރު ފަށައި އަހަރުގެ ފަހުކޮޅު ބޮޑުޗުއްޓީ ހެދުމުގެ އާދަ މިވަނީ ނިމުމަކަށް އައިސްފައެވެ. ރާއްޖޭގައި މިވީހާތަނަށް މިކަން މިގޮތަށް އޮތް ނަމަވެސް އަހަރުގެ މެދުތެރޭ ސްކޫލް ބޮޗުއްޓީ ހަދައި މީލާދީ އަހަރުގެ މެދުން ދިރާސީ އަހަރު ފެށުމަކީ ދުނިޔޭގެ ގިނަ ގައުމުތަކެއްގައި ކާމިޔާބުކަމާއެކު ތަންފީޒްކުރަމުންދާ އުސޫލެކެވެ.
އަރިވަރުންގެ ރައްކާތެރިކަމަށް ގިނަަގުނަ ފިޔަވަޅުތަކެއް އަޅައިގެން ދަރިވަރުން ސްކޫލަށް ހާޒިކޮށް ކިވަދޭން މިއަދު ފަށާފައި ވާއިރު ދަރިވަރުންގެ މޫނުމަތިން ފެނިގެން ދިޔައީ، ވަރަށްވެސް އުފާވެރި މަންޒަރުތަކެކެވެ. ގިނަ ދުވަސްތަކަކަށްފަހު އެކުދިންގެ ލޯބިވާ މުދައްރިސުންނާއި ސްކޫލާއި، އެކުވެރިންނާ ބައްދަލުވުމުން އެކުދިން ތިބީ އުފަލުން "ފޮޅިފަ" އެވެ. އަދި ކޯވިޑްގެ މި ވަބާގެ ސަބަބުން އެކުދިންގެ ކިޔެވުން މެދުކެނޑި އަނެއްކާވެސް ސްކްރީން ތަކެއްގެ ކުރިމަތީ ތިބެގެން އުނގެނޭކަށް އެކުދިން ބޭނުމެއް ނުވެއެވެ.
އަނެއްކޮޅުން ސްކޫލުތަކާއި އެޑިއުކޭޝަން މިނިސްޓްރީންވެސް ދިރާސީ އައު އަހަރު މިފެށީ އެކުދިންގެ ކިޔެވުން މެދުނުކެނޑި ކުރިއަށް ގެންދެވޭނެ ކަމުގެ ވަރަށް ފޮނި އުންމީދެއްގަ އެވެ. ހާއްސަކޮށް ދަރިވަރުންގެ ސަލާމަތާއި ރައްކާތެރިކަމަށް ކޮންމެހެން އަޅަން މަޖުބޫރު ގިނަ ފިޔަވަޅުތަކެއް މިނިސްޓްރީން ވަނީ އަޅާފައެވެ. ސްކޫލުތަކަށް ކޮންމެ ބޭނުމެއްގައި ވަންނަ ކޮންމެ މީހަކުވެސް ކޯވިޑުން ދިފާއުވުމަށް ވެކްސިން ފުރިހަމަކޮށްފައި ވާކަން ޔަގީން ކުރުމާއި ދަރިވަރުންގެ ސާފުތާހިރު ކަމާއި އެކުދިންނަށް ރައްކާތެރި ތަނަކަށް ސްކޫލްތައް ހެދުމަށް މުޅި ތައުލީމީ ދާއިރާ އޮތީ ތައްޔާރަށެވެ.
މިއާއެކު ދެންއޮތީ ބެލެނިވެރިންގެ ޒިންމާއެވެ. ދަރިފުޅުގެ އެއްވެސްކަހަލަ ބަލިމަޑުކަމެއްގެ ކުޑަވެސް އަލާމަތެއް ހުރިނަމަ އެކުއްޖަކު ސްކޫލަށް ނުފޮނުވުމާއި، ގޭތެރޭގަ އާއި އާއިލާއާއެކު ކުދިން އުޅުމުގައި ގިނަބަޔަކާ ބައްދަލުނުވާނެ ފަދަ ގޮތަކަށް އިންތިޒާމްތައް ހަމަޖެއްސުމީ މިދަނޑިވަޅަށް އެންމެ މުހިންމު އެއް ކަންތަކެވެ. އަޅުގަނޑުމެންގެ ގައުމުގެ މުސްތަޤްބަލް ހެޔޮގޮތުގައި ބައްޓަންކުރުމަށް، އަދުގެ ސްކޫލް ދަރިވަރުންނަށް އުނގެނި ދަސްކުރުމަށް އެއްވެސް ކަހަލަ ހުރަހެއް ކުރިމަތިވުމަކީ ގައުމުގެ މުސްތަޤްބަލަށް ޔަގީނުންވެސް އޭގެ ނުހަނުބޮޑު ނޭދެވޭ އަސަރެއް ކުރާނެ ކަމެކެވެ.
