ޗެނަލް 13ގެ "ހަޖަމް" ޕްރޮގްރާމްގެ މައްސަލައެއް މޯލްޑިވްސް ބްރޯޑްކާސްޓިންގ ކޮމިޝަން، ބްރޯޑްކޮމުން ބަލަން ފަށައިފިއެވެ.
އެ ކޮމިޝަނުން މިއަދު ބުނީ، ޗެނަލް13 އިން ރޭ ގެނެސްދިން "ހަޖަމް" ޕްރޮގްރާމްގެ ކޮންޓެންޓް ކޮމިޝަންގެ ސަމާލުކަމަށް އައިސްފައިވާ ކަމަށެވެ. އަދި ކޮމިޝަނުން މައްސަލަ ބެލެމުގައި ގެންގުޅޭ އިޖުރާޢަތްތަކާއި އެއްގޮތަށް އެކަން ބަލަމުންދާކަމަށްވެސް ބްރޯޑްކޮމުން ވަނީ ބުނެފައެވެ. ނަމަވެސް އެއީ އެ ޕްރޮގްރާމުގެ ތެރޭ ހިމެނުނު ކޮން ކޮންޓެންޓެއް ކަމެއް ހާމައެއް ނުކުރެއެވެ.
"މީގެ އިތުރަށް ހުރިހާ ބްރޯޑްކާސްޓަރުންވެސް، ބްރޯޑްކާސްޓްކުރުމުގެ ސުލޫކީ މިންގަނޑު އަދި އުސޫލުތައް ހިފެހެއްޓުމަށްވެސް މި ކޮމިޝަނުން ނަސޭހަތްތެރިވަމެވެ."
– ބްރޯޑްކޮމް
ރާއްޖޭގެ ބްރޯޑްކާސްޓަރުންގެ ބެލެނިވެރި ފަރާތް ކަމަށްވާ ބްރޯޑްކާސްޓިންގ ކޮމިޝަން މެދުވެރިކޮށް ޓީވީ ސްޓޭޝަން ތަކަށް ފިޔަވަޅުއެޅުން ވަރަށްބޮޑަށް ކުއްވެރިކުރަމުން ވެރިކަމަށްއައި އަދުގެ ސަރުކާރުން އެކޮމިޝަން ބޭނުންކުރަނީ ސަރުކާރާއި ދެކޮޅަށް ބަސްބުނާ ފަރާތްތަކުގެ އަނގަބަންދުކުރުމަށް ކަމަށް އިދިކޮޅު ފަރާތްތަކުން ގެންދަނީ ބުނަމުންނެވެ.
އެގޮތުން ސަރުކާރާ ދެކޮޅު ފަރާތްތަކުގެ އެކިއެކި ކަންކަން އެންމެ ބޮޑަށް ގެނެސްދޭ ޗެނަލް 13ގެ ބައެއް މައްސަލަތަށް ކޮމިޝަނުން މީގެކުރިން ވެސް ވަނީ ބަލާފައެވެ. އަދި އެ ޗެނަލުން ދެއްކި ޕްރޮގްރާމަކާ ގުޅިގެން މަޢާފަށް އެދުމަށްވެސް މީގެކުރިން ކޮމިޝަނުން އަންގާފައި ވެއެވެ.
