ކޯވިޑު-19 އިން ރައްކާތެރިވާން ވެކްސިން ޖެހުމަށް ހިތްވަރުދިނުމަށް އެޑިއުކޭޝަން މިނިސްޓްރީން ކެމްޕެއިނެއް މިއަދު ފަށައިފި އެވެ.
މި ކެމްޕެއިނަކީ ކޯވިޑުން ރައްކާތެރިވުމަށް ވެކްސިން ޖެހުމުގެ މުހިއްމުކަމާ ގުޅޭ މަޢުލޫމާތު ޓީޗަރުންނާއި، ތަޢުލީމީ ދާއިރާގެ މުއައްޒަފުން މެދުވެރިކޮށް ދިނުމަށް ކުރިއަށްގެންދާ ކެމްޕެއިނެއްކަމަށް އެޑިއުކޭޝަން މިނިސްޓްރީން ބުނެއެވެ.
"ދަރިވަރުންނަށް ރައްކާތެރިކަން" ނަމުގައި ތައުލީމީ ދާއިރާއަށް ހާއްސަކޮށްގެން ކެމްޕެއިނެއް ފެށީ ދަރިވަރުންގެ ކިޔެވުން މެދުނުކެނޑި ކުރިއަށް ގެންދިއުމަށްޓަކައި، ދަރިވަރުންނާ ގުޅުން ހުރި ހުރިހާ ފަރާތްތައް ވެސް ކޯވިޑުން ރައްކާތެރި ކުރުމަށް ކަމަށްވެސް މިނިސްޓރީން ބުނެއެވެ.
އެޑިއުކޭޝަން މިނިސްޓްރީން ބުނީ މި ކެމްޕެއިނުގެ މަގުސަދަކީ ތައުލީމީ ދާއިރާގެ އެންމެންނަކީ ވެކްސިންގެ ޑޯޒްތައް ފުރިހަމަކޮށްފައިވާ ބަޔަކަށް ހެދުން ކަމަށެވެ.
ކޯވިޑް-19އިން ރައްކާތެރިވުމަށް މިހާރު ކުރިއަށް ގެންދާ ގައުމީ ވެކްސިނޭޝަން ކެމްޕެއިންގައި މިނިސްޓްރީ އޮފް އެޑިއުކޭޝަން އަދި ސްކޫލްތައް ބައިވެރިވެ، އެޑިއުކޭޝަން ސެކްޓަރގެ ވެކްސިނޭޝަން ކެމްޕެއިނެއް މިއަދު ފެށުން.#ދަރިވަރުންނަށްރައްކާތެރިކަން #އުފަލުގައިކިޔަވަމާ #އެކުގައިއެންމެން pic.twitter.com/or0Nrc5cjP
— Ministry of Education (@MoEdumv) August 5, 2021
މިފަދަ ކެމްޕެއިނެއް ފަށާފައިވާއިރު އެޑިއުކޭޝަން މިނިސްޓްރީން ވަނީ ދިރާސީ އައު އަހަރުގެ ކިޔެވުން ފަށަންވާއިރަށް ސްކޫލްތަކުގެ މުވައްޒަފުން ކޯވިޑް-19އިން ދިފާޢުވުމަށް ޖަހާ ވެކްސިން ފުރިހަމަކުރުމަށް އަންގާފައެވެ.
ދިރާސީ އަހަރުގެ ކިޔެވުން ފަށާއިރު މޮނިޓަރިންގގައި ނެތް ރަށްރަށުގައި ސްކޫލަށް ދަރިވަރުން ހާޒިރުވެގެން އާންމު ހާލަތުގައި ސެޝަންތައް ބޭއްވި ދިގުމިނަށް ކިޔަވައިދިނުމަށް މިނިސްޓރީން ވަނީ ނިންމާފައެވެ.
މީގެ އިތުރުން ކޯވިޑް ވެކްސިން ފުރިހަމަ ނުކުރާ ފަރާތްތަކަށް ސްކޫލްތަކަށް ވަދެނުކުމެ ނުހެދޭނެ ކަމަށްވެސް އެޑިއުކޭޝަން މިނިސްޓްރީން މީގެ ކުރިން ވަނީ އިއުލާންކޮށްފައެވެ.
