ކުދި ވިޔަފާރިތަކާއި ފްރީލާންސަރުންނަށް ހާއްސަކޮށްގެން ބިޒްނަސް ސެންޓަރ ކޯޕަރޭޝަނުން ހުޅުވި ކޯ-ވޯކް ސްޕޭސް 'ސީޑް ބައި ބީ.ސީ.ސީ' އަކީ މިފަދަ ފަރާތްތަކަށް ލިބިގެންދިޔަ ރަނުގެ ފުރުޞަތެކެވެ. އެގޮތުން 'ސީޑް ބައި ބީސީސީ' ހުޅުވިތާ ދެތިން ދުވަސްވެފައިވާއިރު މިތަނަށް އަންނަނީ މިފަދަ ވިޔަފާރިތަކުގެ ބޮޑު ސަމާލުކަމެއް ލިބެމުންނެވެ.
"ސީޑް ބައި ބީސީސީ"ގެ ޚިދުމަތް އެންމެ ފުރަތަމަ ހޯދި ކަސްޓަމަރަކީ ދަ ވައިލެޓް ކޮމްޕެނީގެ ސީއީއޯ ޢުމަރު ފިކުރީއެވެ. ފަސް ބައިވެރިންވެގެން ހިންގާ މި ކުންފުންޏަކީ އަދި ވަރަށް ކުޑަ ވިޔަފާރިއެކެވެ. މޯލްޑިވްސް ބިޒްނަސް ނެޓްވަރކް (އެމްބީއެން) އިން ގެނެސްދިން 'އަދާހަމަ' ޕްރޮގްރާމުގައި ވާހަކަ ދައްކަވަމުން އުމަރު ވިދާޅުވީ ކުންފުނީގެ ފަސް މީހުން އެކުގައި މަސައްކަތްކުރުމަށް މީގެ ކުރިން ގޮސް އުޅުނީ އެކިއެކި ކެފޭތަކާއި ރެސްޓޯރަންޓް ތަކަށް ކަމަށެވެ. ނަމަވެސް އެއީ ބައެއްފަހަރު ޚަރަދު ބޮޑު ކަމެއްކަމަށް ޢުމަރު ވިދާޅުވިއެވެ. ނަމަވެސް ބީސީސީން ހުޅުވި ވޯކް ސްޕޭސްއާއެކު އެމީހުން ކެފޭތަކުގައި ތިބެގެން ކުރަމުން އައި މަސައްކަތްތައް ސީދާ އޮފީހަކަށް ބަދަލުކޮށްލުމުގެ ޖާގަލިބިފައިވާކަމަށް ޢުމަރު ވިދާޅުވިއެވެ.
Shout out to a new week! pic.twitter.com/yhwIfYzuw7
— SEED by BCC (@SEEDbybcc) July 11, 2021
ދަ ވައިލެޓް ކޮމްޕެނީއަކީ ރޯޔަލްޓީ ކާޑުގެ ޚިދުމަތް ވިޔަފާރިތަކަށް ފޯރުކޮށްދޭ ކުންފުންޏެކެވެ. މިވަގުތު މާލޭގެ ބިމު ކުލި ބޮޑުކަމުން، ޢިމާރާތްތަކުން ތަންތަން ކުއްޔަށް ނަގައިގެން އޮފީހެއް ހިންގުމުގެ ގާބިލްކަން އުމަރާއި އޭނާގެ ޕާޓްނަރުންގެ ވައިލެޓް ކުންފުނީގައި ނެތްކަމަށް އުމަރު ވިދާޅުވިއެވެ. ނަމަވެސް "ސީޑް ބައި ބީސީސީ" ގެ އަގުތަކަށް ބަލާއިރު މިއީ ކޮންމެ ދުވަހަކުވެސް އައިސް މަސައްކަތްކޮށްލަން ތިބެވޭނެތަނެއްގެ ގޮތުގައި އުމަރު ސިފަކުރެއްވިއެވެ.
އެކަކު އެކަނި ގޮސް މަސައްކަތް ކޮށްލުމާއި، ގްރޫޕެއްގެ މީހުން އެކުގައި ގޮސް ތިބެ މަޝްވަރާކޮށްލެވޭގޮތަށް ޒަމާނީ ވަޞީލަތްތަކާއެކު މީޓިންގރޫމްތައްވެސް އެތަނުގައި ހުރުމާއި، އެއްޗެހި ލިޔެ ހެދުމަށް ވައިޓްބޯޑުފަދަ ވަޞީލަތްތައްވެސް އެތަނުގައި ހުރުމަކީ ލިބޭ ބޮޑު ފަސޭހައެއްކަމަށް ޢުމަރު ފާހަގަ ކުރެއްވިއެވެ. ޢުމަރު އިތުރަށް ފާހަގަ ކުރެއްވި ގޮތުގައި މިފަދަ މާޙައުލެއް ލިބުމަކީ އޭނާގެ ވިޔަފާރިފަދަ ކުދި ވިޔަފާރިތަކަށް ވަރަށް ރަނގަޅު ކަމެކެވެ.
މިއީ ފްރީލާންސަރުންނަށާއި، އަލަށް ވިޔަފާރި ފަށާ މީހުންނަށް އަދި އިންޓަރނެޓް ބޭނުންކޮށްގެން ރިސަރޗްކޮށް ހަދަންޖެހޭ ކިޔަވާ ކުދިންނަށްވެސް ވަރަށް ރަނގަޅު ވަޞީލަތެއް ކަމަށް ޢުމަރު ވިދާޅުވިއެވެ. ގިނަ ވަޞީލަތްތަތަކާއެކު އެއްތަނެއްގައި ތިބިގެން މަސައްކަތް ކޮށްލެވޭނެ ވަރަށް ފަހި މާޙައުލެއް ކަމަށްވެފައި އަގުވެސް ހެޔޮކަމުން މިއީ އޮފީސް މާޙަލެއްނެތި މަސައްކަތް ކުރަމުން އަންނަ ކުދި ވިޔަފާރިތަކަށް ވަރަށް އެކަށޭނަ ތަނެއްކަމަށްވެސް އޭނާ ފާހަގަ ކުރެއްވިއެވެ. އަދި މިފަދަ ޚިދުމަތެއް ރާއްޖޭގައި ތަޢާރަފް ވުމަކީ އޭނާ އަބަދުވެސް ދެކެމުން އައި ހުވަފެނެއްކަމަށްވެސް އޭނާ ވިދާޅުވިއެވެ.
'ސީޑް ބައި ބީސީސީ' އިން މަސައްކަތުގެ މާޙައުލެއް ކުއްޔަށް ދެނީ ވަރަށް ހެޔޮ އަގުތަކެއްގައެވެ. އެގޮތުން ގަޑިއިރަކަށް، ނުވަތަ ހަތަރު ގަޑިއިރަށް، ނޫންނަމަ މުޅި ދުވަހަށްވެސް ތަން ކުޔަށް ހިފެއެވެ. މީގެއިތުރުން ހަފްތާއަކަށް ނުވަތަ މަސްދުވަހަކަށްވެސް ތަންތަން ކުއްޔަށް ނެގޭނެއެވެ. ތަން ކުއްޔަށް ލިބޭ އަގުތަކަށް ބަލާއިރު 30 ރުފިޔާއިން ފެށިގެން 1700 ރުފިޔާ އާ ދެމެދުގެ އެކި އަގުތައް ވަނީ ހަމަޖައްސާފައެވެ.
ކޮމެންޓު ފޮނުވާ