މޭމަހުގެ 6 ވަނަ ދުވަހުގެރޭ ރައީސް ނަޝީދުގެ ފުރާނަފުޅަށް އަމާޒުކޮށް ދެވުނު ހަމަލާގެ ތަހުގީގަކީ ރާއްޖޭގެ ޑިމޮކްރަޓިކް ހަޔާތުގައި އެންމެ ފުރިހަމަ ތަހުގީގެއް ކުރެވުނު މައްސަލަ ކަމުގައި ހޯމް މިނިސްޓަރ އަދި ސަރުކާރު ކޯލިޝަން ލީޑަރު އިމްރާން އަބްދުﷲ ވިދާޅުވެއްޖެއެވެ.
ރާއްޖެ ޓީވީގައި ވާހަކަފުޅު ދައްކަވަމުން މިނިސްޓަރ އިމްރާން ވިދާޅުވީ މި ތަހުގީގު ކުރިއަށްދަނީ އެއްވެސް ވަރެއްގެ ނުފޫޒެއްނެތި، ފުލުހުންނަށް ލިބިދޭ ހުރިހާ ވަސީލަތްތަކެއް ލިބިމެ، އެ ވަސީލަތްތައް ބޭކާރު ނުކޮށް އެންމެ ފުރިހަމައަށް ކަމަށް ވިދާޅުވިއެެވެ. މިކަމުގައި ސަރުކާރުން ދީފައިވަނީ ޕޮލިސީ ލެވެލްގެ އިރުޝާދުތަކެއް ކަމަށާއި، އަދި މި މައްސަލައިގައި ރައީސް ޞާލިޙް ގެންގުޅުއްވި އުސޫލުތަކަކީ ތައުރީފު ހައްގު މަސައްކަތްޕުޅުތަކެއް ކަމަށް ވިދާޅުވިއެވެ. އެގޮތުން މި މައްސަލައިގެ ދެފުށް ފެންނަކަން ކަށަވަރުކުރުމަށް ބޭނުންވާ ހުރިހާކަމެއް އިންތިޒާމުކުރައްވައި، މިއަދު މި މައްސަލަ އެންމެ ފުރިހަމަ ތަހުގީގެއްގެ ގޮތުގައި ނިންމާލެވޭނެކަމުގެ ޔަގީންކަން އެބަ އޮތްކަމަށް ވިދާޅުވިއެވެ.
ތަހުގީގު ހިނގަމުން ދަނީ ބައިނަލް އަގްވާމީ އެހީތެރިކަން ލިބިގެން، ސަރުކާރުގެ ފަރާތުން ޕޮލިސީ ލެވެލްގައި ލިބެން ޖެހޭ ހުރިހާ އިރުޝާދެއް ލިބިގެން ކަމަށް އިމްރާން ވިދާޅުވިއެވެ. އިމްރާން ވިދާޅުވީ ފުލުހުންގެ އަމާޒަކީ ޝަރުއީ މަރުހަލާގައި އިންސާފު ލިބޭނެ ކަން ކަށަވަރު ކުރެވޭ ވަރުގެ ފުރިހަމަ ތަހުގީގެއް ނިންމުން ކަމަށެވެ.
ސިޔާސީ ޕާޓީތަކަށް ޖާގަ ދެވިގެން، ޑިމޮކްރެޓިކް އުސޫލުތަކުން، އާ ގާނޫނުއަސާސީއެއްގައި ގައުމު ހިންގަން ފެށި ފަހުން، ހިންގި އެންމެ ފުރިހަމަ ތަހުގީގަށް މި ތަހުގީގު ވާނެ.
– އިމްރާން ވިދާޅުވިއެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލަން ދިން ޓެރަރިސްޓް ހަމަލާއާ ގުޅިގެން، މަޖިލީހުން ކުރިއަށްގެންދިޔަ ޕާލިމަންޓްރީ އިންކުއަރީގެ ރިޕޯޓު ސަލާމަތީ ޚިދުމަތްތަކާ ބެހޭ ކޮމިޓީންވެސް ވަނީ ފާސްކޮށްފައެވެ. މި ރިޕޯޓުގައި ރައީސް ނަޝީދަށް ޙަމަލާދިން ގޮތް ހިމެނުމުގެ ގޮތުން އެމަނިކުފާނުގެ ޕްރޮފައިލަކާއި، ތްރެޓް ލެވަލް އޮތް މިންވަރުގެ އިތުރުން ތްރެޓް ހިސްޓްރީއާއި، އިންކުއަރީން ބެލި ކަންކަން ވަނީ ހިމަނާފައެވެ.
ރައީސް ނަޝީދަށް ދެވުނު ހަމަލާއާއި ގުޅިގެން ކުރިއަށްދާ ތަހުގީގް ލަސްކަމަށްވުނެ އެމްޑީޕީގެ ރައީސް ނަޝީދަށް ތާއީދު ކުރާ ފަރާތްތަކުން ދަނީ ކަންބޮޑުވުން ފާޅު ކުރަމުންނެވެ. އަދި މިކަމަށް ފަންޑު ކުރި މީހުން ނުހޯދޭނަމަ ރައީސް ނަޝީދަށް އިންސާފު ނުލިބޭނެކަމަށް އެބޭފުޅުން ދަނީ ވިދާޅުވަމުންނެވެ.
