އިގިރޭސި ވަލީއަހު ޕްރިންސް ޗާލްސް، ޑަޔާނާއަށް، އެންގޭޖްމަންޓް ހަދިޔާއެއްގެ ގޮތުގައި ހަދިޔާކުރި ކާރު، 72،000 އެމެރިކާ ޑޮލަރަށް ނީލަމުގައި ވިއްކާލައިފިއެވެ.
1981 ވަނަ އަހަރުގެ ފޯރޑް އެސްކޯޓް ގިއާ ބްރޭންޑްގެ މިކާރު ވިއްކާފައިވާ އަގަކީ 30،000 އެމެރިކާ ޑޮލަރަށެވެ. މިއީ މިކާރު އަގު އެންމެ ދަށްވެގެން ހުންނާނެ ކަމަށް ބެލެވުނު ވަރަށްވުރެ ރަގަޅު އަގެކެވެ.
ކާރު ނީލަން ކީ ފަރާތްތަކުން އުއްމީދު ކޮށްފައިވަނީ، ނީލަމުގައި ކާރު ވިއްކާލެވިގެންދާނީ، 30،000 ޑޮލަރާއި 40،000 ޑޮލަރާއި ދެމެދުގެ އަދަދެއްގައި ކަމަށެވެ. އެހެންނަމަވެސް، އިތުރު ފީތަކާއެއްކޮށް، ކާރު ނީލަމުގައި ވިއްކާލެވިގެން ދިޔައިރު، ކާރުގެ އަގު 72،000 އެމެރިކާ ޑޮލަރަށް ވަނީ އަރާފައެވެ.
ރަހީމް ޑެންސައި ނީލަމުން މައުލޫމާތު ދީފައިވާ ގޮތުގައި، މި ކާރަކީ 1981 ވަނަ އަހަރުގެ މޭމަހު، ޕްރިންސް ޗާލްސް ޑަޔާނާއަށް، ދެބޭފުޅުންގެ ކައިވެނީގެ 2 މަސް ކުރިން ހަދިޔާކުރި ކާރެކެވެ. އަދި ޑަޔާނާ، 1982 ވަނަ އަހަރުގެ އޮގްސްޓްމަހާ ހަމައަށް މިކާރު ބޭނުން ކޮށްފައި ވެއެވެ.
މި ހަފްތާގެ އަންގާރަ ދުވަހު، ކާރު ނީލަމުގައި ވިއްކާލާފައިވަނީ، ކާރުގެ އޮރިޖިނަލް ރެޖިސްޓްރޭޝަން ނަމްބަރާއި، އޭރު ލާފައި ހުރި ކުލަވެސް ބަދަލު ނުކޮށް، އަދި އޭރު ބޭނުންކުރި ރޭޑިއޯ ސެޓާވެސް އެކީގައެވެ.
ކާރުގެ ސްޕީޑް މީޓަރުން ދައްކާ ގޮތުގައި ކާރު ދުއްވާފައިވަނީ 83،000 މޭލަށެވެ.
"ފޯޑަކީ ޕްރިންސް ޑަޔާނާ، އެކަމަނާއާއި ޕްރިންސް ޗާލްސްގެ ހަޔާތުގެ އެންމެ އުފާވެރި ދުވަސްވަރު، އެންމެ ކުރިން އަމިއްލަފުޅު ދަތުރުތަކަށް ބޭނުންކުރި ކާރު، އަދިި އެކަމަނާ މިކާރު ދުއްވަނިކށްް ނަގާފައި ހުރި އެތައް ފޮޓޯއެއް ވާއިރު، ޕްރިންސް ޗާރލްސް ޕޯލޯ ކުޅިވަރު ކުޅުއްވާ މަންޒަރު ބައްލަވަން މިކާރުގައި އިންނަވަނިކޮށް ނަގާފައި ހުރި ފޮޓޯތައްވެސް ހުންނާނެ،" ރަހީމް ޑެންސައި އިން ނެރުން ސްޓޭޓްމަންޓުގައި ބުނެފައި ވެއެވެ.
ނީލަމުން ބުނެފައިވަނީ، މިކާރު ވިއްކާލާފައިވަނީ ކާކުކަން ސިއްރު ކޮށްފައި ބާއްވަން ބޭނުންވާ ކަމުގައެވެ. އެހެންނަމަވެސް އެއީ އަންހެނެއްކަމަށް ބުނެފައި ވެއެވެ. އަދި އޭނާއަކީ ޑަޔާނާއަސް ވަރަށް ބޮޑަށް ތާއީދު ކުރާ މީހެއްކަމަށާއި، އަދި މިކާރު ޝާހީ އާއިލާގެ ފަރާތުން ލިބުނު ގޮތް، އޭނާގެ އެންމެ ގާތް ރަހުމަތްތެރިންނަށްވެސް ސިއްރު ކޮށްފައި ބޭއްވުމަށް އޭނާ ބޭނުންވާ ކަމުގައެވެ.
ފޯރޑް ބްރޭންޑުގެ މި ކުޑަ ކާރުގެ ބޮނެޓްގެ މަތީގައި ރިހިން ހަދާފައި، ބޮކެއް ހަރު ކޮށްފައި ވެއެވެ. މިއީ ޑަޔާނާގެ ދައްތަ ސާރާ ސްޕެންސަރ އޭނާއަށް ދީފައިވާ ހަދިޔާގެ ނަކަލެކެވެ. ރަހީމް ޑެންސައިން ބުނެފައިވަނީ، މި ބޮކަކީ، "ކުޑަ އަންހެން ކުއްޖަކު، ލޯބިން ބޮކަކަށް ދޮނެއް ދިނުމުން އެ ބޮއް ޕްރިންސަކަށް ބަދަލުވެގެން ދިޔަ ގޮތުގެ ވާހަކަ" ޑަޔާނާއަށް ހަދާން ކޮށްދިނުމުގެ ގޮތުން އޭރު ދީފައިވާ ހަދިޔާއެއް ކަމަށެވެ.
މިއީ ޑަޔާނާ ބޭނުން ކުރި ކާރެއް ބޮޑު އަގެއްގައި ނީލަމުގައި ވިއްކާލެވުނު ފުރަތަމަ ފަހަރެއް ނޫނެވެ. އެކަމަނާ ބޭނުން ކުރައްވާފައިވާ އައުޑި ކޮންވާޓަރ ކާރު ފާއިތުވެދިޔަ އަހަރު ނީލަމުގައި ވިއްކާލާފައިވަނީ 80،300 އެމެރިކާ ޑޮލަރަށެވެ.
