ޗެނަލްތަކުން ދަނީ އާ ޝޯވ ތަކާއި އާ ޚިޔާލުތަކަށް ބެލުންތެރިންނާއި ހަމައަށް ގެނެސްދިނުމަށް މަސައްކަތް ކުރަމުންނެވެ. ޒީ ޓީވީއަކީ ވެސް މީގެ ތެރެއިން ތަފާތު ޝޯވތައް ބެލުންތެރިންނާ ހަމައަށް މިހާތަނަށް ގެނެސްދެމުން އައިސްފައިވާ ޗެނަލެކެވެ.
ރިޕޯޓްތައް ލިބިފައިގޮތުގައި ޒީޓީވީން އަންނަނީ "ކޮމެޑީ ފެކްޓްރީ"ގެ ނަމުގައި ހެއްވާމަޖާ ޝޯވއެއް ގެނެސްދިނުމަށް ތައްޔާރު ވަމުންނެވެ. މި ޝޯވ ދައްކަން ފަށަން ހަމަޖެހިފައި ވަނީ މިމަހުގެ 21 ގައެވެ. ޝޯވ ދެއްކުމަށް ހަމަޖެހިފައިވަނީ ކޮންމެ އާދީއްތަ އަދި ހޮނިހިރު ދުވަހެއްގެ ރޭ 10 ޖަހާއިރު ކަމަށް ރިޕޯޓްތައް ބުނެއެވެ.
މި ޝޯވގެ ޖުމްލަ 30 އެޕިސޯޑް ގެނެސްދިނުމަށް ޒީޓީވީން އަންނަނީ މަސައްކަތްކުރަމުންނެވެ. އެހެންކަމުން މި ޝޯވ 15 ހަފްތާވަންދެން ކުރިއަށްދާނެއެވެ.
ޝޯވގެ ޖަޖަކަށް ފެނިގެންދާނީ ބޮލީވުޑްގެ ތަރި ޝީލްޕާ ޝެއްޓީ ކަމަށް އިންޑިއާގެ މުނިފޫހިފިލުވުމުގެ ޚަބަރު ގެނެސްދޭ ބައެއް ނޫސްތަކުން ވަނީ ބުނެފަވެ. ޝީލްޕާއަކީ މީގެ ކުރިންވެސް ތަފާތު ޝޯތައް ޖަޖް ކޮށްފައިވާ ފަރާތެކެވެ. އޭގެތެރޭ ގިނައީ ޑާންސް ޝޯވ ތަކެވެ. މި ޝޯވއިން ޝިލްޕާ ފެނިއްޖެނަމަ، މިއީ ހެއްވާމަޖާ ޝޯއެއް އޭނާ ޖަޖް ކުރާ ފުރަތަމަ ފަހަރެވެ.
