އެމެރިކާއިން އެއްކުރާ ސެޓެލައިޓް ޑާޓާ އިންޑިއާއަށް ބޭނުންކުރެވޭނެ އެއްބަސްވުމެއްގައި، އަންނަ ހަފްތާގައި އިންޑިއާއަށް ވަޑައިގަންނަވާ އެމެރިކާގެ ސެކެޓްރީ އޮފް ސްޓޭޓް، މައިކް ޕޮމްޕެއޯ ސޮއިކުރައްވާނެކަމަށް މީޑިއާ ރިޕޯޓުތަށް ބުނެފިއެވެ.
އޭޝިއާގެ 4 ގައުމަކަށް ކުރައްވާ ދަތުރުފުޅެއްގައި އަންނަ ހޯމަދުވަހު މައިކް ޕޮމްޕެއޯ އިންޑިއާއަށް ވަޑައިގަންނަވާނެ އެވެ. އެމެރިކާގެ ޑިފެންސް ސެކެޓްރީ މާކް އެސްޕާ ވެސް މި ދަތުރުފުޅުގައި އިންޑިއާއަށް ވަޑައިގަންނަވާނެއެވެ.
އިންޑިއާގެ އެކްސްޓާނަލް އެފެއާޒް މިނިސްޓަރ ސުބްރަމާނިޔަމް ޖަޔަޝަންކަރާއި ޑިފެންސް މިނިސްޓަރ ރާޖްނާތު ސިންގްއާ އެކު މިދެބޭފުޅުން އަންނަ އަންގާރަ ދުވަހު މަޝްވަރާ ކުރެއްވުމަށްފަހު މި އެއްބަސްވުމުގައި ސޮއިކުރައްވާނެކަމަށް ރިޕޯޓުތައް ބުނެއެވެ. މި އެއްބަސްވުމުގެ ދަށުން އިންޑިއާގެ މިސައިލް ތަކަށާއި އަސްކަރީ ޑްރޯންތަކަށް ބޭނުންވާނެ މާ ސައްހަ މަޢުލޫމާތު އެމެރިކާއިން އިންޑިއާއަށް ފޯރުކޮށްދޭނެއެވެ.
2007 ވަނަ އަހަރުން ފެށިގެން އެމެރިކާގެ ކުންފުނި ތަކުން އުފައްދާ ބައެއް ހަތިޔާރު އިންޑިއާއިން ގަންނަމުންދިޔަ ނަމަވެސް އަސްކަރީ ގޮތުން އިންޑިއާ ކުރިން ބޮޑަށް ގާތީ ރަޝިޔާ އާއެވެ. އެހެން ކަމުން މިވީހާތަނަށް އެމެރިކާ ކިތަންމެ ބޮޑަށް އެދުނު ނަމަވެސް އެޤައުމާއެކު، ނާޒުކު ޖާސޫސީ ސިއްރު މަޢުލޫމާތު ހިއްސާކުރުމުގެ އެއްބަސްވުމަކަށް އިންޑިއާ ސަރުކާރުން އައިސްފައެއް ނުވެއެވެ. އަދި އިންޑިއާ އޭރު ގެންގުޅެމުން އައީ ވަކިފަރާތަކަށް މާބޮޑަށް ބުރަނުވާ ސިޔާސަތުތަކެވެ. ނަމަވެސް ދުނިޔެއަށް އަންނަ ޖިޔޮ ޕޮލިޓިކަލް އަދި ޖިޔޮ ސްޓްރެޓީޖިކް ބަދަލުތަކާއެކު އިންޑިއާއިން ރަޝިޔާ އާއި ދުރައްޖެހި، އަމިއްލަ އެދުމަކައިގެން މިހާރު ފާޅުކަން ބޮޑުގޮތެއްގައި އެމެރިކާއާއި އެކު މިވަނީ މަސައްކަތްކުރަން ފަށާފައެވެ. މިއާއެކު ޗައިނާ އާއި ރަޝިއާގެ ގުޅުން އިތުރަށް އައީ ބަދަހި ވަމުންނެވެ.
ދެކުނު އޭޝިއާއާއި ދެކުނު އިރުމަތީ އޭޝިއާ ހިމެނޭގޮތަށް މުޅި އިންޑޯ ޕެސިފިކް ސަރަހައްދަށް ޗައިނާއިން އަތްގަދަކުރާ ކަމަށް ބުނެ އެސަރަހައްދުން ޗައިނާގެ ބާރު ދެރަކޮށްލުމަށް ފާޅުކަން ބޮޑުގޮތެއްގައި އެމެރިކާއިން މިހާރު ގެންދަނީ މަސައްކަތް ކުރަމުންނެވެ. އިންޑިއާއާއި އެކު ވާ މި އެއްބަސްވުމަކީ ވެސް މީގެ ބައެކެވެ. މި ކަމުގައި އެމެރިކާއަށް ވާގިވެރި ވަނީ އިންޑިއާއި ޖަޕާނާއި އޮސްޓްރޭލިއާ އެވެ. ޗައިނާއާއި މެދު އެމެރިކާއަށް އޮތް އެންމެ ބޮޑު ބިރަކީ ޗައިނާގެ ކުރިއަރާފައިވާ އިޤްތިޞާދާ އެކު އަސްކަރީގޮތުން ޗައިނާ ހޯދަމުންދާ ޤާބިލު ކަމެވެ. އަދި އިޤްތިޞާދީގޮތުން އެމެރިކާ އަށްވުރެ ޗައިނާ ކުރިއެރުން ވާނީ، ހަންފެތުރުމުގެ ސިޔާސަތު ގެންގުޅޭ އެމެރިކާއަށް ތަހަންމަލް ނުކުރެވޭ ވަރުގެ ކަމަކަށެވެ.
އިންޑިއާ އާއި އެމެރިކާއިން މި އެކުލަވާލާ އެއްބަސްވުމާ ގުޅޭގޮތުން އިންޑިއާގެ ބޮޑުވަޒީރު ނަރެންދްރަ މޯދީ ބުދަ ދުވަހު ވަޒީރުންގެ މަޖިލީހުގައި މަޝްވަރާކުރައްވާފައި ވާކަމަށް އިންޑިއާގެ ބައެއް މަސްދަރުތަކާއި ހަވާލާދި ރޮއިޓާސް އިން ބުނެއެވެ. އަދި މި އެއްބަސްވުމުގެ ދަށުން އިންޑިއާއަށް އެމެރިކާގެ ސެޓެލައިޓް މެދުވެރިކޮށް އެއްގަމާ ކަނޑާއި ވައިގެ ސަރަހައްދުގެ ޖާސޫސީ ސިއްރު މަޢުލޫމާތު ފޯރުކޮށްދޭނެއެވެ.
އެމެރިކާގެ ސެކެޓްރީ އޮފް ސްޓޭޓް، މައިކް ޕޮމްޕެއޯ މިފެށޭ ހަފްތާގައި އޭޝިއާގެ 4 ޤައުމަކަށް ކުރައްވާ ދަތުރުފުޅުގައި އިންޑިއާއަށްފަހު ވަޑަގަންނަވާނީ ރާއްޖެއަށެވެ. އެއަށްފަހު ދެންވަޑައިގަތުމަށް ހަމަޖެހިފައި ވަނީ ސްރީލަންކާ އާއި އިންޑޮނޭޝިއާ އަށެވެ. އޭނާގެ މިދަތުފުޅުގައި މައިގަނޑު ގޮތެއްގައި އަލިއަޅުވާ ލާނީ ޗައިނާ އާއި ދެކޮޅަށް އެމެރިކާއިން ގެންގުޅޭ ސިޔާސަތުތަކަށް ކަމަށް ބެލެވެއެވެ.
