އިންޓަނެޓްވެފައި މި ވަނީ މީހުން މަޝްހޫރު ކުރާ ޕްލެޓްފޯމަކަށެވެ. ހާއްސަކޮށް މިހާރު މުޅި ދުނިޔެއަށް މަޝްހޫރުވެފައިވާ ޓިކްޓޮކްވެފައި ވަނީ، މަޝްހޫރުވާން ބޭނުންވާ ފަރާތްތަކަށް ރަނގަޅު ޕްލެޓްފޯމަކަށެވެ. އެ ޕްލެޓްފޯމްގައި ނެށުމާއި އެކި ހުނަރު ދައްކައިގެން މީހުން މަޝްހޫރުކަން ހޯދާއިރު، އެއްވެސް ކަމެއް ނުކޮށް ކެމެރާއަށް ބަލަހައްޓައިގެން އިނދެ މަޝްހޫރުވާ މީހުންވެސް އެބައުޅެއެވެ. މިއީ އެފަދަ މީހެކެވެ.
ވިއެޓްނާމަށް ނިސްބަތްވާ މި މީހާ އާންމުންގެ ބޮޑު މަގްބޫލުކަމެއް ހޯދާފައި ވަނީ، ވިއެޓްނާމްގެ ލަވަ ޖަހައިގެން ހަމައެކަނި ކެމެރާއަށް ބަލައިގެން އިނދެއެވެ. އޭނާވެސް މިކަން ކުރަނީ ޓިކްޓޮކްގައެވެ.
އަންހް ޓްރޭން ޓޭން ނަމަކަށް ކިޔާ އެ މީހާގެ ވީޑިއޯތަކަށް މިލިއަނުންވެސް ވިއުސް ލިބެއެވެ. އޭނާގެ ބައެއް ވީޑިއޯތަކަށް 20.8 މިލިއަން ވިއުވެސް ލިބިފައި ހުރި އިރު، އެތައް މަސައްކަތެއް ކޮށްގެން ޓިކްޓޮކަށް ވީޑިއޯ ލާ މީހާއަށްވެސް ގިނަފަހަރު މިވަރަށް ވިއުސް ނުލިބެއެވެ.
އޭނާގެ ވީޑިއޯތައް އާންމު ވުމާއެކު އެއްބަޔަކު ދަނީ، އޭނާ އެފަދަ ވީޑިއޯތައް ލާއިރު، އެ ވީޑިއޯތައް ބަލަން މީހުންނަށް ވަގުތު ވޭތޯ ސުވާލު ކުރަމުންނެވެ. ޓޭންގެ އެކައުންޓްގައި ފަސް ލައްކަ ފޮލޯވަރުން އެބަ ތިއްބެވެ. އަދި އޭނާގެ އެކައުންޓަށް 78 ލައްކައަށްވުރެ ގިނަ ލައިކްސް ލިބިފައި ވެއެވެ.
މީގެ ކުރިންވެސް ބައެއް މީހުން މިފަދަ ތަފާތު ގޮތް ގޮތަށް މަޝްހޫރު ކަން ހޯދާފައި އެބަހުއްޓެވެ. އެގޮތުން ޖުލައި މަހު އިންޑޮނޭޝިއާގެ ޔޫޓިއުބަރއެއް، ހަމަ އެއްވެސް ކަމެއް ނުކޮށް ދެގަޑީރަށްވުރެ ގިނައިރު ކެމެރާއާއި ދިމާއަށް ބަލަހައްޓައިގެން އިންނަ ވީޑިއޯ އެއް ޔޫޓިއުބަށް އަޕްލޯޑް ކޮށްފައި ވެއެވެ.
