މިއަހަރު ފެބްރުއަރީމަހު މިޔަންމާއަށް ގެނެސްފައިވާ ބަޢާވާތާ ދެކޮޅަށް ކުރިޔަށްދާ މަދަނީ ބަސްނޭހުންތަކުގައި ބައިވެރިވެގެން، އެގައުމުގެ 125،000 ޓީޗަރުން ސަސްޕެންޑް ކޮށްފައިވާ ކަމުގައި މިޔަންމާގެ ޓީޗާރސް ފެޑެރޭޝަންއިން ބުނެފިއެވެ.
މިޔަންމާގެ އަސްކަރީ ސަރުކާރުން ޓީޗަރުން ސަސްޕެންޑް ކޮށްފައި މިވަނީ، އެގައުމުގެ ދިރާސީ އާއަހަރު ފެށުމަށް މަދު ދުވަސްކޮޅަކަށް ވެފައިވަނިކޮށެވެ. މިޔަންމާގެ އާ ދިރާސީ އަހަރު ފެށުމުގެ ކުރިން، ބަޢާވާތާ ދެކޮޅަށް ކުރިޔަށް ގެންދާ ކެމްޕޭނެއްގެ ދަށުން އެތައްހާސް ޓީޗަރުންނާއި ބެލެނެވެރިން ގެންދަނީ އާ ދިރާސީ އަހަރު ބޮއިކޮޓް ކުރަމުންނެވެ. ނަތީޖާއެއްގެ ގޮތުން، އެތައް އަހަރެއްގެ ޚުދުމުޚުތާރު ވެރިކަމަކަށްފަހު، މިޔްނަމާއަށް އަންނަމުންދިޔަ ޑިމޮކްރަޓިކް ބަދަލުތައް މުޅިން ހުއްޓި، ގައުމުގެ ހުއްޓުމަކަމަށް ގެނުވި ބައާވާތައްފަހު އެގައުމުވަނީ އަދިވެސް މުޅިހެން ހުއްޓުމަކަށް އައިސްފައެވެ.
ހައްޔަރު ކޮށްފާނެ ކަމުގެ ބިރަށް، ނަން ހާމަކުރަން ބޭނުން ނުވާ، މިޔަންމާގެ ޓީޗާރސް ފެޑެރޭޝަންގެ އޮފިޝަލަކު ވިދާޅުވެފައިވާ ގޮތުގައި މިހަފްތާގެ ހޮނިހިރު ދުވަހާ ހަމައަށް، 125،900 ޓީޗަރުންވަނީ ސަސްޕެންޑް ކޮށްފައެވެ. އޭނާ ވިދާޅުވި ގޮތުގައި، މަދަނީ ބަސް ނޭހުމުގައި ބައިވެރިވި ކަމުގެ ތުހުމަތުގައި، އޭނާގެ ނަންވެސް އޮތީ މިޔަންމާގެ މިލިޓަރީ ޖުންޓާގެ ލިސްޓުގައި މިހާރުވެސް ހިމަނާފައެވެ.
އެންމެ ފަހުން ލިބެންހުރި، މީގެ ދެއަހަރުގެ ކުރީގެ ރެކޯޑަށް ބަލައިރު، މިޔަންމާގައި 430،000 ޓީޗަރުން ތިބެއެވެ.
"މިއީ، ބޮއިކޮޓް ކުރުން ހުއްޓާލާ އަބުރާ މަސައްކަތު ނިކުތުމަށް މީހުންނަށް ބިރު ދެއްކުމަށް ކުރާ ކަންކަން. މި ހުރިހާ ޓީޗަރުން ވަޒީފާއިން ވަކިކޮށްފިނަމަ، މުޅި ތައުލީމީ ނިޒާމު ހުއްޓުމަކަށް އައީ،" ޓީޗަރެއްގެ ގޮތުގައި މިހާރުވެސް މަސައްކަތް ކުރަމުންދާ، ޓީޗާރސް ފެޑަރޭޝަންގެ އޮފިޝަލު ވިދާޅުވެފައި ވެއެވެ.
އޭނާ ބުނެފައިވާ ގޮތުގައި، އޭނާ ވަޒީފާއަށް އެބުރި ނިކުމެއްޖެނަމަ، އޭނާއާއި ދެކޮޅަށް އަޅާނެކަމަށް ބުނެފައިވާ ފިޔަވަޅުތައް ނާޅާ ދޫކޮށްލާނެކަން އޭނާއަށް އަންގާފައިވާ ކަމަށެވެ.
ރޮއިޓާސްއިން ބުނެފައިވަނީ، ޓީޗަރުންގެ އިހުތިޖާޖާ ގުޅޭގޮތުން މައުލޫމާތު ހޯދުމަށް، މިލިޓަރީ ޖުންޓާގެ ތަރުޖަމާނާ ގުޅަން މިހާތަނަށް ކުރެވުނު މަސައްކަތް ކާމިޔާބުވެފައި ނުވާކަމަށެވެ.
މިޔަންމާގެ އަސްކަރީ ސަރުކާރުން ހިންގާ ގްލޯބަލް ނިއުސް ލައިޓް އޮފް މިޔަންމާ ނިއުސް ޕޭޕަރުންވަނީ ޓީޗަރުންނާ އަދި ކިޔަވާ ކުދިންނަށްވެސް، އެގައުމުގެ އާދިރާސީ އަހަރުގެ ކިޔެވުން ފެށުމަކަށްޓަކާ ސްކޫލަށް ނިކުތުމަށް ގޮވާލާފައެވެ.
ޓީޗަރުންގެ ގުރޫޕުން ހާމަކޮށްފައިވާ ގޮތުގައި މިޔަންމާގެ ޔުނިވަރސިޓީތަކުގެ 19،500 ސްޓާފުންވެސް ވަނީ މި މަދަނީ ބަސްނޭހުމާއި ގުޅިގެން ސަސްޕެންޑް ކުރެވިފައެވެ.
ކޮމެންޓު ފޮނުވާ