އިންޑިއާގެ ފިލްމީ ތަރި އަދި ވީ-ލޮގާއެއް ކަމަށްވާ ރާހުލް ވޮހްރާ ވަނީ ކޯވިޑް 19 އަށް ފަރުވާ ހޯދަމުންދަނިކޮށް މަރުވެފައެވެ.
އުމުރުން 35 އަހަރުގެ ރާހުލް މަރުވީ އޭނާއަށް ލިބެމުންދިޔަ ފަރުވާއާއި މެދު ފާޑު ކިޔާފައިވާ ވީޑިއޮއެއް އާންމު ކުރިތާ ލަސްތަކެއް ނުވެއެވެ. މި ޚަބަރު ބެލުންތެރިންނާއި ހިއްސާ ކޮށްފައިވަނީ އޭނާގެ އަންހެނުންނެވެ.
ރާހުލް އަކީ އާންމުގޮތެއްގައި މަޖާ ވީޑިއޯތައް ހިއްސާކުރާ ފަރާތެކެވެ. އޭނާގެ ފޭސްބުކާއި ޔޫޓިއުބްގައި 10 މިލިއަނެއްހާ ވިއުސް ލިބިފައިވެއެވެ. ރާހުލްގެ އަންހެނުން ވަނީ އޭނާ މަރުވިކަން އިންސްޓަގްރާމް މެދުވެރިކޮށް ޔަގީންކޮށްދީފައެވެ. އަދި ރާހުލްގެ އެންމެ ފަހު ވީޑިއޯ ވެސް އޭނާ ވަނީ ހިއްސާކޮށްފަ އެވެ.
މި ވީޑިއޯގައި ވާހަކަ ދައްކަމުން ރާހުލް ބުނެފައިވަނީ އޮކްސިޖަން ވަރަށް މުހިއްމު ކަމަށާއި އެއާ ނުލައި ބަލިމީހުންގެ ހާލު ދެރަވާކަމަށެެވެ. ހަމަ އެހެންމެ ނަރުހަކަށް ގޮވިޔަސް އަންނަނީ އެތަށް އިރެއް ފަހުން ކަމަށާއި އެވަގުތުތަކުގައި ކަންކަން ކުރަން ޖެހެނީ އަމިއްލައަށްކަން ވެސް ރާހުލްވަނީ އޭނާގެ ވީޑިއޯގައި ބުނެފައެވެ.
މީގެ އިތުރުން އޭނާ ވަނީ އިންޑިއާގެ ބޮޑުވަޒީރު ނަރެންދްރަ މޯދީ ޓެގްކޮށް ފޭސްބުކް ޕޯސްޓެއް ވެސް ހިއްސާކޮށްފައެވެ. މި ޕޯސްޓުގައި އޭނާ ލިޔެފައިވަނީ "އަހަންނަށް ރަނގަޅު ފަރުވާ/ޚިދުމަތް ލިބުނުނަމަ މިއަދު ދިރި ހުންނާނެ" މިހެންނެވެ.
