މަގާމުގެ ބޭނުން ނަހަމަ ގޮތުގައި ބޭނުން ކުރުމާއި، އަދި ދައުލަތުގެ މާލިއްޔަތުގެ ބޭނުން ނާޖާއިޒް ގޮތުގައި ކުރުމުގެ ތުހުމަތުގައި ސުވާލު ކުރުމަށްޓަކާ، ގަތަރުގެ ފިނޭންސް މިނިސްޓަރ ހައްޔަރު ކުރުމަށް އެގައުމުގެ ޕަބްލިކް ޕްރޮސެކިއުޓަރ އަމުރު ކޮށްފިކަމަށް ގަތަރުގެ ދައުލަތުގެ މީޑިއާއިން ބުރާސްފަތި ދުވަހު ރިޕޯޓް ކޮށްފިއެވެ.
2013 ވަނަ އަހަރުންފެށިގެން ގަތަރުގެ ފިނޭންސް މިނިސްޓަރުކަން ކުރައްވަމުން ގެންދަވާ އަލީ ޝަރީފް އަލް-އިމާދީގެ މައްޗަށް ކުރެވެމުންދާ ތުހުމަތުތަކުގެ ތަފްސީލްތަކެއް ގަދަރުގެ ދައުލަތުގެ މީޑިއާއިން އަންމު ކޮށްފައެއް ނުވެއެވެ. އަދި ކުރެވެމުން ދަނީ، ކޮން ބާވަތެއްގެ ތުހުމަތު ތަކެއް ކަމެއްވެސް އާންމު ކޮށްފައެއް ނުވެއެވެ.
އަލް-އިމާދީ ގަތަރުގެ ފިނޭންސް މިނިސްޓަރު ކަމަށް އައްޔަން ކުރެވުނީ، އެގައުމުގެ ނޭޝަނަލް ބޭންގެ އެންމެ އިސްވެރިޔާގެ މަގާމް އެތައް އަހަރެއް ވަންދެން އަދާ ކުރުމަށް ފަހުގައެވެ.
ގަތަރުގެ މީޑިއާއިން އާންމު ކޮށްފައިވާ ބަޔާނެއްގައި ބުނެފައިވަނީ، ގަތަރުގެ ކަމާބެހޭ މުވައްސަސާތަކުން ތަހުގީގު ކުރަމުން ދަނީ، ރަސްމީ ހައިސިއްޔަތުން އޭނާ އަދާކޮށްފައިވާ މަސްއޫލިއްޔަތާ ގުޅުންހުރި މައްސަލަތަކެއް ކަމުގައެވެ.
ގަތަރުގެ ސަރުކާރުގެ އިސްވެރިން ކޮރަޕްޝަންގެ ތުހުމަތު ތަކުގައި ހައްޔަރު ކުރުމަކީ މަދުން ނޫނީ އެގައުމުގައި ހިގާފައި ނެތް ކަންކަމެވެ.
