ސާރާ އަލީ ޚާންގެ ޗުއްޓީތަކަށް ނިމުމެއް އަންނަ ހެން ހީނުވެ އެވެ. އެގޮތުން އޭނާ ވަނީ ފަހަކަށްއައިސް އެތަށް ތަނަކަށް ޗުއްޓީ ހޭދަކުރުމަށް ގޮސްފަ އެވެ. މި ދަތުރު ތަކުން ބެލުންތެރިންގެ ލޮލުގައި އެންމެ އަޅައިގަންނަނީ އޭނާގެ އައުޓްފިޓްސް އެވެ.
ސާރާ އަލީ ޚާންއަކީ އަބަދުވެސް އެއްގޮތަކަށް ހެދުން އެޅުމަށް ލޯބިކުރާ ފަންނާނެކެވެ. އެންމެ ފަހުން ސާރާ ފެނިފައިވަނީ މުމްބާއީ އެއާޕޯޓުން، އޭނާގެ މަންމަ އަމްރިތާ ސިންގއާ އެކުގައެވެ. އެ މީހުންގެ މަންޒިލަކީ ރާއްޖެއެވެ. އެއާޕޯޓުން އޭނާ ފެނިފައިވަނި "ޕަވާޕަފް ގާރލްސް"ގެ ޑެނިމް ސޯޓަކާއި ހުދުކުލައިގެ ޓޭންކް ޓޮޕެއްގަ އެވެ.
އެހެން ތަރިންނާއި ޚިލާފަށް ސާރާ އޭނާގެ އައުޓްފިޓްސްތައް އެއްފަހަރަށް ވުރެ ގިނައިން ބޭނުންކުރެއެވެ. އެގޮތުން މީގެ ކުރިންވެސް އޭނާ ހަމަ މި ޑެނިމް ސޯޓު ލައިގެން ހުއްޓާވަނީ ފެނިފައެވެ. އެއީ އޭނާގެ ފިލްމު "ކޫލީ ނަމްބަރުވަން" ގެ ޕްރޮމޯޝަނަލް އިވެންޓެއްގައެވެ. ހަމަ ހުދު ކުލައިގެ ޓޭންކް ޓޮޕެއްގެ އިތުރުން އޭނާ އެ އިވެންޓްގައި ދެން ލައިފައި ހުރީ މަޑު ފިޔާތޮށި ކުލައިގެ ޖެކެޓެކެވެ.
ކޮރޯނާ ވައިރަސްގެ ބަލިމަޑުކަމާއެކު ރާއްޖެ ވެފައިވަނީ އިންޑިއާގެ ފަންނާނުންގެ ތެރޭގައި ވަރަށް މަޝްހޫރު މަންޒިލަކަށެވެ. އެގޮތުން ޓައިގާރ ޝްރޮޕް، ދިޝާ ޕަޓާނީ އަދި ތާޕްސީ ޕަންނޫވެސް ވަނީ ދާދި ފަހުން ރާއްޖެއަށް ޒިޔާރަތް ކޮށްފަ އެވެ. ހަމަ އެހެންމެ ޖާންވީ ކަޕޫރު އަދި ޝްރަދާ ކަޕޫރުވެސް ވަނީ ޗުއްޓީ ހޭދަކުރުމަށް ރާއްޖެ އެއްފަހަރަށްވުރެ ގިނަފަހަރު ޒިޔާރާތް ކޮށްފައެވެ.
