ރާއްޖޭގެ ބޯޑަރު ހުޅުވާލިފަހުން އެންމެ ގިނައިން ރާއްޖެއަށް މީހުންއުފުލި އެމިރޭޓްސް އެއަރލައިނުން މިއަހަރުގެ މިހާތަނަށް ރާއްޖެއަށް އުފުލި މީހުންގެ އަދަދު ބައި ލައްކައަށްވުރެ އިތުރުވެއްޖެ އެވެ.
ޓޫރިޒަމް މިނިސްޓްރީގެ ތަފާސް ހިސާބުން ދައްކާގޮތުން ރާއްޖެއަށް މިއަހަރުގެ މިހާތަނަށް އެންމެ ދިނަ މީހުން އުފުލާފައި ވަނީ އެމިރޭޓްސްގެ އިތުރުން ރާއްޖޭގެ ބޯޑަރު އަލުން ހުޅުވާލުމުން އެންމެ ފުރަތަމަ ދަތުރުފެށި ގަތަރު އެއަރވޭސް އިންނެވެ.
އަދި އިންޑިއާގެ ދެ އެއަރ ލައިން ކަމަށްވާ އިންޑިގޯ އާއި ގޯއެއަރ އަދި ރަޝިއާގެ އޭރޯފްލޮޓް އިން މި އަހަރު މިހާތަނަށް ވަނީ ކޮންމެ އެއަރލައިނަކުންވެސް 30 ހާހަށްވުރެ ގިނަ މީހުން ރާއްޖެއަށް އުފުލާފައެވެ.
މިއަހަރު މިހާތަނަށް އެންމެ ގިނަ މީހުން އުފުލާފައި ވާ5 އެއަރލައިނަކީ މިދިޔަ އަހަރުވެސް ރާއްޖެއަށް އެންމެ ގިނަ މީހުން އުފުލި 5 އެއަރލައިނެވެ.
ރާއްޖެއަށް އެންމެ ގިނަ މީހުން މިއަހަރު މިހާތަނަށް އުފުލި 5 އެއަރލައިން:
އެމިރޭޓްސް – 52،706
ޤަތަރު އެއަރވޭސް – 38،207
އިންޑިގޯ – 35743
ގޯ އެއަރ – 33065
އޭރޯފްލޮޓް – 30،558
ޗާޓަރ ދަތުރުތަކާއެކު ޖުމްލަ 29 އެއަރލައިނަކުން ރާއްޖެއަށް މިހާރުގެންދަނީ ދަތުރު ކުރަމުންނެވެ. ދުނިޔޭގެ އެންމެ ބޮޑެތި އެއަރލައިން ތަކުގެތެރެއިން ރާއްޖެއަށް ދެން އެންމެ އަވަހަށް ދަތުރުތަށް ފަށަން ހަމަޖެހިފައިވަނީ ސިންގަޕޯރ އެއަރލައިންސް އިންނެވެ.
އެ އެއަރލައިނުން އަލަށް ފަށާފައިވާ ނެރޯބޮޑީ ފްލައިޓް ބޮއިން 737ގެ ދަތުރުތަށް މިމަހުގެ30 ވަނަ ދުވަހުން ފެށިގެން ރާއްޖެއަށް ކުރަން ފަށާނެކަމަށް އެ އެއަރލައިނުން މީގެކުރިން ވަނީ ބުނެފައެވެ.
ޓޫރިޒަމް މިނިސްޓްރީގެ ތަފާސްހިސާބު ދައްކާގޮތުން މިއަހަރު މިހާތަނަށް ރާއްޖެ ޒިޔާރަތްކުރި ފަތުރުވެރިންގެ ޖުމްލަ އަދަދު 269،504 އަށް ވަނީ އަރާފައެވެ. އެއީ ޖަނަވަރީ މަހު ރާއްޖެ އައި 92،103 ފަތުރުވެރިންނާއި މިދި މަހު އައި 96،882 ފަތުރުވެރިންނާއި މިމަހުގެ މިހާތަނަށް އައި 80،519 ފަތުރުވެރިން ހިމަނައިގެންނެވެ.
