36 އަހަރުގެ ދިގު ވެރިކަމެއް ޑިމޮކްރަޓިކް ރިޕަބްލިކް ކޮން ކޮންގޯގައި ކުރަމުންދާ ރައީސް ޑެނިސް ސަސޯ ގުއެއްސޯ އެގައުމުގެ ރިޔާސީ އިންތިޚާބު ބޮޑު ތަފާތަކުން ކާމިޔާބު ކުރައްވައިފިއެވެ. ވަގުތީ ނަތީޖާތައް ދައްކާގޮތުން ރައީސް ޑެނިސް ސަސޯ ގުއެއްސޯ ރިޔާސީ އިންތިޚާބު ކާމިޔާބު ކޮށްފައިވަނީ %88.57ގެ ބޮޑު އައުލަބިއްޔަތަކުންނެވެ.
ރިޕަބްލިކް އޮފް ކޮންގޯގެ މިހާރުގެ ރައީސް ޑެނިސް ސަސޯ ގުއެއްސޯއަކީ 3 ވަނައަަށް އެންމެ ދިގު މުއްދަތަކަށް އެފްރިކާ ބައްރުގެ ގައުމެއްގެ ވެރިކަން ކުރައްވަމުން ގެންދަވާ ލީޑަރެވެ. އެންމެ ފުރަތަމަ އޭނާ ރިޕަބްލިކް އޮފް ކޮންގޯގެ ވެރިކަން ކުރައްވާފައިވަނީ 1972-1992 އަށެވެ. އަދި އެއަށްފަހު، 1997 އިންފެށިގެން އޭނާ ގެންދަވަނީ އެގައުމުގައި ވެރިކަން ކުރައްވަމުންނެވެ.
ކޮންގޯގެ އިންޓީރިއަރ މިނިސްޓަރު މިއަދު އިލެކްޝަން ކޮމިޝަންގެ ނަތިޖާތައް އިއުލާން ކޮށްފައި ވާއިރު، އިދިކޮޅު ގިނަ ޕާޓީތަކުން މި އިންތިޚާބު ބޮއިކޮޓް ކޮށްފައިވާތީ، މި އިންތިޚާބު ބޮޑު ތަފާތަކުން ރައީސް ޑެނިސް ސަސޯ ގުއެއްސޯ ކާމިޔާބު ކުރައްވާނެކަމަށް މީގެ ކުރިންވެސް ވަނީ ބެލެވިފައެވެ.
މި އިންތިޚާބުގައި ވޯޓު ލާ ނިމުނު ތަނާ ކަހަލަ ގޮތަކަށް، ރައީސް ޑެނިސް ސަސޯ ގުއެއްސޯއާއި ވާދަ ކުރައްވަމުން ގެންދެވި، ރައްޔިތުންގެ ތާއީދު ބޮޑު އިދިކޮޅު ލީޑަރު ބްރައިސް ޕާފެއިޓް ކޮލެލާސް ވަނީ ކޯވިޑް ބަލީގައި މަރުވެފައެވެ. ކޮލެލާސްއަށް މި އިންތިޚާބުގައި ލިބިގެން ގޮސްފައިވަނީ %7.84 ވޯޓެވެ.
މިއިންތިޚާބގައި ވާދަ ކޮށްފައިވާ، ނާކާމިޔާބުވި ކެނޑިޑޭޓެއް ކަމުގައިވާ، މެތިއަސް ޑީޒޮން ވިދާޅުވެފައިވަނީ، އިންތިޚާބުގެ ނަތީޖާ ބާތިލް ކުރުމަށް މައްސަލަ އެގައުމުގެ ކޮންސްޓިޓިއުޝަނަލް ކޯޓަށް ހުށަހެޅުއްވުމަށް އެނާ ގެންދަވަނީ މަސައްކަތް ކުރައްވަމުންނެވެ. ސަބަބެއްކަމަށް އޭނާ ވިދާޅުވަނީ، އިންތިޚާބުގައި ވާދަކުރާ ކޭނޑިޑޭޓަކު މަރުވުން ނުވަތަ އިންތިޚާބުގައި ވާދަކުރާ ކެނޑީޑޭޓަކަށް ވޯޓު ނުލެވޭގޮތް ވެއްޖެނަމަ، އިންތިޚާބު ލަސްކުރުމުގެ ފުރުސަތު ގާނޫނު އަސާސީން ފަހި ކޮށްދޭތީއެވެ.
އެހެންނަމަވެސް، ކޮންގޯގެ އިލެކްޝަންސް ކޮމިޝަންގެ ރައީސް ވިދާޅުވެފައިވަނީ، އެގައުމުގެ ގާނޫނު އަސާސީގެ މި މާއްދާ މިފަހަރު ހާލަތާ ނުގުޅުވޭނެ ކަމަށެވެ.
"ކޮލެލާސް މަރުވެފައިވަނީ، ޕެރިހުގައި، ވޯޓުލާ ނިމުނު ފަހުން، އެހެންކަމުން، ގާނޫނު އަސާސީގެ 70 ވަނަ މައްދާ މި ޙާލަތަކާ ނުގުޅުވޭނެ،" އިލެކްޝަން ކޮމިޝަންގެ އިސް ވެރިޔާ އަދި، ކޮންގޯގެ ސުޕްރީމް ކޯޓުގެވެސް ރައީސް ހެންރީ ބޫކާ ވިދާޅުވެފައި ވއެވެ.
ކޮންގޯގައި ވަރަށް ކުރު މުއްދަތަކަށް ކުރިޔަށް ދިޔަ އަހުލީ ހަގުރާމައަކަށްފަހު، ވެރިކަމުގެ ބާރުތައް ގުއެއްސޯ ނަންގަވާފައިވަނީ 1997 ވަނަ އަހަރުއެވެ. އަދި އެއަށްފަހު އެގައުމުގެ ރައީސްކަމަށް އަލުން އިންތިޚާބު ވެވަޑައިގަތީ 2002 ވަނަ އަހަރުއެވެ. އެއަށްފަހު، އެންމެ ފަހުގެ ދެވަނަ ދައުރަށް އިންތިޚާބު ވެވަޑައިގަތީ 2009 ވަނަ އަހަރުއެވެ.
އެހެންނަމަވެސް، ކޮންގޯގެ ގާނޫނު އަސާސީއަށް 2015 ވަނަ ބަދަލު ގެނެސް، އުމުރުން 70 އަހަރަސްފަހުވެސް ވެރިކަމުގައި ދެމިހުރެވޭ ގޮތަށް ގުއެއްސޯ ކޮންގޯގެ ގާނޫނު އަސާސީ ބަދަލު ކުރިއެވެ. އަދި އެގައުމުގެ ގާނޫނު އަސާސީގައި ބަޔާން ކުރެވިފައިވާ 5 އަހަރުގެ ދެ ޓާމުގެ ބަދަލުގައި، 5 އަހަރުގެ 3 ޓާރމުގައި ވެރިކަމުގައި ދެމި ހުރެވޭގޮތަށްވެސް އޭނާ ގާނޫނު އަސާސީއަށް އިސްލާހު ގެނައެވެ.
