ޕްރިޔަންކާ ޗޯޕްރާ އޭނާގެ ފިލްމު "ދަ ވައިޓް ޓައިގާ" ޕްރޮމޯޓްކުރުމަށް ދަނީ އެކިއެކި ޓީވީ ޝޯވތަކުގައި ބައިވެރިވަމުންނެވެ. އެގޮތުން އެންމެފަހުން ޕްރިޔަންކާ ފެނިގެންގޮސްފައިވަނީ "ދަ އެލެން ޝޯވ" އިންނެވެ. މި ޝޯވގައި ޕްރިޔަންކާވަނީ ޝޯވގެ ހޯސްޓު އެލެން ޑީޖެނެރެސް ކުރާ ސުވާލުތަކަށް "ޓްރުތު އޯރ ޑްރިންކް" ގޭމް ކުޅެފައެވެ.

އެލެން ޝޯވގެ ޕްރޮމޯގައި ޕްރިޔަންކާ ކަޅު ކުލައިގެ ހެދުމެއްގައި ފެނިގެންދަނީ ގޭމްކުޅުމަށް ޑްރިންކް ބަހައްޓާފައިވާ ޓްރޭ ހިފައިގެންހުއްޓަ އެވެ. ގޭމުގެ ތެރެއިން އެންމެ ފުރަތަމަ ސުވާލަކަށް ޕްރިޔަންކާ އެންމެ ފަހުން މެސެޖެއް ކުރި ސެލެބްރިޓީއަކީ ކޮބައިތޯ އެލެން ސުވާލުކުރުމުން ޕްރިޔަންކާ ވަނީ ތެދަށް ޖަވާބުދީފައެވެ.

ޕްރިޔަންކާ ބުނީ އޭނާ އެންމެ ފަހުން މެ ޔޫޓިއުބާ ލިލީ ސިން، އޭނާގެ ޝޯވގައި ޕްރިޔަންކާ ބައިވެރިކުރީތީ އެކަމަށް ޝުކުރު އަދާކުރަންކަމަށެވެ. އަދި އެލެން ޝޯވ އަށް ދާން ފުރުސަތު ލިބޭނެކަމަށް ލިލީ ބުނެފައި ވާކަމަށްވެސް ޕްރިޔަންކާ ބުންޏެވެ.

އެލެން ދެންކުރި ސުވާލުން ޕްރިޔަންކާއަށް ވިސްނާލަން ކުޑަވަގުތުކޮޅެއްނެގިއެވެ. އެލެންގެ ސުވާލަކީ ޖޯނަސް ބްރަދާސްގެ ތެރެއިން ޕްރިޔަންކާއަށް ޓިކްޓޮކްގައި ފޮލޯކުރަން އެންމެ ކަމުދަނީ ކާކު ތޯއެވެ. ޕްރިޔަންކާ މިސުވާލަށް ދިން ޖަވާބުގައި ބުނީ އޭނާގެ ފިރިމީހާ ނިކް ޖޯނަސްގެ ނަމެއް ނޫނެވެ. ޕްރިޔަންކާ ބުނީ އެންމެ ކަމުދަނީ ޖޯނަސް ބްރަދާސްގެ ތެރެއިން އެންމެ ހަގު ކުއްޖާ ފްރޭންކްލިން ޖޯނަސްކަމުގައެވެ.

އެމެރިކާގެ މަޝްހޫރު ލަވަކިއުންތެރިޔާ ނިކް ޖޯނަސް އާއި ޕްރިޔަންކާ ކައިވެނި ކުރީ 2018 ވަނަ އަހަރުގެ ޑިސެމްބަރު މަހުއެވެ. ޕްރިޔަންކާ އަކީ ބޮލީވުޑްގެ އިތުރުން ހޮލީވުޑްގައި ވެސް މިހާރު އެންމެ ކުރީގައި ގުނާލެވޭ އެއް ތަރިއެވެ.

ޕްރިޔަންކާގެ އެންމެ ފަހުން ނުކުއިތް ފިލްމު "ދަ ވައިޓް ޓައިގާ" އަށް ގިނަބައެއްގެ ތަޢުރީފް އަންނަނީ އޮހެމުންނެވެ.